Efezanenge 2:1-22
2 Vaš oda, hoj kerenas o bini, ta sanas sar te bi mule. Aľe o Del tumen pale diňa o dživipen.
2 Varekana dživenas sar ada svetos* a kerenas oda, so kamelas o vladcas kale svetoske. Ov peskera goďaha* džanel te džal pre ala nalačhe manuša. A ada pes širinel sar vzduchos, savo hino všadzik khatar* amende.
3 Varekana the amen savore ke lende patrinahas. Bo dživahas pal oda, pre soste cirdelas amaro ťelos a kerahas oda, so kamelas amaro ťelos the amari goďi. A avka sar the aver manuša, ta akorestar sar uľiľam, amenge zaslužinas, kaj pre amende o Del te chal choľi.
4 Aľe o Del, savo hino igen kovlejileskero, amen igen rado dikhelas a vaš oda
5 amen pale diňa o dživipen jekhetane le Kristoha, the te samas sar te bi mule, bo kerahas o bini. Aľe sanas zachraňimen, bo o Del tumenge presikaďa peskero baro lačhipen.
6 A sar le Kristoskere Ježišoskere učeňiken amen pale diňa o dživipen jekhetane leha a tiš, kaj jekhetane leha te avas andro ňebos.
7 Kerďa ada, kaj amenge, so sam zajekh le Kristoha Ježišoha te sikavel andro nevo svetos, so avela, peskero igen baro lačhipen a avka tiš presikavela peskero jilo.
8 Vaš oda sanas zachraňimen, bo sas tumenge presikado o baro lačhipen a vaš oda, hoj paťan. Na vaš oda, hoj tumen predal ada vareso kerďan. Hin oda daros le Devlestar.
9 Manuš našťi el zachraňimen ča anglo* skutki, kaj pes paľis korkoro kaleha te na ašarel.
10 O Del amen kerďa peskere vastenca. A vaš oda, hoj sam le Kristoskere Ježišoskere učeňika, samas kerde pre kada, kaj te keras o lačhipen, savo amenge o Del anglal phenďa, kaj te keras.
11 Ma bisteren, hoj ola, pal save pes phenel, hoj hine občhinde, bo len občhinde o manuša, varekana phenenas pre tumende, so san andal aver narodi, hoj na sanas občhinde.
12 Andre oda časos na prindžarenas le Kristus. Na chalas tumen ňič le Izraelčanenca. Na sanas maškar ola, savenca sas sphandľi e zmluva pal o sľubos. Dživenas andre kada svetos bije naďej a na prindžarenas le Devles.
13 Varekana na prindžarenas le Devles. Aľe akana, sar san učeňika le Kristoskere Ježišoskere, les prindžaren prekal ada, hoj o Kristus diňa peskero dživipen.
14 Sem o Kristus amenge anďa o smirom. Ov, savo sphandľa sar te bi duj tabori* andre jekh a araďa* sar te bi o muros, savo lenge braňinelas, kaj te en jekhetane.
15 Kaleha, hoj diňa peskero dživipen kerďa, kaj pes o zakoni the o prikazaňa andal o Mojžišoskero zakonos te ačhen. Kada kerďa, hoj ala duj tabora pre peste džanas. Paľis lendar kerďa nevo taboris. Soduj ala tabora hine leha zajekh a o Kristus kerďa, kaj maškar lende te el o smirom.
16 A kaleha, hoj muľa pro drukos* kerďa, kaj ala soduj tabora te en lačhe le Devleha a avka lendar hin sar te bi jekh ľudos. Kaleha, hoj ov muľa kerďa, hoj ala duj tabora imar pre peste na džan.
17 Sar avľa, vakerelas e lačhi sprava pal o smirom tumenge, save na prindžarenas le Devles the olenge, save les lačhes prindžarenas.
18 Leske šaj paľikeras, hoj amen, ala soduj tabora, pes šaj modľinas ko Dad, savo amen del oda isto svato duchos.
19 Na san imar sar o manuša andal aver phuv aňi sar ola, soča adaj avle te bešel. Aľe imar san sar ola, so jekhetane bešen le svatonenca a patrinen andre Devleskeri fameľija.
20 Sanas sar te bi budimen pro zaklados, savo hino kerdo le apoštolendar the le prorokendar. A o hlavno bar hino o Kristus Ježiš.
21 Ada kher, savo hino budimen the leskere kotora, igen lačhes ľikeren jekhetane. A vaš oda, hoj hino sar te bi zajekh le Kristoha, ta barol, kaj lestar te el chramos kerdo ča predal o Jehovas.*
22 Vaš oda, hoj san zajekh le Kristoha, ta o Del tumendar kerďa sar te bi kher, andre savo bešel, bo odoj hin leskero svato duchos.
Poznamki tele čijarkica
^ Dikh tuke buter adaj andro Slovňikos.
^ Doslovňe: duchoha.
^ Abo pašal.
^ Abo vaš, bijal, aščal, predal.
^ Mišľinel pes o Židi the ola, save nane Židi.
^ Abo čhiďa tele, zburinďa.
^ Dikh tuke buter adaj andro Slovňikos.
^ Dikh o dodatkos A5.
