So dikhľa o Jan – Zjaveňe 22:1-21
22 Paľis mange o aňjelos sikaďa o paňi, savo del o dživipen. Žužo* sar krištaľis. Čuľolas avri odarig, kaj hino le Devleskero the le Barankoskero tronos.
2 Ada paňi džalas maškaral pal o hlavno drom kale foroske. Pal o soduj seri le paňeske baronas o stromi, save den o dživipen. Sako čhon pre lende barolas o ovocje a anenas e uroda 12-var tel o berš. O prajta pal o stromi sas pre kada, kaj te sasťaren* le naroden.
3 O Del ada foros ňigda na prekošela, aľe ela odoj le Devleskero the le Barankoskero tronos. Le Devleskere otroka leske služinena.
4 Dikhena leskero muj a pro čekata len ela pisimen leskero menos.
5 E rat imar na ela. Na kampela lenge o švetlos la lampatar aňi o švetlos le khamestar, bo o Del o Jehovas* pre lende švicinela. A vladňinena sar kraľa pro furt.
6 Phenďa mange: „Ale lavenge šaj paťas a hin oda čačipen. O Del Jehovas,* savo vakerel prekal o proroka, bičhaďa peskere aňjelos, kaj te sikavel peskere otrokenge, so pes maj majinel te ačhel.
7 Avava so neksigeder. Bachtalo hino koda, ko peske lel ko jilo o prorocka lava andal kada zvitkos.“
8 Me, o Jan, ada savoro šunďom the dikhľom. Sar ada šunďom the dikhľom, peľom le aňjeloske, savo mange ada savoro sikaďa paš o pindre a kamľom leske te služinel.
9 Aľe ov mange phenďa: „So keres! Ma ker ada! Som ča kajso otrokos sar tu the tire phrala, save sas proroka a the sar ola, so peske len ko jilo o lava andal kada zvitkos. Le Devleske služin!“
10 Paľis mange phenďa: „Ma garuv ala prorocka lava andal ada zvitkos, aľe mukh les phundrado,* bo o časos, savo diňa o Del, hino pašes.
11 Ko na kerel oda, so hino lačho andre Devleskere jakha, dureder ada mi kerel. Ko kerel džungaľipen, te na preačhel oleha. Aľe koda, ko kerel oda, so hino lačho andre Devleskere jakha, dureder ada mi kerel. A koda, ko hino žužo andre Devleskere jakha, dureder pre peste mi kerel buťi.
12 ‚Avava, so neksigeder. Dojekheske dava pale pal oda, so kerelas.
13 Me som Alfa the Omega,* peršo the posledno.
14 Bachtale hine ola, so peske rajbinen peskero uraviben, kaj lenge te el domukhlo te chal le stromendar, save den o dživipen a kaj te predžan andro foros prekal o brani.
15 Avri le forostar hine o rukone,* ola, so keren o zviki* spojimen le demonenca, ola, so keren o lubipen,* ola, so murdarkeren, o modlara the savore, so džan pal o klamišagi a korkore rado klaminen.‘
16 ‚Me, o Ježiš, bičhaďom mire aňjelos, kaj tumenge ada savoro te phenel, kaj olestar te el chasna le zboren. Me som andal e Davidoskeri fajta,* leskero čhavo the e čercheň,* savi zorales švicinel a avel avri tosara.‘“
17 O Del prekal peskeri bari zor the prekal e terňi phenel: „Av!“ Dojekh, ko ada šunel, mi phenel: „Av!“ A dojekh, kas šuťarel, mi avel. A ko kamel, mi pherel peske hijaba* o paňi, savo del o dživipen.
18 „Dojekheske, ko šunel ala prorocka lava andal ada zvitkos, phenav, kaj peske te merkinel: Ko dothovela vareso buter ke ala lava, oleske the o Del prithovela le ranendar, pal save pes pisinel andre kada zvitkos.
19 Ko vareso odlela ale prorockone lavendar, oleske o Del na domukhela te chal o ovocje le stromendar, save den o dživipen a na domukhela leske te džal andro svato foros, avka sar hin pisimen andre kada zvitkos.
20 Koda, savo vakerel, hoj ada savoro hin čačipen, phenel: ‚Ha, avava, so neksigeder.‘“
„Amen! Av Rajeja Ježiš!“
21 Mangav le Devles, kaj o Raj o Ježiš te presikavel o baro lačhipen le svatonenge.
Poznamki tele čijarkica
^ Abo čisto.
^ Abo uzdravinen.
^ Dikh o dodatkos A5.
^ Dikh o dodatkos A5.
^ Abo phuterdo, odkerdo.
^ Abo A a Z. Alfa the omega hin peršo the posledno pismenko andre greciko abeceda.
^ Mišľinel pes pro manuša, save keren oda, so le Devleske džungľol.
^ Doslovňe: špiritizmus. Savore zviki spojimen le špiritizmoha.
^ Dikh tuke buter adaj andro Slovňikos.
^ Doslovňe: Davidoskero koreňis.
^ Abo hvjezda.
^ Abo jeva.
