Galaťanenge 1:1-24
1 Me o Pavol, savo ačhiľom apoštolos na vaš oda, bo oda kamle o manuša abo varesavo jekh manuš, aľe vaš oda, bo oda kamľa o Ježiš Kristus a o Del o Dad, savo les uštaďa andal o meriben.
2 Jekhetane le phralenca, save hine manca, pisinav le phralenge andro zbori andre Galacija:
3 Mi del tumen o Del, amaro Dad, the o Raj o Ježiš Kristus baro lačhipen the o smirom.
4 O Kristus diňa peskero dživipen vaš amare bini, kaj amen te lel avri andal ada nalačho svetos,* so hin akana. Kerďa oda vaš oda, bo oda kamľa amaro Del the Dad.
5 Modľinav man, kaj le Devles te ašaras pro furt. Amen.
6 Na džal mange andro šero sar tumen avka sig odvisaren le Devlestar, savo tumen kidňa avri. Ov tumenge sikaďa baro lačhipen prekal o Kristus a tumen prilen vareso aver sar te bi oda uľahas lačhi sprava le Devlestar.
7 Aľe ňisavi aver lačhi sprava nane. Sigeder hin adaj ča varesave manuša, save tumen kamen te zdiliňarel a te previsarel e lačhi sprava pal o Kristus.
8 Choč* bi tumenge vareko amendar abo aňjelos andal o ňebos phenďahas aver lačhi sprava sar odi, savi tumenge amen vakerahas, kajso dženo mi el odsudzimen.
9 Avka sar imar phenďom, vakerav pale: Te tumenge vareko vakerel aver lačhi sprava sar odi, savi priiľan, mi el koda dženo odsudzimen.
10 Kamav, kaj pre ma mište te dikhen o manuša abo o Del? Mišľinen, hoj man kamav te pačinel le manušenge? Te bi mange džalas pal oda, kaj man mek te pačinav le manušenge, ta bi na uľomas le Kristoskero otrokos.
11 Phralale, kamav, kaj te achaľon, hoj e lačhi sprava, savi tumenge vakeravas, nane le manušendar.
12 Sem me la na šunďom aňi la na sikhľiľom le manušestar, aľe sikaďa mange la o Ježiš Kristus.
13 Isto šunďan pal oda, savo somas, sar mek somas andre židoviko vjera. Sar igen a bijo jilo džavas pro Devleskero zboros a sar les kamľom te zňičinel.
14 Sar mek somas andre židoviko vjera, somas andre koda feder sar aver Židi andre mire berša. Calone jileha doľikeravas o tradiciji amare dadengere.
15 Paľikerav le Devleske, hoj uľiľom andre ada svetos a hoj man pricirdľa peskere bare lačhipnaha. Ov igen kamľa,
16 kaj me te vakerav pal e lačhi sprava le manušenge andal aver narodi, kaj the on te sprindžaren leskere Čhas. Sar man kidňa avri, kaj ada te kerav, na geľom pal ňisavo manuš, kaj lestar te phučav či ada šaj kerav.
17 Aňi na geľom andro Jeruzalem te phučel olendar, save sas sigeder apoštola sar me. Aľe geľom andre Arabija a paľis avľom pale andro Damask.
18 Pal o trin berš geľom andro Jeruzalem te dikhel le Kefas* a ačhiľom ke leste 15 ďives.
19 Aľe ňisave aver apoštolen odoj na dikhľom. Dikhľom ča le Jakub le Rajeskere phrales.
20 O Del džanel, hoj oda, so tumenge pisinav, hin čačipen.
21 Paľis geľom andre Sirija the Cilicija.
22 Aľe le Kristoskere učeňika andre Judeja man mek na dikhle.
23 Šunde ča ada: „O manuš, savo varekana pre amende džalas a kamľa te zňičinel o zbori, akana vakerel e lačhi sprava.“
24 Avka chudne te ašarel le Devles angle* koda, so pes mange ačhiľa.
Poznamki tele čijarkica
^ Dikh tuke buter adaj andro Slovňikos.
^ Abo hoc.
^ Aver menos le Peteriskero.
^ Abo vaš, bijal, aščal, predal.
