Efezanenge 6:1-24
6 Čhavorale, šunen tumare dades tumara da avka sar oda kamel o Raj. Bo o Del pre kada dikhel mištes.
2 Presikav paťiv tire dadeske the tira dake. Ada hino peršo prikazaňe. A andre kada prikazaňe hin o sľubos:
3 „Mi el tut lačho dživipen a dživ but berša pre phuv.“
4 Dadale, ma den choľi andre tumare čhave. Aľe bararen len avka, hoj len dena goďi a sikhľarena len avka sar oda kamel o Jehovas.*
5 Tumen, so san otroka, šunen tumare rajen calone jileha, paťivaha the la daraha avka sar šunen le Kristus.
6 Na šunen len ča akor, sar tumen dikhen averdžene. Ča vaš oda, kaj tumen te pačinen le manušenge. Aľe služinen sar le Kristoskere otroka, save keren oda, so kamel o Del calone jileha.
7 Služinen le jilestar sar te bi služinďanas le Jehovaske* na le manušenge.
8 Bo džanen, hoj dojekh, ko kerel vareso lačho či oda ela otrokos abo oda, ko nane otrokos, chudela vaš kada odmena le Jehovastar.*
9 The tumen, rajale, saven tumen hin otroka, keren lenca avka istones. Ma daraven len. Sem tumen džanen, hoj upral lende the upral tumende hino andro ňebos koda isto Raj. A ov na kerel rozďjeľis maškar o manuša.
10 Keren predal kada savoro, kaj tumen o Raj te del zor, bo leskeri zor hiňi bari.
11 Uren pre tumende savoro, so tumen diňa o Del, soha tumen šaj maren. A kavka tumen na chudela o Beng.
12 Bo amen pes na maras le manušenca, aľe maras amen le demonenca, save hine andro ňebos. A on hine e vlada lengere vladcenca, save vladňinen upral kada nalačho svetos.
13 Vaš oda uren pre tumende savoro, so tumen diňa o Del, soha tumen šaj maren. Paľis tumen džanena zorales te marel, bo kerďan savoro avka sar majinďan. A kavka tumen na chudela kada ňeprjaťeľis, sar pre tumende džala.*
14 Terďon zorales andre kada mariben. Thoven tumenge khatar* o pasos o čačipen sar te bi tumen phandľanas opaskoha. Uren pre tumende e spravodľivosť* sar te bi tumenge urďanas o pancjeris pro koľin.
15 Aven furt pripravimen te vakerel pal e lačhi sprava pal oda, hoj šaj aven lačhe le Devleha. Avka sar te bi furt uľanas pripravimen te urel o sandalki.
16 A mek ke kada, zmukhen tumen pro Del sar te bi tumen uľahas andro vast baro šťitos, savo tumenge pomožinela te murdarel savore jagale šipi le Bengestar.*
17 Rozmišľinen pal oda sar tumen o Del zachraňinďa a kada tumen chraňinela sar te bi tumen elas e prilba pro šero. Len tumenge le Devleskero lav, savo hino sar te bi e šabľa, savo del prekal peskero svato duchos.
18 Furt pes paš savoreste modľinen ko Del. Či imar leske paľikerena abo les pal varesoste mangena, abo les ašarena, mi ľidžal tumen le Devleskeri zor. Vaš oda ma soven a ma preačhen igen te mangel vaš savore svata.
19 Modľinen tumen the vaš mange. Kaj sar chudava te vakerel, kaj mange o Del te pomožinel te arakhel ajse lava, save akor kampela. Kaj bije dar te vakerav o svato tajomstvos pal e lačhi sprava.
20 O Del hino koda, savo man bičhaďa te vakerel e lačhi sprava. A angle* kada som phandlo le lancenca. Modľinen tumen vaš ma ko Del, kaj bije dar te vakerav pal adi lačhi sprava avka sar oda majinav te kerel.
21 Pal mande the pal oda, so akana kerav sar dživav, tumenge vakerela o Tichikos, o phral saves rado dikhav a savo vernones služinel le Rajeske.
22 Bičhavav les ke tumende, kaj te džanen sar pre kada sam a kaj tumen te podhazdel.
23 O Del the o Dad a o Raj Ježiš Kristus mi den, kaj o phrala te dživen andro smirom, kaj pes rado te dikhen a kaj te presikaven o paťaviben.
24 Mi del o Del peskero baro lačhipen savoren, save rado dikhen amare Rajes le Ježiš Kristus le kamibnaha, savo ňigda na preačhela.
Poznamki tele čijarkica
^ Dikh o dodatkos A5.
^ Dikh o dodatkos A5.
^ Dikh o dodatkos A5.
^ Doslovňe: sar avena nalačhe ďivesa.
^ Abo pašal.
^ Oda hin: te kerel koda, so hino lačho andre Devleskere jakha.
^ Abo kole nalačhestar.
^ Abo vaš, bijal, aščal, predal.
