Filemonoske 1:1-25
1 Me o Pavol, savo som phandlo andre harešta,* bo paťav andro Kristus Ježiš, jekhetane le phraleha Timotejoha pisinas tuke Filemon, amare phraleske, saves rado dikhas a savo amenca jekhetane služinel.
2 Pisinas tiš la pheňake Apfijake the le Archiposke, savo igen zaačhel vaš o paťaviben a the le zboroske, savo pes zdžal andre tiro kher:
3 Mi presikavel tumenge o Del, amaro Dad the o Raj Ježiš Kristus peskero baro lačhipen a mi el tumen o smirom.
4 Phrala Filemon, furt sar man modľinav, leperav the tut a paľikerav mire Devleske,
5 bo šunav pal tiro paťaviben the kamiben, savo tut hin ko amaro Raj Ježiš the ko savore svata.*
6 Modľinav man, kaj tuke oda paťaviben, savo hin the amen savoren pomožinel te achaľol, keci but lačhipen zadživas anglo* Kristus.
7 Phrala miro, sar šunďom pal tiro kamiben, igen olestar radisaľiľom a podhazdľa man oda, bo tu kaleha diňal zor le svatonen.
8 Choč* bi tuke šaj phenďomas andro Kristoskero menos, kaj te keres oda, so hino lačho,
9 ta me o Pavol, imar phuro murš a akana hareštancos,* bo paťav andro Kristus Ježiš, bi tut kamavas te podhazdel, kaj oda te keres le kamibnastar.
10 Mangav tut vaš o Onezimus, savo mange hino sar čhavo a saveske andre harešta ačhiľom sar te bi dad.
11 Varekana tut lestar na sas chasna. Aľe akana pomožinel tuke the mange.
12 Bičhavav les tuke pale. Oles tuke bičhavav, savo hino pašes mire jileske.
13 Kamľomas bi, kaj te ačhel manca, kaj mange te služinel, sar tu adaj na sal, medik* som phandlo andre angle lačhi sprava.
14 Aľe na kamav ňič te kerel korkoro mandar. Vaš oda kamav peršo te phučel tutar, kaj te na keres vareso* ča vaš oda, bo tuke oda me phenav, aľe vaš oda, bo oda tu kames.
15 Šaj el, hoj vaš oda geľa het ča po čeporo,* kaj paľis tuha te el pro furt.
16 Aľe imar na sar otrokos, aľe sar vareko buter. Sar phral, saves me igen rado dikhav. Som mange isto, hoj tu les mek buter rado dikheha a na ča sar otrokos, aľe sar phrales, savo amenca jekhetane služinel le Rajeske.
17 Te man les čačes sar phrales, ta les prile avka sar bi priiľalas man.
18 Te tuke kerďa vareso, so tut molas love abo tuke vareso kamel, ta me tuke oda dava pale.
19 Me o Pavol pisinav: Poťinava vaš kada. A na kamav tuke te leperel, keci tu mange kames.*
20 Ha, phrala, av ajso lačho a ker oda predal ma, bo sam zajekh le Rajeha. Sar koda, savo kerel oda so the o Kristus, ker, kaj miro jilo te radisaľol.
21 Pisinav tuke, bo som mange isto, hoj kereha oda, so kamav. A džanav, hoj kereha na ča ada, pal soste tut mangav, aľe the buter.
22 A mek džanes so, pririchtin mange jekh izbica, bo paťav, hoj man ke tumende visarava pale, bo tumen pes vaš ma modľinen.
23 Pozdravinel tut o Epafras, savo manca tiš bešel harešta, bo paťal andro Kristus Ježiš.
24 Pozdravinen tut the ola, so manca jekhetane služinen: o Marek, o Aristarchos, o Demas the o Lukaš.
25 Mi presikavel tumenge o Raj o Ježiš Kristus peskero baro lačhipen vaš oda, save san.
Poznamki tele čijarkica
^ Abo bertena.
^ Dikh tuke buter adaj andro Slovňikos.
^ Abo vašo, bijalo, aščalo, predalo.
^ Abo hoc.
^ Abo bertenošis.
^ Abo pokim.
^ Doslovňe: lačho skutkos.
^ Abo jegnajoro, čunoro, sikrica.
^ Doslovňe: hoj mange kames pes korkores.
