Galaťanenge 2:1-21
2 Paľis pal o 14 berš geľom pale andro Jeruzalem le Barnabašoha a iľom manca the le Titus.
2 Geľom odoj, bo o Raj mange phenďa, kaj odoj te džav. Korkoro man zgeľom le phralenca, saven sas baro lav. Phenďom lenge pal e lačhi sprava, savi vakerav maškar o manuša andal aver narodi. Bo kamľom te džanel či oda, so kerav predal o Del, hino lačho abo na a či oda, so kerav, nane jevavalom.*
3 Aňi pro Titus, savo sas manca, na ispidenas, kaj pes te del te občhinel, choč* sas Grekos.
4 But pal ada chudne te vakerel o falošna phrala, save tiš avle andro zboros. Aľe ča vaš oda, kaj amendar te len e sloboda, savi amen hin sar učeňiken le Ježišoskere Kristoskeren, bo kamle, kaj pale igen te doľikeras o Zakonos.
5 Ňisar na diňam pre lengero aňi na kerďam avka sar on kamle. Bo kamas, kaj tumenge dureder te ačhel o čačikano sikhľariben, pal savo tumenge vakerahas prekal e lačhi sprava.
6 Aľe pre ola, pre saven pes dikhel, hoj hine vareko, (mange hin oda jekh, ko on sas varekana, bo o Del na dikhel pro manuš sar dičhol avral), ta ala phrala, saven hin baro lav, mange na phende ňič ajso nevo.
7 On dikhle, hoj mange sas dino, kaj te vakerav e lačhi sprava the olenge, save nane občhinde avka sar sas dino the le Peteriske, kaj te vakerel e lačhi sprava olenge, so hine občhinde.
8 (Bo koda, savo diňa le Peteriske zor pre ada, kaj te el apoštolos predal ola, save hine občhinde, diňa zor the man, kaj te avav apoštolos predal o manuša andal aver narodi.)
9 On udžanle,* hoj mange o Del presikaďa baro lačhipen. O Jakub, o Kefas* the o Jan, pre save pes dikhelas, hoj zorales ľikeren o zbori,* dine le Barnabašoske the mange o pravo vast. Kaleha sikade, hoj amen šaj džas ko manuša andal aver narodi a on ke ola, save hine občhinde.
10 Ča amen pomangle, kaj te na bisteras pro čore a ada the kamľom te kerel.
11 Aľe sar avľa o Kefas* andre Antijochija, me leske zorales dophenďom. Bo oda, so kerelas, sas nalačho.
12 Medik* na avle varesave manuša, saven bičhaďa o Jakub, ta jekhetane chalas le manušenca andal aver narodi. Aľe sar on avle, preačhiľa lenca te chal. Odcirdelas pes lendar, bo daralas olendar, savenge igen džalas pal oda, kaj pes o manuš te del te občhinel.
13 A na ča ov sas ajso dujemujengero. Pridenas pes ke leste mek až aver Židi a the o Barnabaš pes lenca diňa te scirdel.
14 Sar dikhľom, hoj na keren pal e lačhi sprava, ta angle savorende phenďom le Kefasoske andro jakha: „Te tu, choč sal Židos, džives avka sar o manuša andal aver narodi a na sar o Židi, ta sar oda, hoj ispides pro manuša andal aver narodi, kaj te doľikeren o židovika tradiciji?“
15 Amen, save uľiľam sar Židi a na sar o binošna andal aver narodi,
16 džanas, hoj pro manuš pes na dikhel, hoj kerel oda, so hino lačho andre Devleskere jakha* ča vaš oda, hoj doľikerel o Zakonos. Aľe ča akor, te presikavel paťaviben andro Ježiš Kristus. Vaš oda paťanďiľam andro Kristus Ježiš, kaj pre amende te el phendo, hoj sam lačhe andre Devleskere jakha. Bo presikavas paťaviben andro Kristus a na angle* ada, hoj doľikeras o Zakonos. Bo pre ňikaste na ela phendo, hoj hino lačho andre Devleskere jakha ča vaš oda, bo doľikerel o Zakonos.
17 Te the pre amende, save keras predal ada savoro, kaj pre amende te el phendo, hoj sam lačhe andre Devleskere jakha, phenen, hoj sam binošna, ta akor sar? Podhazdel amen o Kristus ke ada, kaj te keras o binos? Ta ada isto, hoj na!
18 Te bi pale budinavas oda, so varekana araďom,* sikaďahas bi oda, hoj na doľikerav o Zakonos.
19 Bo o Zakonos kerďa, hoj imar na som* tel o Zakonos, kaj te dživav predal o Del.
20 Som sar te bi primardo pro drukos le Kristoha. Imar na dživav predal mande, aľe dživav avka sar mandar užarel o Kristus. O dživipen, savo akana dživav, sikavel, hoj paťav andro Devleskero Čhavo, savo man rado dikhelas a savo vaš ma diňa peskero dživipen.
21 Na odčhivav mandar le Devleskero baro lačhipen. Bo te ela manuš lačho andre Devleskere jakha ča akor, te doľikerela o Zakonos, ta paľis o Kristus muľa jevavalom.
Poznamki tele čijarkica
^ Abo hijaba.
^ Abo hoc.
^ Abo uznajinde.
^ Aver menos le Peteriskero.
^ Abo sar te bi o stlpi andro zboros.
^ Aver menos le Peteriskero.
^ Abo pokim.
^ Doslovňe: spravodlivo. Dikh tuke buter adaj andro Slovňikos.
^ Abo vaš, bijal, aščal, predal.
^ Abo čhiďom tele, zburinďom.
^ Doslovňe: muľom le Zakonoske.
