Kada pisinďa o Lukaš 17:1-37
17 Paľis o Ježiš phenďa peskere učeňikenge: „O manuša kerena, hoj butdžene odperena le paťavibnastar. Kaleske pes na dela te obdžal. Aľe vigos* le manušeske, savo vaš kada ela vinovato.
2 Predal koda dženo uľahas feder, kaj leske te thodehas pre meň baro bar a čhidehas les andro moros, sar te bi majinelas jekhe kale ciknorendar, so andre ma paťan, te anel ke oda, hoj odperela le paťavibnastar.
3 Den tumenge pozoris! Te tiro phral kerela varesavo binos, dophen leske a te oda bajinela, odmukh leske.
4 Choč bi tuke kerelas 7-var pro ďives dukh a 7-var pro ďives avela pal tu a phenela: ‚Hin mange oda pharo,‘ odmukheha leske.“
5 O apoštola phende le Rajeske: „Ker, kaj buter te paťas.“
6 Akor lenge o Raj phenďa: „Te bi tumen elas paťaviben baro sar horčično semjačkos, ta bi phenenas kale stromoske:* ‚Av avri the le koreňenca a sadzin tut andro moros!‘ a šunelas bi tumen.
7 Sar tumaro otrokos avela pal e maľa, kaj orinelas abo pasinelas, ko tumendar leske phenela: ‚Av, takoj beš khatar* o skamind‘?
8 Či leske sigeder na phenena: ‚Ker mange o chaben, uri pre tute e leketa a ker khatar ma, medik* na chava a na pijava a paľis šaj chas the pijes tu‘?
9 Paľikerena le otrokoske vaš oda, hoj kerďa oda, so majinďa?
10 Avka the tumen. Sar kerena savoro, so tumenge sas dino andro vasta, phenena: ‚Sem sam ča otroka, saven na kampel te ašarel. Kerďam ča oda, so majinďam te kerel.‘“
11 Le dromeha andro Jeruzalem o Ježiš predžalas maškar e Samarija the Galileja.
12 Sar o Ježiš geľa andre jekh gavoro, dikhle les 10 malomocna. Terďonas nadur lestar
13 a vičinenas: „Ježiš, Učiťeľina, mi el tuke pre amende pharo!“
14 Sar len o Ježiš dikhľa, phenďa lenge: „Džan a sikaven tumen le rašajenge.“ A sar le dromeha džanas, sas sasťarde.*
15 Soča jekh lendar dikhľa, hoj hino sasťardo, avľa pale a zorale hlasoha ašarelas le Devles.
16 Peľa le Ježišoske paš o pindre a paľikerelas leske. Ov sas Samaritanos.
17 O Ježiš phučľa: „Na sas sasťarde 10 džene? Ta kaj paľis hine ola aver 9 džene?
18 Na arakhľa pes ňiko aver, ča kada murš andal aver narodos, kaj te avel pale a te ašarel le Devles?“
19 Phenďa leske: „Ušťi a dža! Tiro paťaviben tut sasťarďa.“
20 Sar le Ježišostar o farizeja phučle, kana avela le Devleskero kraľišagos, phenďa lenge: „Le Devleskero kraľišagos na avela avka, kaj les savore te dikhen.
21 Aňi o manuša na phenena: ‚Dikhen, adaj hino!‘ abo ‚Odoj hino!‘ Bo le Devleskero kraľišagos hino maškar tumende.“
22 Paľis o Ježiš phenďa le učeňikenge: „Avena ajse ďivesa, sar kamena, kaj tumenca te el o Čhavo le manušeskero,* aľe oda pes na dela.
23 A o manuša tumenge phenena: ‚Dikhen, odoj hino!‘ abo ‚Dikhen, adaj hino!‘ Ňikhaj pal ajse manuša ma džan aňi ma prastan.*
24 Bo avka sar o bleskos rozšvicinel calo ňebos jekhe agorestar dži po aver, avka oda ela le Čhaha le manušeskereha, sar avela leskero ďives.
25 Aľe peršo peske mušinela igen but te cerpinel avri a te zadživel oda, hoj les ala manuša na prilena.
26 Avka sar pes dživelas andro ďivesa paš o Noe, avka istones ela andro ďivesa, sar avela o Čhavo le manušeskero:
27 o manuša chanas, pijenas, o murša lenas romňen, o romňa džanas romeste dži oda ďives, sar o Noe geľa andro korabos. A avľa e potopa a savore mule.
28 Avka istones sas, sar dživelas o Lot: o manuša chanas, pijenas, cinkerenas, bikenkerenas, sadzinenas a kerenas o khera.
29 Aľe oda ďives, sar o Lot geľa het andal e Sodoma, andal o ňebos perelas e jag the e sira a savore mule.
30 Avka istones ela oda ďives, sar avela o Čhavo le manušeskero te sudzinel le manušen.
31 Ko ela koda ďives pro pados* le khereske, te na avel tele andro kher, kaj peske vareso te lel. Aňi ko ela pre maľa, te na avel pale peske vareso te lel.
32 Leperen tumenge pre Lotoskeri romňi.
33 Ko peske kamel te zachraňinel o dživipen, merela. Aľe ko merela, dživela pale.
34 Phenav tumenge, hoj odi rat ena duj džene pre jekh haďos: jekhes odarig lena a avres odoj mukhena.
35 Duj džeňa erňinena* o aro: jekha odarig lena a avra odoj mukhena.“
36 *——
37 O učeňika phučle le Ježišostar: „Kaj, Rajeja?“ Phenďa lenge: „Odoj, kaj hino mulo kirno mas, odoj pes zdžana o orli.“
Poznamki tele čijarkica
^ Abo koňec.
^ Doslovňe: la morušake.
^ Abo pašal.
^ Abo pokim.
^ Abo uzdravimen.
^ Dikh tuke buter adaj andro Slovňikos.
^ Abo ma denašen.
^ Abo pro dachos, pre strecha.
^ Abo melinena.
^ Dikh o dodatkos A3.
