Efezanenge 4:1-32
4 Vaš oda tumen mangav me, savo som phandlo andre harešta* anglo* Raj, kaj tumare dživipnaha te sikaven, hoj o Del kerďa mište, sar tumen kidňa avri, kaj te vakeren pal e lačhi sprava.
2 Furt aven pokorna, džanen te ačhel pokojna, džanen te užarel. Presikaven tumenge o kamiben, the te tumenge jekh pre avreste vareso vaďinel.
3 Jilestar keren predal ada savoro, kaj maškar tumende te el o smirom a kaj tumen te ľikeren jekhetane. Bo ada, hoj tumen ľikeren jekhetane, chudľan le Devlestar prekal leskero svato duchos.
4 Hin jekh zboros* a hin jekh svato duchos. Avka sar hin jekh naďej, pre savi tumen o Del kidňa avri.
5 Hin jekh Raj, jekh sikhľariben, jekh boľipen,
6 jekh Del the o Dad savorengero, savo hino upral savore. Leskeri zor ľidžal savoren a šaj la dikhas andre savoreste.
7 Dojekheske amendar sas presikado baro lačhipen a o Kristus diňa ada daros dojekheske avka sar kamľa.
8 Vaš oda pes pisinel: „Sar geľa upre andro ňebos, iľa avri andal e harešta olen, save sas phandle a diňa andro zbori le manušen sar dari.“
9 So hin oda, hoj geľa upre? Oda, hoj sigeder sar geľa upre, avľa tele pre phuv.
10 Koda, so avľa tele, hino koda isto, so geľa upre, mek upreder sar hino o ňebos, kaj pes prekal leste te ačhel savoro, so kampľa.
11 Andro zboros kerďa varesavendar apoštolen, varesavendar proroken, avrendar kerďa ajsen, so vakeren pal e lačhi sprava a mek avrendar kerďa pasťjeren the učiťeľen.
12 Kerďa oda, kaj te den goďi le svatonen, kaj te služinen avrenge a te zoraľaren le Kristoskero ťelos.
13 A oda medik* na avaha savore zajekh andre oda, andre soste paťas a andre oda sar lačhes prindžaras le Devleskere Čhas. A medik na avaha ajse, save imar sar te bi barile avri a hine zorale andro paťaviben a na avaha andre savoreste ajse sar o Kristus.
14 Paľis imar na avaha sar cikne čhave, save džan pal chočsavo sikhľariben, pal o manuša, save klaminen. Bo ajse džene hine sar e loďka the o vlni pro moros, savenca e balvaj čhivkerel kaj kamel.
15 Mušinas te vakerel o čačipen a te presikavel o kamiben a avka avaha ajse sar te bi imar bariľamas avri a kaleha avaha andre savoreste sar o Kristus, bo ov amen ľidžal.*
16 Ov kerel, hoj savore kotora le ťelostar te ľikeren jekhetane a kaj jekhetane te keren buťi. A oda avka, hoj dojekh kotor pomožinel aver kotoreske, kaj te den le ťeloske oda, so leske kampel. Te dojekh kotor kerel mištes peskeri buťi, ta oda pomožinel le ťeloske, kaj te barol a te zoraľol anglo kamiben.
17 Vaš oda tumenge phenav a mangav tumen andre le Rajeskero menos, kaj imar te na dživen avka sar dživen o manuša andal aver narodi, save pes den te ľidžal peskera diliňa goďaha.
18 Vaš oda, hoj na kamen te džanel o čačipen a lengere jile hine sar bara, ta lengeri goďi hiňi sar te bi andro kaľipen. A avka na chudena o dživipen, savo len o Del kamel te del.
19 Hin lenge jekh, savo džungaľipen keren, keren bini bije ladž* a našťi čaľon ole džungipnastar, savo keren.
20 Aľe tumen džanen, hoj o Kristus avka na dživelas.
21 O Ježiš sikhľarelas oda, so hin čačipen. Te les šunenas a ov tumen sikhľarelas, ta akor kaleske mištes achaľiľan.
22 Buterval tumenge sas phendo, hoj tumendar majinen te odčhivel oda, save varekana sanas. Bo akor dživenas džungalo dživipen. Kerenas oda, pre soste tumen cirdelas tumaro binošno ťelos.
23 Majinen tiš te prekeren oda sar rozmišľinen.
24 Chovinen tumen avka sar kamel o Del, sar te bi avenas neve manuša. Bo oda, so o Del kamel, hino zathodo pre oda, so hino čačes lačho a šunena le Devles calone jileha.
25 Imar preačhiľan te klaminel, ta sako tumendar mi vakerel čačipen jekh avreske, bo sam kotora ole istone ťelostar.
26 The te san choľamen, ma keren binos. Odčhiven tumendar e choľi sigeder sar zaperela o kham.
27 Ma domukhen le Bengeske, kaj tumen kaleha akor te chudel.
28 Koda, ko čorkerelas, imar te na čorkerel. Aľe sigeder mi kerel phari buťi peskere vastenca, kaj paľis te del olestar, so les hin, kajsen, saven nane.
29 Andal tumaro muj te na avel avri ňisavo nalačho lav. Podhazden tumare lavenca akor, sar kampel, kaj tumare lava te den zor olen, so tumen šunen.
30 Ma keren ňič ajso, so bi ľidžalas ke oda, hoj bi tumen o Del na delas peskero svato duchos. Bo leha sanas označimen sar te bi la pečatkaha pre oda ďives, sar avena zachraňimen, bo o Kristus tumen cinďa avri peskere dživipnaha.
31 Odčhiven tumendar e ruš, savi tumen hin andro jilo. Odčhiven tiš ada: ma aven choľamen, ma chan tumen tele andre choľi, ma keren vika, ma vakeren dukhade lava aňi ňič ajso, so avreske kerel dukh.
32 Aven jekh ke aver jileskere, mi el tumenge jilestar pre tumende pharo. Jilestar tumenge odmukhen avka sar o Del jilestar odmukhľa tumenge prekal o Kristus.
Poznamki tele čijarkica
^ Abo bertena.
^ Abo vaš, bijal, aščal, predal.
^ Doslovňe: ťelos.
^ Abo pokim.
^ Doslovňe: amaro šero.
^ Po grecki aselgeia. Dikh tuke buter adaj andro Slovňikos.
