Kada pisinďa o Lukaš 12:1-59
-
O kvasos, savo hino andro farizeja (1 – 3)
-
Te daral le Devlestar, na le manušendar (4 – 7)
-
Te na ladžal pes vaš o Ježiš anglal o manuša (8 – 12)
-
O priklados pal jekh dilino barvalo murš (13 – 21)
-
Te na kerel peske až kajso pharo šero pal o dživipen (22 – 34)
-
Pal o cikno stadocis (32)
-
-
Te užarel a te na zasovel (35 – 40)
-
Pal o verno sluhas the pal o sluhas, savo na ačhiľa verno (41 – 48)
-
Na o smirom, aľe kaj o manuša pre peste te džan (49 – 53)
-
Te achaľol, andre save ďivesa dživas (54 – 56)
-
Te el lačho oleha, ko tut kamel te del pro sudos (57 – 59)
12 Akor pes odoj zgele ajci but manuša, hoj až avren aravenas.* O Ježiš pes peršo visarďa ke peskere učeňika a phenďa lenge: „Den tumenge pozoris pro kvasos, savo hin andro farizeja, bo hine dujemujengere.
2 Oda, so hino garudo, avela avri. A pal soste ňiko na džanel, pes dodžanela.
3 Oda, so phenav ča tumenge, vakerena savorenge. A oda, so phenena cichones andre tumaro kher, pes vakerela zorales savore manušenge.
4 Tumenge, so san pašes mire jileske, phenav: Ma daran olendar, so tumen šaj murdaren, aľe buter našťi keren ňič.
5 Phenav tumenge, kastar majinen te daral: Daran le Devlestar, bo les hin zor na ča tumen te murdarel, aľe šaj tumen čhivel the andre gehena.* Phenav tumenge, lestar tumen daran.
6 Na bikenen pes pandž vrabci vaš o duj churde?* Aľe aňi pre jekh lendar o Del na bisterel.
7 Aľe tumenge hine zgende the savore bala pro šero. Ma daran tumen, bo tumen mon buter andre Devleskere jakha sar o vrabci.
8 Phenav tumenge: Dojekh, ko pes vaš ma na ladžal anglal o manuša, ta aňi o Čhavo le manušeskero* pes vaš leske na ladžala anglal o Devleskere aňjela.
9 Aľe ko pes vaš ma ladžal a phenel, hoj man na prindžarel, pal koda the me phenava anglal o Devleskere aňjela, hoj les na prindžarav.
10 Oleske, ko vakerel proťi Čhavo le manušeskero, ela odmukhlo. Aľe oleske, ko vakerel proťi svato duchos, leske odmukhlo na ela.
11 Sar tumen anena anglal o but manuša, save tumendar savoro phučkerena the anglal o bare šere, ma keren tumenge pharo šero oleha, so vakerena.
12 Bo le Devleskero svato duchos tumenge akor leperela, so majinen te phenel.“
13 Akor leske vareko le manušendar phenďa: „Učiťeľina, amaro dad muľa. Phen mire phraleske, kaj pes manca te rozďeľinel oleha, so pal leste ačhiľa.“
14 O Ježiš leske phenďa: „More, ko man thoďa upral tumende sar sudcas, kaj te phenav, so a keci kaske ačhela?“
15 Paľis lenge phenďa: „Den tumenge pozoris a chraňinen tumaro jilo, kaj te na el hamišno a te na kamel but. Bo choč hin le manušes but barvaľipen, oda leske na anela o dživipen pro furt.“
16 Paľis lenge phenďa priklados: „Jekh barvalo murš skidňa igen but uroda.
17 Avka peske phenďa: ‚So kerava? Sem nane man ada savoro kaj te thovel.‘
18 Aľe paľis peske phenďa: ‚Kerava kada: aravava* mire šopi, kerava bareder a odoj thovava o žužoďiv* the miri savori lačhi uroda.
19 A phenava mange: „Hin tut but chaben pro but berša. Ma ker ňič, ča cha, pi a radisaľuv.“‘
20 Aľe o Del leske phenďa: ‚Tu dilino! Mek adi rat mereha. Ta kaske ačhela kada savoro, so skidňal?‘
21 Avka doperela dojekh, ko skidel predal peste but barvaľipen, aľe nane barvalo andre Devleskere jakha.“
22 Paľis pes o Ježiš visarďa ke peskere učeňika: „Vaš oda tumenge phenav: Ma keren tumenge až kajso pharo šero pal tumaro dživipen, pal koda, so chana, abo pal koda, so pre tumende urena.
23 Sem o dživipen hino buter sar o chaben the sar o uraviben.
24 Dikhen pro vrani: na sadzinen aňi na skiden upre, aňi peske oda ňikhaj na garuven. Aľe o Del len the avka čaľarel. Či tumen na san buter predal o Del sar o čirikle?
25 Ko tumendar dživela buter kaleha, hoj peske kerela pharo šero?
26 Te našťi keren aňi kada, ta akor soske peske te kerel pharo šero pal o uraviben the pal o chaben?
27 Dikhen sar baron o kvitki pre maľa: na keren ňisavi phari buťi aňi peske na sivkeren o uraviben. Aľe phenav tumenge, hoj aňi o Šalamun andro calo peskero rajipen na sas avka urdo sar jekh ale kvitkendar.
28 Te o Del avka urel le kvitken pre maľa, save adaďives hine adaj a tajsa len čhivena andro bov, o so buter rado urela tumen. Oda tumen oleske avka slabones paťan?
