Galaťanenge 3:1-29
-
Te doľikerel o Zakonos abo o paťaviben (1 – 14)
-
„Koda, ko kerel oda, so hino lačho andre leskere jakha dživela, bo paťal“ (11)
-
-
O Abraham na chudľa sľubos prekal o Zakonos (15 – 18)
-
Le Abrahamoskero čhavo o Kristus (16)
-
-
Khatar hino o Zakonos a pre soste (19 – 25)
-
Savore, so presikaven paťaviben, hine le Devleskere čhave (26 – 29)
-
Te san le Kristoskere učeňika, ta san le Abrahamoskere čhave (29)
-
3 Tumen Galaťanale! Nane tumen goďi? Ta ko tumen avka zdiliňarďa? Sar oda, hoj tumen, te avka lačhes achaľiľan oleske, hoj o Ježiš Kristus muľa pro drukos?
2 Ča kada tumendar phučav: Soske chudľan le Devleskero svato duchos? Vaš oda, hoj doľikerenas o Zakonos abo vaš oda, hoj paťanďiľan andre lačhi sprava, savi šunďan?
3 Na achaľuvav tumenge! Peršo tumen zmukhenas pre le Devleskero svato duchos, kaj ov tumen te ľidžal. A akana tumen zmukhen pre tumari goďi?
4 Oda jevavalom* tumenge cerpinďan avri oda savoro? Som mange isto, hoj na.
5 Akor koda, ko tumen del peskeri zor a kerel maškar tumende zazraki, ada soske kerel? Vaš oda, hoj doľikeren o Zakonos abo vaš oda, hoj paťanďiľan andre lačhi sprava, savi šunďan?
6 Sem the o Abraham „paťanďiľa le Jehovaske* a ov pre leste dikhelas, hoj kerel oda, so hino lačho andre leskere jakha“.
7 Džanen, hoj ola, save presikaven paťaviben, hine le Abrahamoskere čhave.
8 Le Devleskero lav imar čirla sikavelas pre oda, hoj o Del phenela pal o manuša andal aver narodi, hoj hine lačhe andre leskere jakha vaš oda, hoj presikaven paťaviben. Anglal sas phenďi le Abrahamoske adi lačhi sprava: „Prekal tute chudena lačhipen savore narodi.“
9 Vaš oda ola, save presikaven paťaviben, chuden oda isto lačhipen sar o Abraham, savo tiš presikavelas paťaviben.
10 Savore, save pes zmukhen pre oda, hoj doľikeren o zakonos, ena odsudzimen, bo hin pisimen: „Mi el odsudzimen dojekh, ko na doľikerel savoro, so hin pisimen andro Zakonos.“
11 A mek ke ada džanas, hoj o Del pal ňikaste na phenela, hoj hino lačho andre leskere jakha vaš oda, hoj doľikerel o Zakonos. Bo „koda, ko kerel oda, so hino lačho andre leskere jakha, dživela, bo paťal“.
12 Kaj o manuš te doľikerel o Zakonos, pre oda leske na kampel, kaj te presikavel o paťaviben. Aľe andro Zakonos hin, hoj „ko ada savoro doľikerel, ta oda leske anel o dživipen“.
13 O Kristus amen cinďa avri, bo oda, hoj samas sar te bi prekošle* iľa pre peste a kaleha amen sar te bi premukhľahas olestar, hoj imar na sam pal o Zakonos sar te bi prekošle. Bo hin pisimen: „Dojekh, kas figinen pro drukos, hino prekošlo.“
14 Oda pes ačhiľa, kaj prekal o Kristus Ježiš te chuden oda lačhipen, savo chudľa o Abraham the o manuša andal aver narodi. A kaj vaš oda, hoj presikavas paťaviben te chudas oda svato duchos avka sar o Del diňa lav.
15 Phralale, phenav tumenge ke ada ajso priklados, kaj oleske mek feder te achaľon: Te hiňi varesavi zmluva imar kerďi, choč* pes dothode ča o manuša, ta ňiko oda imar našťi lel pale aňi odoj našťi vareso dothovel.
16 O sľubi sas dine le Abrahamoske the leskere čhaske. Andre Devleskero lav nane pisimen „the tire čhavenge“ sar te bi vakerelas pal o buter čhave. Hin odoj pisimen „the tire čhaske“. Kaleha mišľinel ča pro jekh čhavo a oda hin o Kristus.
17 Dureder phenav: Peršo o Del diňa lav. Až paľis pal o 430 berš sas o Zakonos. Vaš oda o Zakonos našťi odčhiďa odi zmluva aňi oda lav, savo o Del diňa mek sigeder.
18 Te o Del del ďeďičstvos vaš oda, bo oda phenel o Zakonos, ta les imar na del vaš oda, hoj diňa lav. Aľe le Abrahamoske diňa ada ďeďičstvos jilestar, bo leske diňa lav.
19 Ta akor soske hin Zakonos? Ada Zakonos sas paľis dino vaš oda, kaj te sikavel, so nalačho keren o manuša, medik* na avel oda čhavo, kaske sas dino lav. O Del prekal o aňjela diňa Zakonos le Mojžišoske a paľis o Mojžiš le manušenge.
20 Te e zmluva kerďa ča jekh dženo, ta na kampel, kaj leske oleha vareko te pomožinel. A avka istones hin oda the le Devleha. Ov sas koda, ko diňa oda lav.
21 Džal akor o Zakonos proťi oda lav, savo diňa o Del? Isto hoj na! Sem te bi elas varesavo zakonos, savo bi šaj delas o dživipen, ta bi pes pre amende dikhelas, hoj sam lačhe andre Devleskere jakha vaš oda, hoj doľikeras o zakonos.
22 Aľe le Devleskero lav sikaďa, hoj upral savorende vladňinel o binos, kaj ola, so presikaven paťaviben andro Ježiš Kristus te zadživen oda lačhipen, pal savo phenďa o Del.
23 Mek sigeder sar chudňam te paťal andro Kristus, ta o Zakonos sas sar te bi oda, so pre amende dodikhelas, hoj so keras. Samas tel o Zakonos a užarahas pre oda, so amenge o Del pal kada sikavela.
24 Prekal o Zakonos chudľam sar te bi vichova, savi amen ľidžalas ko Kristus, kaj pre amende te el phendo, hoj sam lačhe andre Devleskere jakha vaš oda, hoj presikavas paťaviben.
25 Aľe akana, te imar paťas andro Kristus, ta amenge imar na kampel, kaj amen te ľidžal o Zakonos.
26 Sem savore san le Devleskere čhave, bo presikaven paťaviben andro Kristus Ježiš.
27 Vaš oda tumen savore, save sanas bolde andro Kristus, ačhiľan tiš ajse sar o Kristus.*
28 Imar hin jekh či san Židi abo Greki, otroka abo slobodna, murša abo džuvľa, bo savore san učeňika le Ježišoskere Kristoskere a san andre savoreste sar te bi jekha goďaha the jekhe jileha.
29 A te san le Kristoskere učeňika, ta san le Abrahamoskere čhave a chudena oda ďeďičstvos avka sar o Del diňa lav le Abrahamoske.
Poznamki tele čijarkica
^ Abo hijaba.
^ Dikh o dodatkos A5.
^ Abo odsudzimen.
^ Abo hoc.
^ Abo pokim.
^ Doslovňe: urďan pre tumende le Kristus.
