So dikhľa o Jan – Zjaveňe 7:1-17
7 Paľis dikhľom štare aňjelen te terďol pro štar agora la phuvake. Zorales ľikerenas e balvaj, savi avelas pal o štar phuvakere seri, kaj te na phurdel e balvaj aňi pre phuv, aňi pro moros, aňi pro ňisavo stromos.
2 Dikhľom the aver aňjelos, savo avelas pal o vichodos, odarig, kaj avel avri o kham. O Del leske diňa andro vast oda, soha označinelas* le manušen. A vičinelas zorale hlasoha pre ola štar aňjela, savenge sas domukhlo, kaj te keren vareso nalačho la phuvake the le moroske:
3 „Ma keren ňič la phuvake, le moroske aňi le stromenge, medik* na označinaha amare Devleskere otroken la pečatkaha pre lengere čekata.“
4 Šunďom, keci hine označimen la pečatkaha: 144 000 andal savore izraelska kmeňi.
5 Andal o kmeňos Juda označinde la pečatkaha 12 000,andal o kmeňos Ruben 12 000,andal o kmeňos Gad 12 000,
6 andal o kmeňos Ašer 12 000,andal o kmeňos Naftali 12 000,andal o kmeňos Manaše 12 000,
7 andal o kmeňos Simeon 12 000,andal o kmeňos Levi 12 000,andal o kmeňos Isachar 12 000,
8 andal o kmeňos Zebulun 12 000,andal o kmeňos Jozef 12 000the andal o kmeňos Benjamin 12 000 označimen la pečatkaha.
9 Paľis dikhľom igen but manušen, saven našťi ňiko zgenďa. Sas andal savore narodi, kmeňi, rasi the čhiba. Terďonas anglal o tronos the anglal o Barankos. Sas urde andro parno uraviben a andro vasta len sas o konara pal o palmi.
10 Vičinenas zorale hlasoha: „Paľikeras amare Devleske, savo bešel pro tronos the le Barankoske, hoj amen zachraňinde.“
11 Savore aňjela, save terďonas khatar* o tronos, khatar o phuredera, khatar o štar cherubina,* pele anglal o tronos pro khoča* a presikavenas le Devleske nekbareder paťiv.
12 Vakerenas: „Amen! Amaro Del, savo hino goďaver the zoralo. Ov mušinel te el barardo the ašardo. Leske mušinen savore te presikavel e paťiv a te paľikeren pro furt. Amen.“
13 Paľis mandar jekh le phurederendar phučľa: „Ko hine ola, so hine urde andro parno uraviben? A khatar avle?“
14 Phenďom: „Rajeja miro, tu oda džanes.“ Ov mange phenďa: „Oda hine ola, save predžiďile igen baro trapišagos a save peske rajbinde o uraviben a parňarde les andro Barankoskero rat.
15 Vaš oda hine anglal o Devleskero tronos a ďives the rat leske služinen andre leskero chramos. A o Del, savo bešel pro tronos, len chraňinel.*
16 Imar na ena bokhale, aňi len na šuťarela a o kham aňi o keraďipen len na zlabarela.
17 Bo o Barankos, savo terďol paš o tronos, len ľidžala sar lačho pasťjeris. Ľidžala len pro than, khatar aven avri o paňa, save den o dživipen. O Del lenge khosela dojekh apsa pal o jakha.“
Poznamki tele čijarkica
^ Doslovňe: pečaťidlos.
^ Abo pokim.
^ Abo pašal.
^ Oda hin: aňjela, saven hin baro postaveňe a hine nekpašeder paš o Jehovas.
^ Abo pro kľončki.
^ Doslovňe: A koda, savo bešel pro tronos, nacirdel upral lende peskero stanos.
