Skutki – oda, so kerenas o apoštola 23:1-35
23 O Pavol pes rozdikhľa pal o Sanhendrin a phenďa: „Phralale, anglo Del bije dar šaj phenav, hoj calo časos dživav avka, kaj man miro jilo te na marel.“
2 Akor o nekbareder rašaj o Ananijaš phenďa olenge, so terďonas paš leste, kaj les te peken* pal o muj.
3 O Pavol leske phenďa: „O Del čhinela tut, tu dujemujengero!* Bešes adaj, kaj man te sudzines pal o Zakonos a tu korkoro na doľikeres o Zakonos, sar man des te marel?“
4 Ola, so terďonas paš o Pavol, leske phende: „Sar šaj rakines le Devleskere nekbaredere rašajiske?“
5 „Phralale, na džanľom, hoj hino nekbareder rašaj,“ phenďa o Pavol. „Bo hin pisimen: ‚Na rakineha oleske, savo ľidžal tiro ľudos.‘“
6 O Pavol džanelas, hoj pro sudos Sanhendrin hin jepaš džene saduceja a jepaš džene farizeja. Vaš oda zvičinďa: „Phralale, som farizejis, čhavo le farizejengero. A vaš oda, hoj paťav, hoj o manuš šaj ušťel andal o meriben, man sudzinen.“
7 Sar kada phenďa, o saduceja the o farizeja pes chudne maškar peste te vesekedinel.* O manuša paľis gele pro duj seri.
8 Bo o saduceja vakeren, hoj o manuš našťi ušťel andal o meriben. A na paťan aňi andro aňjela aňi andro duchi. Aľe o farizeja andre kada savoro paťan.
9 Chudne pre peste igen te vičinel. Varesave, so sikhľarenas andal o zakonos a sas le farizejenca, ušťile a zorales phende: „Kada manuš na kerďa ňič nalačho. So te leha vakerelas o duchos* abo o aňjelos?“
10 Sar o vesekedišagos barolas, o veľiťeľis chudňa te daral, hoj le Pavol murdarena. Phenďa le slugadženge, kaj te aven, kaj les te len het a te ľidžan les odoj, kaj bešen o slugadža.*
11 Raťi pes le Pavloske sikaďa o Raj a phenďa leske: „Ma dara! Avka sar pal mande mište vakerehas andro Jeruzalem, avka pal mande vakereha the andro Rim.“
12 Tosara pes maškar peste o Židi dothode. Koškerde pes, hoj na chana aňi na pijena, medik* le Pavol na murdarena.
13 Ola, so pes avka dothode, sas 40 džene.
14 Gele pal o bare rašaja the pal o phuredera a phende: „Koškerďam amen, hoj na chaha chaben, medik le Pavol na murdaraha.
15 Vaš oda tumen jekhetane olenca, so bešen pro sudos Sanhedrin, pomangen le veľiťeľis, kaj le Pavol te anel ke tumende. Kerena tumendar, hoj kamena mek buter te džanel kalestar, so kerďa. Amen les užaraha a sigeder sar avela ke tumende, les murdaraha.“
16 Aľe le Pavloskero sinovcos pes kalestar dodžanľa. Geľa odoj, kaj bešen o slugadža a phenďa savoro le Pavloske.
17 O Pavol peske vičinďa jekhe dvostojňikos a pomangľa les: „Ľidža kale terne čhas ko veľiťeľis, bo leske kamel vareso te phenel.“
18 Ov les iľa, anďa les ko veľiťeľis a phenďa: „O hareštancos Pavol peske man vičinďa a pomangľa man, kaj tuke te anav ale čhas. Bo tuke kamel vareso te phenel.“
19 O veľiťeľis chudľa le čhas le vastestar, iľa les pre sera a sar sas korkore, phučľa lestar: „So ajso mange kames te phenel?“
20 Ov phenďa: „O Židi pes dothode, hoj tut pomangena, kaj tajsa te anes le Pavol pro sudos Sanhedrin. Phenena, hoj kamena mek buter te džanel kalestar, so kerďa.
21 Aľe ma paťa lenge, bo pre leste užaren buter sar 40 murša, save pes koškerde, hoj na chana aňi na pijena, medik les na murdarena. Imar hine pripravimen a ča užaren, so tu pheneha.“
22 O veľiťeľis bičhaďa le čhas het a phenďa leske: „Pal kada, so mange phenďal, ňikaske ma phen.“
23 Vičinďa ke peste duje dvostojňiken a phenďa lenge: „Mi užaren raťi 9 orendar* 200 slugadža, 70 slugadža, save džana pro graja a 200 slugadža, saven ena andro vasta ošťepi. Džana andre Cezareja.
24 Len tumenca the le grajen a le Pavol ľidžana ko vladcas Feliks, avka kaj pes le Pavloske ňič te na ačhel.“
25 Paľis o veľiťeľis pisinďa kajso ľil:
26 „Me Klaudijus Lizijaš pisinav tuke le Bare rajeske, vladca Feliks: Av sasto* the bachtalo!
27 Kale muršes chudle o Židi a kamle les te murdarel. Aľe me the mire slugadža les lendar iľam a kavka na domukhľom, kaj les te murdaren, bo man dodžanľom, hoj hino Rimanos.
28 Vaš oda, hoj kamľom te džanel soske pre leste keren upre, anďom les anglal lengero sudos Sanhedrin.
29 Avľom pre oda, hoj pre leste keren upre ča vaš oda, so sikhľarel lengero Zakonos. Aľe ov na kerďa ňič ajso, vaš soske bi majinelas te merel abo te bešel harešta.
30 Vaš oda, hoj man dodžanľom, hoj les kamen te murdarel, takoj les bičhavav ke tute. A olenge, so pre leste keren upre, phenava, kaj te džan pal tute a tuke te phenen, so len hin proťi leste.“
31 O slugadža ile le Pavol. A kavka sar lenge phenďa o veľiťeľis, raťi les ľigende andro foros Antipatrida.
32 Pre aver ďives leha dureder le dromeha džanas ča o slugadža pro graja. Ola aver slugadža gele pale odoj, kaj bešenas.
33 O slugadža pro graja avle andre Cezareja, dine o ľil le vladcaske a dine leske le Pavol.
34 O vladcas peske o ľil pregenďa a phučľa le Pavlostar, khatar hino. Sar avľa pre kada, hoj hino andal e Cilicija,
35 phenďa: „Užarava, medik na avena ola, so pre tute kerde upre a paľis tut šunava avri.“ A phenďa, kaj te ačhel sar hareštancos andro Herodesoskero palacis.
Poznamki tele čijarkica
^ Abo te čhinen.
^ Doslovňe: Tu, so sal sar meľaľi fala, savi sas parňarďi avri!
^ Abo te halasinel, te hadinel.
^ Mišľinel pes duchovno osoba.
^ Abo andro kasarňi.
^ Abo pokim.
^ Doslovňe: trito ora raťi.
^ Abo zdravo.
