Kada pisinďa o Lukaš 15:1-32
15 Savore, so kidkerenas avri o daňi the ola, so kerenas bare bini, avenas ko Ježiš, kaj te šunen, so vakerel.
2 Le farizejenge the olenge, so sikhľaren andal o zakonos, oda na sas pre dzeka a pale chudne proťi leste te vakerel: „Kada manuš hino lačho le binošnenca a jekhetane lenca chal.“
3 Vaš oda lenge o Ježiš phenďa kada priklados:
4 „Te hin varekas tumendar 100 bakrore a jekh lendar našľola, či na mukhela ole 99 pre pušťa a na džala te rodel ole jekhes, savo našľiľa, medik* les na arakhela?
5 A sar les arakhel, radisaľol olestar a thovel peske les pro phike.*
6 Soča avela khere, vičinela peske peskere kamaraten the olen, so paš leste bešen a phenela lenge: ‚Radisaľon manca, bo arakhľom mire bakrores, savo našľiľa.‘
7 Phenav tumenge, hoj avka isto ela bareder radišagos andro ňebos jekhe manušestar, so kerel bare bini a bajinel oda nalačho, so kerel, sar ole 99 manušendar, save keren oda, so hino lačho andre Devleskere jakha a na mušinen te bajinel vaš peskere bini.
8 Abo te varesava džuvľa hin 10 drachmi* a jekh lendar našľola, či na zalabarela e lampa, na šulavela o kher a na prerodela savoro, medik la na arakhela?
9 A sar la arakhela, vičinela peskere kamaratken the le romňijen, save paš late bešen a phenela lenge: ‚Radisaľon manca, bo arakhľom e drachma,* savi našaďom.‘
10 Phenav tumenge, hoj avka istones radisaľon le Devleskere aňjela jekhe manušestar, savo kerel bare bini, aľe bajinel oda nalačho, so kerel.“
11 Paľis lenge o Ježiš phenďa: „Jekhe manušes sas duj terne murša.
12 Oda terneder phenďa le dadeske: ‚Dado, de mange oda, so hino miro.‘ Avka o dad diňa soduje čhavenge oda, so majinďa te el lengero.
13 Pal varesave ďivesa peske o terneder čhavo iľa savoro, so sas leskero a geľa dur andre aver phuv. Odoj dživelas mulatošno dživipen a rozkerďa sa, so les sas.
14 Sar savoro rozkerďa, andre caľi odi phuv sas bari bokh a the ov chudňa te bokhaľol.
15 Geľa a mangľa pes andre buťi ke jekh murš, savo odoj bešelas. Ov les bičhaďa pre peskeri maľa, kaj te kerel khatar* o baľičhe.
16 Igen kamelas te chal o chaben, savo chanas o baľičhe. Aľe mek aňi oda les ňiko na delas te chal.
17 Sar ke peste avľa, phenďa peske: ‚Le dadeskere robotňiken hin ajci but mare a me adaj chav bokh!
18 Ušťava, džava pal o dad a phenava leske: „Dado, kerďom baro binos anglo Del* the angle tute.
19 Imar na som hodno, kaj mange te phenes, hoj som tiro čhavo. Le man andre buťi sar tire robotňikos.“‘
20 Avka ušťiľa a geľa ko dad. O dad les imar dural dikhľa a avľa leske pre leste pharo. Denašľa ke leste, chuťiľa leske andre meň a čumidľa les.
21 O čhavo leske phenďa: ‚Dado, kerďom baro binos anglo Del* the angle tute. Imar na som hodno, kaj mange te phenes, hoj som tiro čhavo.‘
22 Aľe o dad phenďa peskere otrokenge: ‚Siďaren a anen oda nekfeder uraviben a uren pre leste. Thoven leske pro angušto angrusťi a uren pre leste o sandalki.
23 Anen ola nekfeder terňa gurumňora a murdaren la. Chas a mulatinas,
24 bo kada miro čhavo sas sar te bi mulo, aľe odžiďiľa. Sas našado, aľe avľa pale.‘ A chudne te mulatinel.
25 O phureder čhavo sas akor pre maľa. Sar avelas a sas imar pašeder ko kher, šunďa o giľa a dikhľa sar khelen.
26 Vičinďa peske jekhe sluhas a phučľa lestar, so pes kerel.
27 Ov leske phenďa: ‚Avľa tiro phral. A vaš oda, hoj avľa pale džido the sasto,* ta tiro dad diňa te murdarel ola nekfeder terňa gurumňora.‘
28 Aľe ov choľisaľiľa a na kamľa te džal andre. Avka leskero dad avľa avri a mangelas les, kaj te avel andre.
29 O čhavo leske phenďa: ‚Ajci berša paš tu kerav buťi sar otrokos a šunav tut andre savoreste. Aľe ňigda man na diňal mek aňi kozica, kaj te chav a te pijav le kamaratenca.
30 Aľe sar avľa kada tiro čhavo, savo rozkerďa sa, so les diňal le džungale džuvľijenca,* ta murdarďal predal leste ola nekfeder terňa gurumňora.‘
31 O dad leske phenďa: ‚Mro čho, tu sal furt manca a savoro, so man hin, hino tiro.
32 Aľe amen mušinďam te mulatinel a te radisaľol. Bo tiro phral sas sar te bi mulo, aľe odžiďiľa. Sas našado, aľe avľa pale.‘“
Poznamki tele čijarkica
^ Abo pokim.
^ Abo pro vali.
^ Dikh o dodatkos B14.
^ Dikh o dodatkos B14.
^ Abo pašal o bale.
^ Doslovňe: proťi o ňebos.
^ Doslovňe: proťi o ňebos.
^ Abo zdravo.
^ Doslovňe: le prostitutkenca.
