So dikhľa o Jan – Zjaveňe 13:1-18
13 O drakos terďolas pre poši paš o moros avka, hoj peha aňi na hibinelas.
Akor dikhľom sar andal o moros avel avri dzivo zvjeratos, saves sas 10 rohi the 7 šere. Pre dojekh rohos les sas 10 korunki* sar kraľen a pro šere les sas meni, savenca rakinenas le Devleske.
2 Oda dzivo zvjeratos, so dikhľom, dičholas sar leopardos. Aľe o labi les sas sar medveďis a o piskos sar ľevos. O drakos diňa le dzivone zvjeratoske peskeri zor, peskero tronos a bari zor, kaj te vladňinel.
3 Jekh leskere šerendar sas avka prečhindo, hoj dičholas, hoj maj merela. Aľe kadi rana pes zacirdňa. Caľi phuv igen kerelas pal o dzivo zvjeratos a džalas pal leste.
4 Banďonas anglal o drakos, bo diňa le dzivone zvjeratoske peskeri zor, kaj te vladňinel. Tiš banďonas anglal o dzivo zvjeratos a vakerenas: „Ko pes šaj čhivkerel ko dzivo zvjeratos a ko pes leha šaj marel?“
5 O dzivo zvjeratos chudľa zor te ašarel pes a te vakerel džungales proťi o Del. A tiš chudľa zor, kaj peske te kerel, so kamel 42 čhona.
6 Chudňa džungales te rakinel le Devleske, leskere menoske. Džungales vakerelas proťi oda than, kaj bešel o Del a proťi ola, so bešen andro ňebos.
7 A le dzivone zvjeratoske sas domukhlo, kaj pes te marel le svatonenca a te vihrajinel upral lende. A chudľa zor, kaj te vladňinel upral o manuša andal savore kmeňi, rasi, čhiba the narodi.
8 Služinena leske savore manuša pre phuv. Akorestar sar sas kerde perša manuša, ta aňi jekheskero menos nane pisimen andre Barankoskeri kňižka, saves murdarde. Andre kadi kňižka hine pisimen o meni olengere, save dživena.
9 Sako mište mi šunel.
10 Ko majinel te el phandlo andre, ela phandlo andre. Ko murdarel la šabľaha, mušinel te el murdardo la šabľaha. Vaš oda o svata mušinen te ľikerel avri a mušinen te presikavel o paťaviben.
11 Paľis dikhľom aver dzivo zvjeratos sar avel avri andal e phuv. Sas les duj rohi sar le barankos, aľe vakerelas sar drakos.
12 Hin les kodi isto zor, savi hin ole peršone dzivone zvjeratos a sikavel la anglal leskere jakha. Ispidel le manušen pre phuv, kaj te ašaren ole peršone dzivone zvjeratos, saveske sas jekh le šerendar prečhindo a dičholas, hoj maj merela. Aľe leskeri rana pes zacirdňa.
13 Kerel bare znameňa anglal o manuša. Mek až kerel, kaj te avel andal o ňebos e jag pre phuv.
14 Ala znameňa leske sas domukhle te kerel anglal o dzivo zvjeratos. A lenca klaminel le manušen, so dživen pre phuv. Vakerel lenge, kaj te keren socha le dzivone zvjeratoske, saves sas rana la šabľatar, aľe avľa ke peste.
15 Sas leske domukhlo, kaj te del o dživipen* le dzivone zvjeratoskera sochake, kaj šaj vakerel a del te murdarel savoren, ko lake na kamel te služinel.
16 Ispidel pre savore manuša, cikne či bare, barvale či čore, slobodna či otroka, kaj te prilen o znakos pro pravo vast abo pro čekat.
17 Ňiko, kas nane kada znakos, našťi cinkerel abo bikenkerel. Kada znakos hin o menos le dzivone zvjeratoskero abo o čislos, savo sikavel pre leskero menos.
18 Ko sig achaľol, ta mi zgenel o čislos le dzivone zvjeratoskero, bo kada čislos sikavel pro manuša. Kada čislos hino 666. Ča koda, kas hin goďi, achaľola.
