Kolosanenge 3:1-25
3 Te tumenge o Del diňa pale o dživipen jekhetane le Kristoha, keren predal ada savoro, kaj te chuden oda, so tumen užarel andro ňebos. Odoj, kaj bešel o Kristus pal e Devleskeri pravo sera.
2 Furt rozmišľinen pal e naďej, savi tumen užarel* a na pal oda, so pes kerel pre phuv.
3 Sem sar te bi muľanas a tumaro dživipen uľahas garudo andro Kristus, bo oda avka kamľa o Del.
4 Sar o Kristus, savo del o dživipen,* sikavela peskeri zor, paľis the tumen leha tumen sikavena andre leskeri zor.
5 Vaš oda odčhiven tumendar koda, pre soste cirdel tumare ťeli, so bi ľidžalas ko lubipen,* ko džungaľipen, ke koda, hoj bi igen kamľanas te džal la džuvľaha abo le muršeha, hoj bi igen mišľinďanas pre oda, so hino nalačho, hoj bi kamľanas ča but a ňigda bi tumen na elas dos, bo kada hin o modlarstvo.
6 Te o manuša kada keren, o Del pre lende ela choľamen.
7 The tumen varekana ajso kerenas.
8 Aľe akana tumendar odčhiven e bari choľi, e ruš, o nalačhipen, o dukhade lava. Andal tumaro muj te na aven avri ňisave diline lava a aňi ňič džungalo.
9 Ma klaminen jekh avreske. Odčhiven tumendar koda, save sanas varekana the koda, so kerenas.
10 Chovinen tumen avka sar kamel o Del sar te bi avenas neve manuša. Ajse avaha akor, te mištes sprindžaraha le Devles a kavka pes pre amende buter presikavena le Devleskere vlastnosťi.
11 Bo imar hin jekh či oda ela Grekos abo Židos. Či oda ela občhindo abo kajso, savo nane občhindo, či kajso, savo hino andal aver phuv, či Skitos,* či otrokos abo slobodno. O Kristus hino upral savorende a amen sam leha zajekh.
12 Tumen, saven peske o Del kidňa avri, svata a saven rado dikhel: Mi el* tumenge jilestar pharo jekh pal aver, aven jileskere, pokorna. Sikaven, hoj džanen te ačhel pokojna a hoj džanen te užarel.
13 The te tumenge jekh pre avreste vareso vaďinel, mukhen oda avka a jilestar tumenge odmukhen, the te tumenge čačes vareko kerel dukh. Avka sar o Jehovas* jilestar odmukhľa tumenge avka the tumen odmukhen avrenge.
14 Aľe na ča kada. Presikaven* tumenge o kamiben, bo o kamiben čačes zorales sphandel le manušen.
15 Andre tumaro jilo tumen mi ľidžal le Kristoskero smirom, bo sanas kidne avri, kaj te aven sar te bi jekh ťelos a te dživen andro smirom. A sikaven, hoj san vďačna.
16 Koda, so o Ježiš sikhľarelas, tumenge mi džal zorales andro jilo a avka avena andre savoreste goďaver. Sikhľaren a podhazden jekhe avres kaleha, hoj giľavena o žalmi, o giľa, savenca ašaren a paľikeren le Devleske the aver giľenca pal o Del. Giľaven le Jehovaske* jilestar.
17 Savoro, so vakeren abo keren, keren andro menos le Rajeskero Ježišoskero a paľikeren prekal leste le Devleske le Dadeske.
18 Romňale, šunen tumare romen avka sar oda pes patrinel pre ola, so keren oda, so the o Raj.
19 Romale, kamen tumare romňijen a ma aven pre lende choľamen.
20 Čhavorale, šunen andre savoreste tumare dades the la da, bo kada pes pačinel le Rajeske.
21 Dadale, ma den choľi andre tumare čhave, kaj lenge te na el phares pro jilo.
22 Tumen, so san otroka, šunen tumare rajen calone jileha. Na šunen len ča akor, sar tumen dikhen averdžene. Ča vaš oda, kaj tumen te pačinen le manušenge. Aľe vaš oda, hoj daran le Jehovastar.*
23 Sa, so keren, keren calone jileha the zoraha sar te bi oda kerenas predal o Jehovas,* na predal o manuša.
24 Bo džanen, hoj chudena le Jehovastar* e odmena, savi phenďa, hoj tumenge dela. Služinen tumare Rajeske le Kristoske.
25 Koda ko kerel nalačho, leske ela dino pale vaš leskero nalačhipen. Andre kada o Del ňikaske na ľikerel e sera.
Poznamki tele čijarkica
^ Abo pre oda, so hin upre.
^ Doslovňe: Kristus amaro dživipen.
^ Po grecki porneia. Dikh tuke buter adaj andro Slovňikos.
^ Andre phurikaňi doba phenenas kada lav pre varekaste, pre kaste dikhenas tele angle oda sar pes chovinenas the angle lengere zviki.
^ Abo uren.
^ Dikh o dodatkos A5.
^ Abo uren.
^ Dikh o dodatkos A5.
^ Dikh o dodatkos A5.
^ Dikh o dodatkos A5.
^ Dikh o dodatkos A5.
