Kada pisinďa o Marek 15:1-47
15 Takoj sig tosara pes zgele o bare rašaja, o phuredera, ola, so sikhľaren andal o zakonos the calo sudos Sanhedrin, kaj pes te dothoven. Le Ježiš phandle, ľigende les het a dine les andro vasta le vladcaske Pilatoske.
2 O Pilat le Ježišostar phučľa: „Sal kraľis le Židengero?“ O Ježiš leske phenďa: „Korkoro oda phenes.“
3 O bare rašaja phenenas pro Ježiš but ajso, so nane čačipen.
4 O Pilat pale le Ježišostar phučľa: „Ňič na phenes? Tuke jekh, so savoro pal tute vakeren?“
5 O Ježiš pre kada imar ňič na phenďa. A o Pilat na achaľolas soske.
6 Pre dojekh inepos lenge o vladcas premukhelas jekhe hareštancos, saves kamle o manuša.
7 Akor sas andre harešta zaphandlo varesavo Barabaš. Bešenas leha tiš varesave manuša, save kerde vzbura proťi e vlada a paš oda varekas murdarde.
8 Avka avle pal o Pilat o manuša a kamle, kaj lenge te premukhel jekhe hareštancos. Avka sar oda furt kerelas pro inepos.
9 O Pilat lendar phučľa: „Kamen, kaj tumenge te premukhav le Židengere kraľis?“
10 O Pilat džanelas, hoj leske o bare rašaja dine le Ježiš andro vasta ča vaš oda, bo pre leste chanas choľi.
11 Aľe o bare rašaja kerde upre le manušen, kaj te phenen, mi premukhel le Barabaš.
12 O Pilat lendar pale phučľa: „So majinav akor te kerel oleha, saves vičinen kraľis le Židengero?“
13 Vičinenas pale: „Primar les pro drukos!“
14 Aľe o Pilat lenge phenďa: „Soske? So nalačho kerďa?“ O manuša kerenas mek bareder vika: „Primar les pro drukos!“
15 O Pilat pes lenge kamľa te guľarel. Avka premukhľa le Barabaš. Le Ježiš diňa te marel le bičoha a te primarel pro drukos.
16 Paľis le Pilatoskere slugadža ile le Ježiš andro Pilatoskero palacis. A vičinde ke leste savore slugadžen.
17 Urde pre leste lolo* plašťos, kerde koruna le kandrendar* a thode leske la pro šero.
18 Asanas lestar a vičinenas: „Dživ pro furt kraľina le Židengero!“
19 Marenas les le konariha pal o šero, čhungarkerenas pre leste a banďonas anglal leste.
20 Sar lestar preačhile te asal, čhide pal leste tele o lolo plašťos a urde pre leste leskero upruno uraviben. A ľigende les, kaj les te primaren pro drukos.
21 Džalas odarig jekh murš, savo pes vičinelas Šimon andal e Kirena. Ov sas dad le Aleksanderoskero the le Rufusoskero. Avelas pal o gav. Ispidle pre leste, kaj te ľidžal o drukos, pre savo majinďa te merel o Ježiš.
22 Avka le Ježiš ande pro than, savo pes vičinel Golgota, so znameňinel lebka.
23 Kamle les te del te pijel mol,* andre savi sas kirka bilinki. Aľe ov oda na kamľa te pijel.
24 Sar les primarde pro drukos, čhide losos, ko so peske lela leskere uprune uravibnastar.
25 Sas 9 ori tosara,* sar les primarde pro drukos.
26 Upral leskero šero pisinde: „O kraľis le Židengero“, kaj savore te džanen, soske muľa.
27 Jekhetane paš leste thode pro drukos the duje zloďejen. Jekhes pre pravo sera, avres pre ľavo sera.
28 *——
29 Ola, so odarig predžanas, leske rakinenas a asabnaha leske vakerenas: „Tu, kaj kamľal te aravel* tele o chramos a te kerel les pale tel o trin ďives.
30 So tut na zachraňines a na aves tele pal o drukos?“
31 Avka isto lestar asanas the o bare rašaja olenca, so sikhľaren andal o zakonos. Vakerenas maškar peste: „Avren zachraňinelas, aľe pes korkores našťi zachraňinel!
32 Mi avel tele pal drukos o Kristus o kraľis le Izraelčanengero! Sar kada dikhaha, paťaha.“ Mek až the ola, so sas primarde pro drukos khatar* leste, lestar asanas.
33 Pro dilos* avľa pre caľi phuv baro kaľipen a ľikerelas dži trine orendar.*
34 Trine orendar o Ježiš zorales zvičinďa: „Eli, Eli, lama sabachtani?“, so znameňinel: „Devla miro, Devla miro, soske man omukhľal?“
35 Varesave, so odoj terďonas, phende: „Šunen? Vičinel pro Elijaš.“
36 Jekh lendar avľa ke leste, thoďa e hubka andre šutľi mol, diňa la pre paľica, delas les te pijel a phenďa: „Užaren, dikhaha, či o Elijaš avela a či les lela tele pal o drukos.“
37 O Ježiš akor zorales zvičinďa a muľa.
38 O zavesis andro chramos čhinďiľa pro duj kotora. Upral dži tele.
39 Sar o dvostojňikos, savo terďolas anglo Ježiš dikhelas, so savoro pes ačhiľa, sar muľa o Ježiš, phenďa: „Kada manuš sas čačes le Devleskero čhavo.“
40 Dural pre kada dikhenas o romňija. Sas maškar lende e Marija Magdalena, e Marija (e daj le Jakuboskeri* the le Jozesoskeri) the e Salome.
41 On phirenas le Ježišoha andre služba a pomožinenas leske, sar sas andre Galileja. Sas odoj the but aver džuvľija, save leha avle andro Jeruzalem.
42 Ke raťate, jekh ďives anglal o sabat,
43 avľa o Jozef andal e Arimatija, saves sas baro lav pro židoviko nekbareder sudos. Ov tiš užarelas le Devleskero kraľišagos. Na daralas te džal pal o Pilat a te pomangel les, kaj leske te del le Ježišoskero ťelos.
44 Aľe sar kada o Pilat šunďa, kamľa te džanel či o Ježiš imar muľa. Avka peske vičinďa le dvostojňikos a phučľa lestar či hin oda čačipen.
45 Sar leske o dvostojňikos phenďa, hoj o Ježiš imar muľa, domukhľa le Jozefoske, kaj peske te lel le Ježišoskero ťelos.
46 O Jozef cinďa lačho pochtan.* Iľa leskero ťelos tele pal o drukos. Zapaťarďa les andre kada pochtan a thoďa les andre hrobka, savi sas kerďi andre skala. Paľis la zakerďa bare bareha.
47 A e Marija Magdalena the e Marija le Jozesoskeri daj dikhenas, kaj thode le Ježišoskero ťelos.
Poznamki tele čijarkica
^ Doslovňe: purpurovo. Kadi farba sikavelas pro barvaľipen, pre bari paťiv the pre oda, hoj vareko sas andal e kraľovsko fajta.
^ Abo le trňendar.
^ Abo vinos.
^ Doslovňe: trito ora.
^ Dikh o dodatkos A3.
^ Abo te čhivel tele, te zburinel.
^ Abo pašal.
^ Doslovňe: 6. oratar.
^ Doslovňe: dži 9. ora.
^ Mišľinel pes o Jakub Cikneder.
^ Abo lačhi latka.
