So dikhľa o Jan – Zjaveňe 19:1-21
19 Paľis šunďom zoralo hlasos sar te bi but aňjelendar andro ňebos. Zvičinde: „Ašaren le Jah!* Amaro Del zachraňinel le manušen a hin les bari zor the rajipen.
2 Sar varekas sudzinel, kerel oda pal o čačipen a the spravodlivones.* Sem čhiďa tele la bara prostitutka, savi džungľarďa le manušen peskere lubipnaha* a diňa lake pale vaš oda, hoj murdarďa leskere otroken, bo lengero rat sas lake pro vasta.“
3 Takoj pal oda zvičinde dujtovar: „Ašaren le Jah!* O thuv andal late džal avri pro furt.“
4 Akor o 24 phuredera the o štar cherubina* pele pro khoča,* banďonas anglal o Del, savo bešel pro tronos a vičinenas: „Ašaren le Jah!* Amen!“
5 Khatar o tronos šunďiľa hlasos: „Ašaren amare Devles, tumen savore leskere otroka, save lestar daran, či san čore abo barvale.“
6 Šunďom sar bi hlasos but aňjelendar, savo šunďolas sar te bi hučindehas but paňa a sar te bi zorales hrminďahas. Phende: „Ašaren le Jah,* bo o Jehovas,* amaro Nekbareder Del, vladňinel sar kraľis!
7 Avas barikane, igen radisaľuvas a ašaras les, bo avľa o časos, kaj te el le Barankoskero bijav a leskeri terňi imar ča užarel.
8 Šaj pes urďa andro žužo* uraviben, savo demel andro jakha a sas sido le rajikane pochtanestar.* A kada rajikano pochtan sikavel pre oda, hoj o svata kerenas oda, so hino lačho andre Devleskere jakha.“
9 O aňjelos mange phenďa: „Pisin: Bachtale hine ola, save hine vičimen pro Barankoskero bijav.“ Mek phenďa: „Kale lavenge le Devlestar šaj paťas.“
10 Akor leske peľom paš o pindre, kaj leske te služinav. Aľe ov mange phenďa: „So keres! Kada ma ker! Som ča kajso otrokos sar tu the tire phrala, save vakeren čačipen pal o Ježiš. Služin le Devleske! Bo o proroctva hine pre kada, kaj pes te vakerel čačipen pal o Ježiš.“
11 Dikhľom phundrado* ňebos the parne grajes. Oda, savo pre leste bešelas, pes vičinel Verno the koda, savo vakerel čačipen. Ov sudzinel a marel pes spravodlivones.
12 O jakha leske labon sar bari jag a pro šero les hin but koruni.* Hin pre leste pisimen menos, savo na džanel ňiko, ča ov korkoro.
13 Hino urdo andro uraviben, savo hino zakerdo le ratestar a leskero menos hin le Devleskero Lav.
14 Pal leste džanas o aňjela* pro parne graja urde andro parno žužo rajikano pochtan.
15 Andal o muj leske avel avri bari ostro šabľa, kaj laha te murdarkerel le naroden a vladňinela upral lende la trastuňa paľicaha. Phirel odoj, kaj pes rozpučinel o hroznos. Ada than sikavel pre choľi, so hin le Nekbaredere Devles.
16 Pre leskero uraviben upre pre čhang les hin pisimen menos: Kraľis le kraľengero the o Raj le rajengero.
17 Dikhľom the ajse aňjelos, savo terďolas andro kham a zorale hlasoha zvičinďa pre savore čirikle, save ľecinenas pro ňebos: „Aven tumen savore, le Devles hin predal tumende but chaben,
18 kaj te chan o mule ťeli le kraľengere, olengere, so hine upral o slugadža, le zorale muršengere, le grajengere the olengere, so bešen pre lende, o teľi savorengere, so hine slobodna, otroka, čore the barvale.“
19 Dikhľom dzivone zvjeratos the le kraľen pal e phuv a lengere slugadžen sar pes zgele andro mariben proťi koda, savo bešel pro graj the proťi leskere aňjela.*
20 Koda, savo bešelas pro graj, chudľa le dzivone zvjeratos the le falošnone prorokos, savo anglal leste kerelas znameňa, savenca scirdľa olen, so priile o znakos le dzivone zvjeratoskero the olen, so presikaven nekbareder paťiv leskera sochake. Medik* o dzivo zvjeratos the o falošno prorokos dživenas, sas čhide andro paňi, kaj labolas igen zoraľi jag.
21 Averdžene sas murdarde bara šabľaha, savi avel avri andal o muj oleske, savo bešel pro graj. A savore čirikle čaľile lengere mule ťelendar.
Poznamki tele čijarkica
^ Abo Aleluja! (andal o hebrejiko lav halelujah), Jah hino charneder menos le Devleskere menostar Jehova.
^ Dikh tuke buter adaj andro Slovňikos.
^ Po grecki porneia. Dikh tuke buter adaj andro Slovňikos.
^ Abo Aleluja! (andal o hebrejiko lav halelujah), Jah hino charneder menos le Devleskere menostar Jehova.
^ Oda hin: aňjela, saven hin baro postaveňe a hine nekpašeder paš o Jehovas.
^ Abo kľončki.
^ Abo Aleluja! (andal o hebrejiko lav halelujah), Jah hino charneder menos le Devleskere menostar Jehova.
^ Abo Aleluja! (andal o hebrejiko lav halelujah), Jah hino charneder menos le Devleskere menostar Jehova.
^ Dikh o dodatkos A5.
^ Abo čisto.
^ Abo la latkatar.
^ Abo phuterdo, odkerdo.
^ Doslovňe: dijademi.
^ Doslovňe: slugadža andro ňebos.
^ Doslovňe: slugadža andro ňebos.
^ Abo pokim.
