Rimanenge 7:1-25
7 Či na džanen phralale (vakerav olenge, save prindžaren o zakonos), hoj o manuš mušinel te šunel o Zakonos, ča medik* dživel?
2 Napriklad o zakonos phenel, hoj e romňi našťi del rozvod peskere romeha, medik ov dživel. Aľe te lakero rom merela, ta imar šaj džal romeste pal aver.
3 Aľe te lakero rom dživel a oj džala romeste pal aver, dikhela pes pre late, hoj kerel lubipen. Aľe te lakero rom merela a oj džala romeste pal aver, na dikhela pes pre late, hoj kerel lubipen.
4 Avka the tumen, phralale mire! Medik vladňinelas o Zakonos, sanas tel o Zakonos. Aľe akor, sar imar o Kristus diňa peskero dživipen* vaš o manuša, imar na san tel o Zakonos. Bo imar san oleskere, savo sas uštado andal o meriben. A vaš oda šaj keras oda, so anel le Devleske radišagos.
5 Bo sar kerahas oda, so kamelas amaro ťelos, ta o Zakonos sikaďa, hoj oda nalačho, pre soste cirdel amaro ťelos, paľis ľidžal ke oda, hoj o manuš kerel binos a hoj o binos amen ľidžal ko meriben.
6 Aľe akana imar na sam tel o Zakonos, bo les imar nane upral amende zor. Vaš oda na kamas te el otroka, bo amen ľidžal o Zakonos, aľe sam otroka vaš oda, bo amen ľidžal le Devleskero svato duchos.
7 Ta akor so phenaha? Hoj o Zakonos hino vareso nalačho? Ta kada isto na! Sem te na uľahas o Zakonos, na džanľomas, so’da hin o binos. Te na o Zakonos: „Na kameha oda, so hin avres.“ Ta na džanľomas, hoj hin nalačho te kamel oda, so hin avres.
8 Kada zakonos mange phundraďa* o jakha, hoj so hin čačes o binos a achaľiľom, pre savo nalačhipen man oda cirdel a hoj oda hin binos. Bo te na o Zakonos, ta ňiko na džanľahas, hoj kerel binos.
9 Varekana, sar mek na sas o Zakonos, ta mange mišľinavas, hoj našťi našavav o dživipen. Aľe sar avľa o Zakonos, sikaďa pes, so hin o binos a me achaľiľom, hoj som binošno a šaj merav.
10 Achaľiľom, hoj o Zakonos, savo majinďa te ľidžal ke oda, kaj o manuša te dživen, ľidžal ke oda, hoj o manuša meren.
11 Kada Zakonos mange phundraďa o jakha, hoj so hin čačes o binos. O binos man scirdňa a kaleha našaďom o dživipen.
12 Le Mojžišoskero zakonos hino svato a oda, so phenel, hino svato, spravodlivo the lačho.
13 Ta akor sar? Anďa mange o meriben oda, so hino lačho? Isto, hoj na! O binos kerel, hoj o manuš merel. O Zakonos hino lačho, aľe sikaďa, hoj hin oda o binos, so kerel, hoj o manuš merel. Andro Zakonos pes čačes sikavel, savo igen džungalo hino o binos.
14 Džanas, hoj le Mojžišoskero zakonos hino le Devlestar. Aľe me som ča manuš, savo hino otrokos oleske, hoj kerel bini.
15 Sem aňi na džanav, so kerav. Bo na kerav oda, so kamav, aľe oda, so mange džungľol.
16 Me džanav, hoj o Zakonos hino lačho, aľe furt kerav oda, so na kamav te kerel.
17 Aľe paľis oda nalačhipen imar na kerav me, aľe o binos, savo hino andre ma a savo man pre kada cirdel.
18 Me džanav, hoj som ča manuš a hoj andre mande* nane ňič lačho. Bo igen kamav te kerel oda, so hino lačho, aľe na džal mange oda avka sar bi kamavas.
19 Bo na kerav oda lačho, so kamav, aľe kerav oda nalačho, so na kamav.
20 Akor te kerav oda, so na kamav, ta imar oda na kerav me, aľe o binos, savo hino andre ma a savo man pre kada cirdel.
21 Avľom pre kada, hoj man ľidžal ada zakonos: Sar kamav te kerel oda, so hino lačho, dikhav pre ma, hoj man the avka cirdel te kerel oda, so hino nalačho.
22 Miro jilo igen džal pal o Devleskero zakonos.
23 Aľe dikhav, hoj mire ťelos ľidžal aver zakonos. Zakonos, savo kerel savoro proťi kada, kaj te na šunav miri goďi. A kada zakonos hino o binos, savo hino andre miro ťelos a savo man ľidžal ke oda, hoj som leskero otrokos.
24 Me čoro manuš! Ko man lela avri andal o vasta kale ťelostar, savo man ľidžal ko meriben?
25 Paľikerav le Devleske, savo man lela avri kale ťelostar prekal o Ježiš Kristus, amaro Raj! La goďaha som otrokos oleske, hoj šunav le Devleskero zakonos, aľe miro ťelos šunel oda zakonos, savo les ľidžal ko binos a kaleske hino otrokos.
Poznamki tele čijarkica
^ Abo pokim.
^ Doslovňe: ťelos.
^ Abo phuterďa, odkerďa.
^ Doslovňe: andre miro ťelos.
