Dujto Timotejoske 3:1-17
3 Aľe kamav, kaj te džanes, hoj andro posledna ďivesa pes čačes dživela igen phares.
2 Bo o manuša rado dikhena pes korkoren. Rado dikhena o love, ašarena pes, ena barikane, džana proťi o Del. Na šunena le dades la da, ňič peske na važinena, na ena verna.
3 Narado dikhena peskera fameľija. Na dela pes lenca ňisar te dothovel, ohovarinkerena, na džanena pes te zľikerel, ena nalačhe bijo jilo,* na kamena o lačhipen.
4 Zraďinkerena jekh avres. Na dena peske te phenel, thovena pes upre.* Na kamena le Devles, aľe kamena te kerel ča oda, pre soste len cirdel lengero jilo.
5 Kerena pestar, hoj igen paťan le Devles, aľe na dživena avka sar ov kamel. Ajsenca tut te na chal ňič.
6 Maškar lende hine ajse murša, save počoral aven andro khera a diliňaren ajse džuvľijen, saven nane ajso zoralo paťaviben, save varekana kerenas but bini a keren oda, pre soste len cirden lengere ťeli.
7 Ala džuvľija furt sikhľon, aľe the avka ňigda na sprindžarena o čačipen avka sar oda kampel.
8 Kale muršen hin andre goďi ča but džungaľipen. O Del pre lende na dikhel mištes, bo džan proťi paťaviben. Avka sar o Janes the o Jambres džanas proťi Mojžiš avka the on džan proťi čačipen.
9 Aľe ňič buter imar na kerena. Bo lengero diliňipen dikhena savore avka sar varekana dikhle oda diliňipen, so kerde o Janes the o Jambres.
10 Aľe tu mištes šunehas oda sar sikhľarav. Džives avka sar me. Dochudľal oda so me. Presikaves oda isto paťaviben sar me, sal trpezlivo* sar me. Džanes te presikavel o kamiben avka sar me a tiš avka te ľikerel avri.
11 Džanes olestar sar pre ma džanas the pal miro trapišagos, savo zadžiďiľom andre Antijochija, andro Ikonijum the andre Listra. Aľe o Raj man kalestar savorestar iľa avri.
12 Sem pre savore, ko kamen te služinel le Devleske calone jileha sar učeňika le Kristoskere Ježišoskere, pre lende aver džana.
13 Aľe o nalačhe manuša the ola, so keren podvodi, kerena furt bareder nalačhipen. Klaminena avren a the len averdžene klaminena.
14 Aľe tu tut ľiker olestar, so sikhľiľal a soha tuke sal isto, bo džanes, kastar oda sikhľiľal.
15 Ma bister, hoj imar ciknorestar prindžares, so hin pisimen andre Devleskero lav. Ala lava tuke pomožinena, kaj te keres goďaverones. Paľis aveha zachraňimen, bo presikaves paťaviben andro Kristus Ježiš.
16 Sa, so hin pisimen andre ala svata kňižki, hino le Devlestar. Kala lava, so hine andre, hine lačhe pre ada, kaj le manušen te sikhľaren, kaj te sikaven, so hino nalačho, kaj sa te prikeren a kaj le manušenge te dophenen, kaj te keren oda, so hino lačho.*
17 Oda vaš oda, kaj koda, ko služinel le Devleske te džanel te kerel dojekh lačhi buťi a kaj les te el pre ada sa, so kampel.
Poznamki tele čijarkica
^ Doslovňe: dziva.
^ Abo ľidžana peske.
^ Oda hin: pokojnones te ľikerel avri a te na choľarel pes sig.
^ Doslovňe: spravodlivo. Dikh tuke buter adaj andro Slovňikos.
