Efezanenge 1:1-23
1 Me, o Pavol, saves o Del kidňa avri, kaj te el apoštolos le Kristoskero Ježišoskero, pisinav le svatonenge* andro Efez, olenge, so hine verna le Kristoske Ježišoske:
2 Mi del tumen o Del, amaro Dad the o Raj Ježiš Kristus o baro lačhipen the mi el tumen o smirom.
3 Mi el ašardo o Del the o Dad amare Rajeskero le Ježišoskero Kristoskero vaš kada, hoj amen le Kristoskere učeňiken diňa prekal peskero svato duchos igen but lačhipen, savo šaj chudas andro ňebos.
4 Kidňa amen avri akorestar sar sas kerde o manuša,* kaj te avas zajekh le Kristoha. Tiš kaj te presikavas o kamiben a mi el amen anglo Del žužo* jilo the e goďi.
5 Avka sar oda ov igen kamľa, amen anglal kidňa avri, kaj amen prekal o Ježiš Kristus te prilel vaš peskere čhave.
6 Kerďa oda, kaj les te ašaras vaš leskero baro lačhipen, savo amenge presikaďa prekal peskero Čhavo, saves rado dikhelas.
7 Diňa peskere Čhas, kaj ov te del peskero dživipen, kaj amen kaleha te cinel avri a avka amenge odmukhľa amare bini.
8 Na sajinďa amenge te del ada baro lačhipen a diňa amen savori goďi the oda, kaj te džanas lačhes te rozmišľinel,
9 sar amenge phenďa o svato tajomstvos, so kamel te kerel. Ada tajomstvos, savo džal jekhetane oleha, so ov kamel, hin ada,
10 hoj sar avela oda časos, savo diňa o Del, ta sa ľidžala ke ada, kaj te en savore zajekh le Kristoha, sa andro ňebos the sa pre phuv. Avka ena savore zajekh le Kristoha.
11 Leha samas zajekh a leha the chudaha oda, so amenge o Del kamel te del. Samas anglal kidne avri avka sar o Del kamľa. Ov kerel sa pal oda sar ov kamel. A avka sar peske phenela, hoj kerela.
12 Kerďa oda, kaj prekal amende, save perša paťanďiľam andro Kristus, te el ašardo the barardo o Del.
13 The tumen andre leste paťanďiľan, sar šunďan o čačipen pal e lačhi sprava pal oda, hoj šaj aven zachraňimen. Ov kerďa, hoj tumen, save paťanďiľan, sanas sar te bi označimen la pečatkaha le svatone duchoha avka sar phenďa, hoj tumenge les dela.
14 Angle* kada svato duchos amenge šaj avas ista, hoj chudaha oda, so amenge o Del kamel te del. O Del ada kerďa, kaj te poťinel vaš peskero ľudos, kaj te el premukhlo andal o otroctvos a kaj ov te el kaleha ašardo the barardo.
15 Vaš oda the me. Soča šunďom pal tumaro paťaviben andro Raj Ježiš a pal tumaro kamiben ke savore svata,
16 na preačhav vaš tumenge te paľikerel le Devleske. Sar man modľinav, furt tumen andre mire modľitbi leperav.
17 Mangav, kaj tumen o Del amare Rajeskero le Ježišoskero Kristoskero, o Dad, savo sas barardo te del zor, kaj te en goďaver, kaj te achaľon oleske, so tumenge del te džanel, kaj les avka mištes te sprindžaren.
18 Phundraďa* tumenge tumaro jilo, kaj te dikhen a kaj lačhes te achaľon oleske, savi naďej tumen diňa, savo igen baro lačhipen dela olen, save hine svata.
19 Aňi pes na del te phenel, savi bari hiňi leskeri zor, savi hiňi andre amende, save paťas. Oda, savi bari hiňi leskeri zor, šaj dikhas olestar,
20 so kerďa, sar uštaďa le Kristus andal o meriben. Thoďa les te bešel paš peskeri pravo sera andro ňebos.
21 Hino o keci upreder upral dojekh vlada, upral ola, saven hin zor, upral savore kraľišagi, upral ola, save hine vareko a na ča andre ada svetos,* aľe the andre koda, savo avela.
22 Savoro leske thoďa tel o pindre a ov hino upral savoreste,* so pes kerel andro zboros.
23 O zboros hino sar te bi leskero ťelos a ov les del savoro, so leske kampel.
Poznamki tele čijarkica
^ Dikh tuke buter adaj andro Slovňikos.
^ Mišľinel pes pro Adamoskere the Evakere čhave.
^ Abo čisto.
^ Abo vaš, bijal, aščal, predal.
^ Abo phuterďa, odkerďa.
^ Dikh tuke buter adaj andro Slovňikos.
^ Doslovňe: thoďa les sar šero.
