So dikhľa o Jan – Zjaveňe 21:1-27
21 Dikhľom nevo ňebos the nevi phuv, bo o ňebos the e phuv, save varekana sas, imar nane. A na sas imar aňi o moros.
2 Dikhľom the svato foros, Nevo Jeruzalem, sar avel khatar o Del andal o ňebos, pripravimen sar terňi šukaľarďi predal peskero terno.
3 Šunďom zoralo hlasos khatar o tronos: „Dikh, le Devleskero stanos hino le manušenca. O Del bešela lenca a on ena leskere manuša. Korkoro o Del ela lenca.
4 Khosela lenge dojekh apsa pal lengere jakha a o meriben imar na ela. Na ela imar aňi e žaľa, aňi o roviben, aňi e dukh. Bo savore pharipena, so zadživahas, imar nane.“
5 Koda, savo bešel pro tronos, phenďa: „Kerav savoro nevo.“ A mek phenďa: „Pisin ala lava, bo šaj lenge paťas a hin oda čačipen.“
6 Phenďa mange: „Ačhile pes! Me som Alfa the Omega.* Dojekheske, kas šuťarel, dava hijaba* te pijel le paňestar, savo del o dživipen.
7 Ko ačhela verno, chudela kada savoro. Me leske avava Del a ov mange ela čhavo.
8 Aľe ola, soča savorestar daran, ola kas nane paťaviben, ola, so keren bare džungaľipena, ola, so murdarkeren, ola, so keren o lubipen,* ola, so keren o zviki,* save hine spojimen le demonenca, o modlara the savore klamara, ena čhide andro paňi, savo labol zoraľa jagaha. Kada sikavel pro dujto meriben.“
9 Paľis avľa jekh le 7 aňjelendar, saven sas 7 čarore pherarde poslednone 7 ranenca. Phenďa mange: „Av, sikavava tuke la terňa le Barankoskera romňa.“
10 Le Devleskera zoraha* man ľigenďa pro igen baro vrchos a sikaďa mange o svato foros o Jeruzalem sar avel tele andal o ňebos khatar o Del.
11 Ada foros igen švicinelas le Devleskere rajipnaha. Leskero švetlos sas sar nekdraheder bar, sas sar o jaspis,* savo švicinel sar žužo* krištaľis.
12 Le foros sas hruba the bare hradbi le 12 branenca, paš save terďonas 12 aňjela. Pro brani sas pisimen o meni le 12 izralskone kmeňengere.
13 Trin brani sas pro vichodos, trin pro severis. Trin pro juhos a trin pro zapados.
14 Le foroskere hradbi sas thode pro 12 zakladna bara. Pre lende sas pisimen sar pes vičinel dojekh Barankoskero apoštolos, save sas 12.
15 Koda, savo manca vakerelas, ľikerelas andro vast somnakuno* konaricis, kaj te zmerinel o foros, leskere brani the leskere hradbi.
16 O foros hino kerdo andro štvorcos.* Ajci, keci hino baro, hino the buchlo. Le konariciha zmerinďa o foros a avľa pre oda, hoj hino baro, buchlo the džindžardo* rovnakones asi 2220 kilometri.*
17 Zmerinďa the leskere hradbi a sas bare 64 metri* avka sar merinel o manuš. Avka oda zmerinďa the o aňjelos.
18 O Del kerďa o hradbi, save sas le jaspisostar a o foros igen lačhe somnakajistar, savo dičholas sar žužo sklo.
19 O Del šukaľarďa o zakladi pro foroskere hradbi dojekhe drahone bareha: peršo bar pro zakladi sas jaspisos, dujto zafiris, trito chalcedonos, štarto smaragdos,
20 pandžto sardoniksos, 6. sardos, 7. chrizolitos, 8. berilos, 9. topasis, 10. chrizoprasos, 11. hijacintos, 12. ametistos.
21 O 12 brani sas kerde le 12 perlendar. Dojekh brana sas jekha perlatar. O Del kerďa o hlavno drom le foroske igen lačhe somnakajistar, savo dičholas sar žužo krištaľis.
22 O chramos andre leste na dikhľom, bo oda chramos hino o Nekbareder Del Jehovas* the o Barankos.
23 Le foroske na kampel, kaj odoj te švicinel o kham abo o čhonoro, bo pre leste švicinel le Devleskero rajipen a e lampa andre oda foros hino o Barankos.
24 Leskero švetlos švicinela le narodenge pro drom, kaj te phiren a o kraľa pal e phuv ašarena o foros bare rajipnaha.
25 Leskere brani pes ďivese ňigda na phandena a e rat odoj na ela.
26 O manuša andal o narodi ašarena ada foros a presikavena leske e paťiv.
27 Aľe isto andre na džala ňič meľardo, aňi ňiko, ko kerel baro džungaľipen the podvodi. Džana andre ča ola, so hine pisimen andre le Barankoskeri kňižka, savi del o dživipen.
Poznamki tele čijarkica
^ Abo A a Z. Alfa the omega hin peršo the posledno pismenko andre greciko abeceda. Doslovňe: Alfa the Omega, začjatkos the koncos.
^ Abo jeva.
^ Dikh tuke buter adaj andro Slovňikos.
^ Doslovňe: špiritizmus. Savore zviki spojimen le špiritizmoha.
^ Doslovňe: Devleskere duchoha.
^ Oda hin: vareko phenel, hoj vareso ajso sar dijamantos.
^ Abo čisto.
^ Abo zlato.
^ Abo kocka.
^ Abo učo.
^ Doslovňe: 12 000 štadiji. Jekh štadijum sas 185 metri. Dikh o dodatkos B14.
^ Doslovňe: 144 lakťi. Dikh o dodatkos B14.
^ Dikh o dodatkos A5.
