Galaťanenge 6:1-18
6 Phralale, te dikhen, hoj vareko aňi na džanel sar, aľe dochudľa pes pro nalačho drom, ta tumen, save san zorale andro paťaviben, keren predal ada savoro, kaj pes pale te visarel pro lačho drom. Sar ada kerena, aven paš ada jileskere a den tumenge pozoris, kaj tumen korkoren ada nalačhipen te na scirdel.
2 Pomožinen jekh avreske, sar predživen o pharipena. A avka doľikerena oda, so hin phendo andre Kristoskero zakonos.
3 Aľe te peske vareko mišľinel, hoj pre leste nane a čačipen hin, hoj hino ňiko, ta ča klaminel pes korkores.
4 Sako mi rozmišľinel pal oda, so ov kerel. Paľis na dikhela pre oda, so kerel vareko aver, aľe radisaľola olestar, so ov korkoro kerel.
5 Dojekh manuš mušinel te kerel oda, so lestar o Del užarel.
6 Koda, kas sikhľaren andal o Devleskero lav, jilestar mi davkerel olestar, so les hin oles, ko les sikhľarel.
7 Ma den tumen te zdiliňarel: Le Devleha peske ňiko na kerela. So o manuš sadzinel, oda the skidela upre.
8 Bo ko kerel oda, so kamel leskero ťelos, chudela vaš kada o meriben. Aľe ko kerel oda, so kamel le Devleskero svato duchos, ta koda kale Devleskere duchostar chudela o dživipen pro furt.
9 Na preačhas te kerel o lačhipen. Bo te amen na vzdaha, ta andro časos, savo diňa o Del, skidaha upre e uroda.
10 Vaš oda, medik* amen hin mek časos, keras lačhipen savorenge, aľe nekbuter amare phralenge the pheňenge, saven hin odi isto vjera sar the amen.
11 Ča dikhen, save bare pismenkenca tumenge pisinav ada ľil.
12 Savore, save pre tumende ispiden, kaj tumen te den te občhinel, pes ča guľaren le manušenge. Keren oda, bo na kamen, kaj pre lende te džan vaš oda, hoj vakeren, hoj o Kristus muľa pro drukos.*
13 Sem aňi ola, save pes den te občhinel, na doľikeren o Zakonos. Džal lenge ča pal oda, kaj pes te ašaren oleha, so tumen kerďan peskere ťelenca.
14 Aľe me man na kamav te ašarel ňisoha. Ča oleha, hoj amaro Raj o Ježiš Kristus muľa pro drukos.* Oda, hoj o Ježiš muľa, kerďa, hoj me dikhav pro svetos avka, hoj hino odsudzimen pro meriben. A o svetos pre ma avka dikhel, hoj me som odsudzimen pro meriben anglo* Ježiš.
15 Na džal pal oda, či hino vareko občhindo abo na. Aľe džal pal oda, či tumendar o Del kerel neve manušen.
16 Mi el smirom andro jilo a mi el o Del kovlejileskero ke sakoneste, save šunen ala lava. Mi el ada savoren, save patrinen andro Devleskero Izrael.
17 Pre miro ťelos hin man vareso ajso, so sikavel, hoj som le Ježišoskero otrokos. Vaš oda akanastar na kamav, kaj vareko proťi mande vareso te phenel.
18 Phralale, mi del tumen amaro Raj o Ježiš Kristus but peskere bare lačhipnastar vaš oda, save san. Amen.
Poznamki tele čijarkica
^ Abo pokim.
^ Dikh tuke buter adaj andro Slovňikos.
^ Dikh tuke buter adaj andro Slovňikos.
^ Abo vaš, bijal, aščal, predal.