29 Ma dikhen pre oda, so chana abo so pijena a ma keren tumenge alestar igen pharo šero.
30 Bo pal kada savoro džan o manuša andro svetos. Tumaro ňebesko Dad igen mište džanel, hoj tumenge kada savoro kampel.
31 Vaš oda den pro peršo than le Devleskero kraľišagos a ov tumen dela savoro, so tumenge kampela.
32 Ma dara tut, cikno stadocis, bo tumaro Dad ela igen rado, te tumenge dela o kraľišagos.
33 Bikenen savoro, so tumen hin a o love rozden le čorenge. Keren tumenge žebici* pro love, save na čhingersaľona, oda hin o barvaľipen andro ňebos, savo ačhela pro furt a ňiko tuke les na čorela. Odoj pes na dochudela o zloďejis aňi les na chana o kirme.
34 Bo oda, so hino predal tute baro, pal koda džala tiro jilo.
35 Uren pre tumende e leketa a tumare lampi mi labon.
36 Aven sar o manuša, save užaren pre peskero raj, savo majinel te avel pal o bijav, kaj leske takoj te phuteren* o vudar, sar avela a zadurkinela.
37 Bachtale hine ola sluhi, saven sar o raj avela, na arakhela te sovel! Phenav tumenge, urela pre peste e leketa, vičinela len ko skamind, avela ke lende a kerela khatar lende.
38 Ena bachtale, te avela khatar o 9 ori dži jepaš rat abo khatar o jepaš rat dži trin ori tosara a arakhela len sar pre leste užaren!
39 Aven tumenge ista, hoj te bi o chulaj džanelas, kana raťi avela o zloďejis, ta bi leske na domukhľahas, kaj te avel andro kher.
40 Vaš oda the tumen, aven pripravimen, bo o Čhavo le manušeskero avela akor, sar oda na užarena.“
41 O Peter lestar phučľa: „Rajeja, vakeres ada priklados ča amenge abo savorenge?“
42 O Raj phenďa: „Ko hino koda verno the goďaver sluhas, saves leskero raj thovela upral savore peskere služobňika, kaj lenge te del ajci chaben keci kampel a akor kana kampel?
43 Oda sluhas ela bachtalo, sar avela leskero raj a dikhela les, hoj oda kerel.
44 Phenav tumenge, thovela les upral calo peskero majetkos.
45 Aľe te bi peske koda sluhas andro jilo phenelas: ‚Miro raj mek na avel‘ a vaš oda bi chudelas te marel le sluhen the le služken, chalas bi, pijelas a maťuvkerelas.
46 Leskero raj avela oda ďives, savo o sluhas na užarela a oratar, savatar na džanel. Koda sluhas lestar chudela nekbareder trestos a čhivela les maškar ola, so na šunen le Devles.
47 Ole sluhas, savo džanelas, so kamel leskero raj, aľe na užarelas les a na kerelas oda, so o raj kamelas, igen marena.
48 Aľe o sluhas, savo na džanelas, so lestar kamel o raj a kerelas ajso, vaš soske les kampel te marel, ta les marena frimeder.* Kaske sas thodo buter pro šero, lestar pes užarela, hoj kerela savoro mište. A kaske sas dino andro vasta but, lestar o manuša užarena, hoj ada savoro kerela so nekfeder.
49 Avľom, kaj pre phuv te zalabarav e jag. A so mek buter šaj kamav, te imar labol?
50 Aľe hin adaj mek jekh baro pharipen,* saveha mange mušinav te predžal. A sar mange alestar skikidel o jilo, medik* pal kada na ela!
51 Mišľinen tumenge, hoj avľom, kaj pre phuv te anav o smirom? Phenav tumenge, na o smirom, aľe kada, kaj o manuša pre peste te džan.
52 Akanastar pandž manuša andal o jekh kher džana proťi peste: trin proťi duj a duj proťi trin.
53 O dad džal proťi o čhavo, o čhavo proťi o dad, e daj proťi e čhaj, e čhaj proťi e daj, e sasuj proťi e bori a e bori proťi e sasuj.“
54 Paľis pes o Ježiš visarďa ko manuša a phenďa: „Sar dikhen, hoj avel e chmara pal e zapadno sera, takoj vakeren: ‚Avela bari balvaj le brišindeha.‘ A kavka oda the ela.
55 A sar phurdel e balvaj pal o juhos, vakeren: ‚Aven bare keraďipena.‘ A the aven keraďipena.
56 Tumen dujemujengere! Te dikhel pre phuv the pro ňebos, či dela brišind abo ela tates, oda džanen te phenel. Ta akor soske na džanen te achaľol, andre save ďivesa dživen?
57 Sar oda, hoj na džanen te phenel, so majinen te kerel?
58 So neksigeder av pale lačho oleha, so tut kamel te del pro sudos a oda mek sar džan le dromeha odoj. Kaj tut ov te na del andro vasta le sudcaske a ov le stražňikoske, savo tut thovela andre harešta.
59 Phenav tuke, na aveha odarig avri, medik na deha pale savore love,* so kames.“
Poznamki tele čijarkica
^ Abo hoj až pal peste uštarenas.
^ Dikh tuke buter adaj andro Slovňikos.
^ Doslovňe: vaš o duj asa. Dikh o dodatkos B14.
^ Dikh tuke buter adaj andro Slovňikos.
^ Abo čhivava tele, zburinava.
^ Abo e pšeňica.
^ Doslovňe: meščos.
^ Abo te phundraven, te odkeren.
^ Abo čepeder, čuneder.
^ Doslovňe: hin adaj boľipen.
^ Abo pokim.
^ Doslovňe: dži o posledno leptos. Dikh o dodatkos B14.
