So dikhľa o Jan – Zjaveňe 20:1-15
20 Paľis dikhľom te avel tele le aňjelos andal o ňebos. Sas leske andro vast e kľeja la bara jamatar the baro lancos.
2 Chudľa le drakos, ole peršone sapes, savo hino o Beng the o Satan a sphandľa les pro 1000 berš.
3 Čhiďa les andre bari jama, phandľa les a e jama phandľa pro kľigin,* kaj imar te na scirdel le naroden, medik* na preačhela oda 1000 berš. Paľis mušinel te el pro cikno časos mukhlo avri.
4 Dikhľom troni a olenge, so pre lende bešle, sas domukhlo te sudzinel. Dikhľom the o rat olengero, so sas murdarde,* bo vakerenas čačipen pal o Ježiš the pal o Del. Sas oda ola, so na presikavenas e nekbareder paťiv le dzivone zvjeratoske aňi leskera sochake a na priile o znakos pro čekat aňi pro vast. Odžiďile a vladňinenas le Kristoha sar kraľa 1000 berš.
5 On hine perša, save hine uštade andal o meriben. (Aver, so mule, na odžiďile, medik na pregeľa 1000 berš.)
6 Ola, so hine uštade andal o meriben sar perša, on hine bachtale the svata. O dujto meriben upral lende našťi vladňinel, aľe ena le Devleskere the le Kristoskere rašaja a vladňinena le Kristoha 1000 berš.
7 Soča predžala o 1000 berš, o Satan ela premukhlo andal e harešta.
8 Avela avri, kaj te scirdel le naroden, save hine pro soštar seri la phuvake, save pes vičinen Gog the Magog, kaj len te skidel andro mariben. Ena but sar e poši andro moros.
9 Džanas a predžanas calona phuvaha. Rozthode pes khatar* o taboris, kaj hine o svata the khatar koda foros, savo o Del rado dikhel, aľe andal o ňebos avľa e jag a zlabarďa len.
10 O Beng, savo len scirdelas, sas čhido andro paňi, savo labolas zoraľa jagaha, kaj imar sas čhido o dzivo zvjeratos the o falošno prorokos. Odoj ďives the rat igen cerpinena pro furt.
11 Dikhľom baro parno tronos a oles, so pre leste bešelas. O ňebos the e phuv lestar denašle a imar len ňigda ňiko na arakhľa.
12 Dikhľom sar anglal o tronos terďon ola, so mule, barvale the čore a sas phundrade* o zvitki. Paľis sas phundrado aver zvitkos, le dživipnaskeri kňižka. Ola, so mule, sas sudzimen pal oda, so sas pisimen andro zvitki.
13 O moros čhiďa avri olen, so mule, save sas andre leste. The o meriben a o hrobos* dine pale olen, so mule, save sas andre lende. Dojekh sas sudzimen pal oda, so kerelas.
14 Paľis koda, savo bešel pro baro parno tronos čhiďa meriben the o hrobos* andro paňi, savo labolas zoraľa jagaha. Ada sikavel, hoj merena dujtovar.
15 Tiš sako, ko na sas pisimen andre dživipnaskeri kňižka, les čhiďa andro paňi, savo labol zoraľa jagaha.
Poznamki tele čijarkica
^ Doslovňe: zapečaťinďa.
^ Abo pokim.
^ Doslovňe: murdarde le toveriha.
^ Abo pašal.
^ Abo phuterde, odkerde.
^ Doslovňe: hades. Dikh tuke buter adaj andro Slovňikos.
^ Doslovňe: hades. Dikh tuke buter adaj andro Slovňikos.
