Galaťanenge 5:1-26
5 O Kristus kerďa, hoj imar na mušinas te el otroka. Vaš oda tumen kalestar ľikeren a na domukhen, kaj te en pale otroka.
2 Me o Pavol tumenge phenav: Te tumen dena te občhinel, ta so lačho hin tumen olestar, hoj o Kristus diňa peskero dživipen?
3 Pale leperav sakoneske, hoj sako, ko pes dela te občhinel, kajso dženo mušinel te doľikerel sa, so hin pisimen andro Zakonos.
4 Tumen, save kamen, kaj pre tumende te el phendo, hoj san lačhe andre Devleskere jakha* vaš oda, hoj doľikeren o Zakonos, tumen keren pal tumaro. Na keren oda, so kamel o Kristus a vaš oda tumenge ov našťi presikavel peskero baro lačhipen.
5 Amen užaras, hoj avaha lačhe andre Devleskere jakha a ke ada amenge pomožinel le Devleskero svato duchos the amaro paťaviben.
6 Le Ježišoskere Kristoskere učeňikenge na džal pal oda či hine občhinde abo na. Džal pal oda či len hin ajso paťaviben, savo pes presikavel kaleha, hoj avrenge presikaven o kamiben.
7 Ta ko tumen kerďa tele, kaj te na šunen o čačipen? Sem avka tumen mištes ľikerenas le čačipnastar.*
8 Ala lava, savenca oda keren, nane le Devlestar, savo peske tumen kidel avri.
9 Čepo* kvasos kerel, hoj calo chumer avel upre.
10 Som mange isto, hoj tumen, so san zajekh le Rajeha, pre oda tiš avka dikhen. Aľe koda, ko tumen diliňarel, chudela ajso trestos, savo majinel te chudel. Hin jekh ko oda hin.
11 Phralale, te hin čačipen, hoj mek furt vakerav pal oda, hoj pes kampel te del te občhinel, ta akor soske pre ma aver džan? Te ada uľahas čačipen, ta bi ňikaske na kerďahas choľi ada, hoj vakerav pal oda, hoj o Ježiš muľa pro drukos.*
12 Kamľomas, kaj ola, so tumenge na den smirom kaleha, hoj pes kampel te del te občhinel, kaj on peske te keren mek vareso goreder.*
13 Phralale, o Del tumen kidňa avri, kaj te na en otroka. Aľe ma len oda avka, hoj akana imar šaj keren oda, pre soste tumen cirden tumare ťeli. Mi cirdel tumen o kamiben, kaj jekh avreske te pomožinen.
14 Sem sa, so hin pisimen andro Zakonos, šaj phenas kale lavenca: „Rado dikheha avres sar pes korkores.“
15 Aľe te tumen maškar tumende furt ča chan a džan pre tumende, ta den pozoris, kaj tumen oda čačes jekhvar te na murdarel.
16 Phenav tumenge: Te domukhena, kaj tumen te ľidžal le Devleskero svato duchos, ta na kerena oda, so kamel tumaro binošno ťelos.
17 Bo oda, pre soste cirdel o ťelos, džal proťi oda, so kamel le Devleskero svato duchos. A oda, so kamel le Devleskero svato duchos, džal proťi oda, so kamel o ťelos. Ala duj džan proťi peste a vaš oda tumen na keren oda, so bi kamenas te kerel.
18 A mek ke ada, te tumen ľidžal le Devleskero svato duchos, ta na san tel o Zakonos.
19 O manuša, save keren oda, so kamel lengero ťelos, keren ala bare nalačhipena a dičhol oda andre kada: keren lubipen,* dojekh džungaľipen, binos bije ladž,*
20 hine modlara, keren zviki, save hine spojimen le demonenca,* džan pre peste, keren pes,* žjarľinen, chan bari choľi, rušen, hin maškar lende vesekedišagi,* džan pal o manuša, save sikhľaren vareso aver,
21 zavidzinen peske, maťuvkeren, phiren odoj, kaj pes zabavinen bije ladž* a mek aver. Avka sar akor, the akana tumenge phenav, kaj tumenge te den baro pozoris. Bo ola, so ada keren, na dživena andre Devleskero kraľišagos.
22 Aľe te le manušen ľidžal le Devleskero svato duchos, ta hine ajse: presikaven kamiben, hin len radišagos, smirom, džanen te užarel, hine jileskere, hin len igen lačho jilo, presikaven paťaviben,
23 džanen te ačhel pokojna a džanen pes te zľikerel. Proťi ada nane ňisavo zakonos.
24 Ola, so hine le Ježišoskere Kristoskere učeňika, pestar odčhide* oda nalačho, oda, pre soste len cirdenas lengere ťeli.
25 Te dživas pal oda sar amen ľidžal le Devleskero svato duchos, ta keras the dureder avka sar amen ada Devleskero duchos ľidžal.
26 Na kamas amenge pal amende te mišľinel buter sar kampel, na keras ňič, kaj amen maškar peste te prekidkeras, hoj ko hino feder a na zavidzinas amenge.
Poznamki tele čijarkica
^ Doslovňe: spravodliva. Dikh tuke buter adaj andro Slovňikos.
^ Doslovňe: lačhes prastanas (denašenas).
^ Abo sikra, jegnaj, čuno.
^ Dikh tuke buter adaj andro Slovňikos.
^ Abo kaj pes den te vikastrinel, mi ačhen lendar evnuchi. Avka bi imar našťi doľikerenas oda zakonos, pal savo lenge avka džalas.
^ Po grecki porneia. Dikh tuke buter adaj andro Slovňikos.
^ Po grecki aselgeia. Dikh tuke buter adaj andro Slovňikos.
^ Dikh tuke buter adaj andro Slovňikos o lav špiritizmus.
^ Abo halasinen, vesekedinen, hadinen.
^ Abo hadišagi.
^ Oda hin: pijel pes odoj but, kerel pes odoj lubipen.
^ Doslovňe: primarde pro drukos.
