So dikhľa o Jan – Zjaveňe 3:1-22
3 Le aňjeloske andro zboros Sardi pisin: Ada vakerel koda, saves hin 7 Devleskere zora, save na dičhon a 7 čercheňa:* ‚Džanav pal tire skutki. O manuša tut prindžaren, hoj džives, aľe sal mulo.
2 Ma sov a zoraľar olen, so ačhile, savenge na kampľa but a maj bi mulehas. Bo dikhav, hoj na keres savoro, so tutar miro Del užarel.
3 Vaš oda rozmišľin, so priiľal a so šunďal. Ľiker tut olestar a bajin oda, so keres. Te tut na prekereha, avava sar zloďejis a aňi na džaneha, sava oratar oda ela.
4 Aľe hin tut andro zboros Sardi varesave manuša, save peske na meľarde o uraviben. On hine manuša, save hine hodna te phirel manca andro parno uraviben.
5 Ko ačhela verno, ela urdo andro parno uraviben a leskero menos ačhela andre dživipnaskeri kňižka pro furt. Aľe anglal miro Dad the anglal o aňjela phenava, hoj les prindžarav.
6 Sako mište mi šunel, so vakerel o Del prekal peskeri zor le zborenge.‘
7 Le aňjeloske andro zboros Filadelfija pisin: Ada vakerel koda, savo hino svato the čačipnaskero, saveste hin le Davidoskeri kľeja, savo phundravel* avka, hoj ňiko na phandela a savo phandel avka, hoj ňiko na phundravela:
8 ‚Džanav pal tire skutki, save kerehas. Tu dikhľal sar anglal tu phundraďom o vudar, savo našťi ňiko phandel. Džanav, hoj choč ajci na birines, doľikerďal miro lav a na phenďal, hoj man na prindžares.
9 A olen, so hine le Satanoskere manuša,* save pal peste vakeren, hoj hine Židi, aľe klaminen, bo nane Židi, ta len anava ke koda, kaj te aven a te banďon dži ke tire pindre a kaj te sprindžaren, hoj tut rado dikhav.
10 Vaš oda, hoj mandar sikhľiľal sar te ľikerel avri, na domukhava, kaj pes tuke vareso te ačhel andre oda časos, sar avena o pharipena pre savore manuša, so dživen pre phuv, kaj pes te sikavel, či keren lačho abo nalačho.
11 Avava so neksigeder. Zorales tut ľiker olestar, sostar majines, kaj tuke ňiko te na lel e koruna.*
12 Ko ačhela verno, lestar kerava sar te bi stlpos andro chramos mire Devleskero a imar ňič les odarig na čhivela het. Pisinava pre leste sar pes vičinel miro Del a mire Devleskero foros o Nevo Jeruzalem, savo avel tele khatar miro Del a tiš odoj pisinava miro nevo menos.
13 Sako mište mi šunel, so vakerel o Del prekal peskeri zor le zborenge.‘
14 Le aňjeloske andro zboros Laodiceja pisin: Ada vakerel o Amen,* o svedkos, savo hino verno a vakerel čačipen, peršo, kas o Del kerďa:
15 ‚Džanav pal tire skutki, hoj sal sar paňi, savo nane aňi šilalo aňi kerado. Igen kamľomas, kaj te aves sar paňi, savo hino šilalo abo kerado!
16 Aľe vaš oda, hoj sal sar ľetno paňi a na sal aňi kerado aňi šilalo, čhivava tut avri andal o muj.
17 Phenes: „Som barvalo, zbarvaľiľom, ňič mange na kampel,“ aľe na dikhes, hoj tut kampel te sajinel, hoj sal koro, čoro the nango.
18 Vaš oda tuke phenav: Cin tuke mandar o somnakaj,* savo pregeľa la jagaha, kaj te zbarvaľos. Tiš parno uraviben, kaj te aves urdo, kaj te garuves e ladž, hoj sal nango. A pro jakha e masťa,* kaj te dikhes.
19 Savorenge, kas rado dikhav, dophenav, so keren nalačho a bararav len avri. Vaš oda služin le Devleske calone jileha a bajin oda nalačho.
20 Terďuvav paš o vudar a durkinav. Te vareko šunela miro hlasos a phundravela o vudar, džava ke leste andro kher a chava leha raťi o chaben.
21 Oleske, ko ačhela verno, domukhava, kaj manca te bešel pre miro tronos, avka sar the me ačhiľom verno a bešľom mire Dadeha pre leskero tronos.
22 Sako mište mi šunel, so vakerel o Del prekal peskeri zor le zborenge.‘“
Poznamki tele čijarkica
^ Abo hvjezdi.
^ Abo phuterel, odkerel.
^ Doslovňe: le Satanoskeri sinagoga.
^ Mišľinel pes ajsi koruna, savi hordinen o kraľa.
^ Oda hin: mišľinel pes pro Ježiš.
^ Abo zlatos.
^ Abo žiros, balzamos.
