Kada pisinďa o Jan 5:1-47
5 Paľis sas le Židen o inepos a o Ježiš geľa andro Jeruzalem.
2 Andro Jeruzalem paš e Ovčo brana hino ajso paňi, savo pes po hebrejski vičinel Betzata. A khatar* ada paňi sas chodňiki a khatar lende sas stlpi.
3 Pašľonas odoj but nasvale, kore, posťihnuta the ajse, saven sas bange vasta the pindre.
4 *——
5 Sas odoj the ajso manuš, savo sas 38 berš nasvalo.
6 O Ježiš les odoj dikhľa te pašľol. Achaľiľa, hoj hino imar but berša nasvalo. Avka lestar phučľa: „Kames te el sasto?“*
7 Oda nasvalo murš leske phenďa: „Rajeja, nane ňiko, ko bi man ľigenďahas andro paňi akor, sar hin pro paňi o vlni. A medik* me avava odoj, imar džal andre vareko aver.“
8 O Ježiš leske phenďa: „Ušťi, le tuke tiro haďos a dža!“
9 Koda manuš takoj sasťiľa. Iľa peske o haďos a phirelas.
Oda ďives sas sabat.
10 Vaš oda o Židi phende ole muršeske, savo sas sasťardo: „Hino sabat, našťi ľidžas o haďos.“
11 Aľe ov lenge phenďa: „Koda, savo man sasťarďa, mange phenďa: ‚Le tuke tiro haďos a dža.‘“
12 Phučle lestar: „A ko tuke kada phenďa?“
13 Aľe koda murš, na džanelas ko, bo o Ježiš odarig imar geľa het.
14 Paľis les o Ježiš dikhľa andro chramos a phenďa leske: „Te sal akana sasto, imar ma ker ňič nalačho, te na pes tuke ačhel vareso goreder.“
15 Koda manuš geľa te phenel le Židenge, hoj les sasťarďa o Ježiš.
16 Vaš oda, hoj o Ježiš sasťarelas le manušen andro sabat, o Židi pre leste chudne te džal.
17 Aľe o Ježiš lenge phenďa: „Miro Dad furt kerel buťi, the me furt kerav buťi.“
18 O Židi mek buter kerenas sa, kaj les te murdaren. Na ča vaš oda, hoj peske mišľinenas, hoj na doľikerel o sabat. Aľe tiš vaš oda, bo phenelas, hoj o Del hino leskero Dad a kaleha pestar kerelas le Devles.
19 O Ježiš lenge phenďa: „Paťan mange, o Čhavo našťi kerel ňič korkoro pestar, ča oda, so dikhel le Dadestar. So kerel o Dad, oda kerel the o Čhavo.
20 O Dad rado dikhel le Čhas. Vaš oda leske sikavel savoro, so kerel. A sikavela leske mek buter sar ada, kaj tumen te den avri o jakha.
21 Avka sar o Dad uštavel andal o meriben olen, so mule a del lenge pale o dživipen, avka the o Čhavo del pale o dživipen olenge, kaske ov kamel.
22 Sem o Dad na sudzinel ňikas. Aľe adi buťi mukhľa peskere Čhaske,
23 kaj savore te presikaven paťiv le Čhaske, avka sar presikaven paťiv le Dadeske. Ko na presikavel paťiv le Čhaske, na presikavel la aňi le Dadeske, savo les bičhaďa.
24 Paťan mange, ko šunel miro lav a paťal oleske, savo man bičhaďa, dživela pro furt. Kajso manuš na ela sudzimen, bo hino sar manuš, savo sas sar te bi mulo, aľe akana pale dživel.
25 Phenav tumenge čačipen: Avel e ora a imar hiňi adaj, sar ola, so mule, šunena sar pre lende vičinel le Devleskero Čhavo. A ola, save les šunenas, dživena.
26 Avka sar le Dadestar avel o dživipen, avka domukhľa the peskere Čhaske, kaj the lestar te avel o dživipen.
27 A domukhľa leske te sudzinel, bo ov hino o Čhavo le manušeskero.
28 Ma den avri o jakha. Bo aven o ďivesa, kana savore, so hine andro hrobi, šunena leskero hlasos
29 a ušťena. Ola, save kerenas o lačhipen, ušťena, kaj te dživen. A ola, save kerenas o nalačhipen, ušťena, kaj te en sudzimen.
30 Korkoro mandar našťi kerav ňič. Avka sar mange phenel o Dad, avka sudzinav. A sudzinav sar peske ko zaslužinel. Bo na kamav te kerel oda, so kamav me, aľe so kamel koda, savo man bičhaďa.
31 O manuša na paťana mire lavenge, te lenge pal mande korkoro vakerav.
32 Aľe hin adaj vareko aver, ko le manušenge pal mande vakerel. A me džanav, hoj oda, so pal mande vakerel, hino čačipen.
33 Bičhaďan le manušen ko Jan a ov vakerelas pal oda, so hin čačipen.
34 Na kampel mange ňikas, ko bi pal mande vakerelas le manušenge. Aľe phenav tumenge oda vaš oda, kaj tumen te chuden o dživipen.
35 Ov sas predal tumende sar te bi e lampa, savi labolas a savatar džalas o švetlos. A kamenas, choč ča varesavo časos te radisaľol sar te bi andre leskero švetlos.
36 O Jan phenďa le manušenge, hoj man bičhaďa o Dad. Aľe man hin vareso bareder, so sikavel, hoj man bičhaďa o Dad. Oda, hoj kerav ola skutki, save phenďa o Dad, kaj len te kerav.
37 A vakerelas pal mande the korkoro o Dad, savo man bičhaďa. Tumen ňigda na šunďan leskero hlasos aňi na dikhľan leskero muj.
38 A leskero lav nane andre tumare jile, bo na paťan oleske, kas bičhaďa.
39 Mišľinen tumenge, hoj te mište prindžaren le Devleskero lav, ta dživena pro furt? Či nane andre pisimen pal mande?
40 A the avka man na kamen te prilel, kaj te chuden o dživipen.
41 Na kamav, kaj man te ašaren o manuša,
42 aľe pal tumende džanav, hoj narado dikhen le Devles.
43 Avľom, bo man bičhaďa o Dad, aľe tumen mange na kamen te paťal. Aľe te avľahas vareko korkoro pestar, ta leske paťanďiľanas.
44 Te tumen ašaren ča korkore maškar tumende a na keren ňič predal oda, kaj tumen te ašarel o čačikano Del, ta akor sar šaj paťan mange?
45 Ma mišľinen tumenge, hoj me pre tumende vareso phenava mire Dadeske. Phenel pre tumende vareko aver, o Mojžiš, saveske avka paťan.
46 Te bi avka paťanas le Mojžišoske, ta bi paťanas the mange, bo ov pisinelas pal mande.
47 Aľe te na paťan oleske, so pisinďa, ta sar paťana oleske, so vakerav me?“
