Kolosanenge 2:1-23
2 Kamav, kaj te džanen sar igen kamav te pomožinel tumenge, olenge, save hine andre Laodiceja the savorenge, save man mek na dikhle.
2 Igen kamav, kaj len oda te podhazdel. Kaj jekh avres rado te dikhen a avka avena barvale. Ada barvaľipen hin andre kada, hoj lačhes prindžaren the achaľon le Devleskero svato tajomstvos, mišľinav le Kristus.
3 Prekal o Kristus šaj sprindžaras, savi bari goďi hin le Devles the so savoro džanel. A ada hino sar te bi garudo barvaľipen.
4 Phenav oda vaš oda, kaj tumen ňiko te na zdiliňarel le klamišagenca.
5 The te tumenca odoj na som, aľe mira goďaha som paš tumende. Radisaľuvav, sar dikhav, hoj hin ke tumende sa mištes* a hoj calone jileha paťan andro Kristus.
6 Vaš oda, hoj priiľan le Rajes le Kristus Ježiš, dživen avka sar ov.
7 Avka sar sikhľiľan, tumaro paťaviben mi el ajso baro sar stromos, saves hin igen bare koreňa. Mi el tumen zoralo paťaviben a ma preačhen te paľikerel le Devleske.
8 Den tumenge pozoris, kaj tumen ňiko te na zdiliňarel* la filozofijaha, savi hiňi zathoďi pro klamišagi the pro lava, save na mon ňič. Bo ada savoro hino zathodo ča pro manušikane zviki the pre oda sar rozmišľinel a so kerel ada svetos a na pro Kristus.
9 Ov amenge dokonalones sikavel, hoj andre leste hin savore Devleskere vlastnosťi.
10 Angle* leste hin the tumen savoro, so tumenge kampel. Bo ov ľidžal* dojekh vlada, the savoren, kas hin zor.
11 Vaš oda, hoj paťan andro Kristus, diňan tumen te občhinel na avka sar pes den te občhinel o manuša, aľe odčhiďan tumendar oda, so kamelas tumaro binošno ťelos. Avka pes den te občhinel ola, save paťan andro Kristus.
12 Sem avka sar leha sanas parunde andre leskero boľipen, ta leha sanas the uštade andal o meriben. Bo kerenas oda, so the ov a paťanďiľan andre zor, so hin le Devles, savo les uštaďa andal o meriben.
13 The tumen o Del sar te bi uštaďahas andal o meriben jekhetane le Kristoha, the te sanas sar te bi mule angle tumare bini a na sanas občhinde. O Del amenge jilestar odmukhľa savore amare bini.
14 Vimazinďa* o zakonos, savo sikavelas pre amare bini. Odčhiďa les akor, sar o Kristus muľa pro drukos.*
15 Kaleha, hoj o Ježiš muľa pro drukos,* thoďa tele le vladen the olen, saven hin zor. Avka lenge kerďa ladž maškar o savore, bo len ľidžalas sar hareštancen.*
16 Ňiko tumen te na sudzinel vaš oda, so chan abo pijen, abo vaš oda, hoj na doľikeren o inepi, o neve čhona abo o sabata.
17 Ada savoro sikavel ča pre oda, so majinďa te avel. Aľe furt džal ča pal o Kristus.
18 Den tumenge pozoris pre ola, save hine pokorna ča vaš oda, kaj pre lende te dikhen o manuša. Tiš pre ola, save služinen le aňjelenge, bo angle lende na chudena e odmena. Ajse manuša pes ľikeren ča olestar, so dikhle a thoven baripen andre oda sar rozmišľinen, the te nane andre soste te thovel baripen.
19 Ajso dženo pes na ľikerel le Kristostar, savo amen ľidžal.* O Kristus hino koda, so del oda, so kampel le ťeloske. Ov les thovel jekhetane avka sar hino o ťelos sphandlo le kokalenca the le šľachenca, kaj te barol avka sar kamel o Del.
20 Te muľan jekhetane le Kristoha a vaš oda tumen imar na chal ňič oleha sar rozmišľinel a so kerel ada svetos, ta soske akor dživen avka sar o svetos a šunen ajse lava:
21 „Ma chude, ma koštin, ma thov pre kada vast“?
22 Sem ada hino zathodo ča pre oda, so vakeren a so sikhľaren o manuša. A džal pal oda, so o manuša chan the pijen. Aľe paľis ada the avka našľola.
23 Šaj dičhol, hoj hin oda goďaver, aľe on služinen le Devleske avka sar lenge pasinel. Keren pestar, hoj hine pokorna. A vaš oda, hoj na džan proťi oda, so kamel lengero ťelos, ta lengero ťelos cerpinel.
Poznamki tele čijarkica
^ Abo hoj savoro džal le šoroha.
^ Abo te na chudel andre pasca.
^ Abo vaš, bijal, aščal, predal.
^ Doslovňe: hino šero.
^ Doslovňe: khosľa tele.
^ Dikh tuke buter adaj andro Slovňikos.
^ Dikh tuke buter adaj andro Slovňikos.
^ Abo bertenošen.
^ Doslovňe: savo hino amaro šero.
