Skutki – oda, so kerenas o apoštola 24:1-27
24 Pal o pandž ďives avľa o nekbareder rašaj o Ananijaš varesave phurederenca the le pravňikoha Tertuloha. Phende le vladcaske, so len hin proťi o Pavol.
2 Sar le Pavol vičinde, o Tertulus chudňa te vakerel proťi o Pavol:
„Tu Baro raj Feliks, tuke paľikeras, hoj adaj šaj dživas andro baro smirom. A vaš oda, hoj tu džanes goďaverones te ľidžal kada narodos, ta pes amenge dživel furt feder a feder.
3 A paľikeras tuke vaš kada savoro, so predal amende keres.
4 Aľe kaj tut but te na zľikerav, av ajso lačho a šun amen avri, so tuke kamas te phenel.
5 Avľam pre kada, hoj kada murš hino predal o manuša sar ger.* Kerel vzburi maškar o savore Židi pal calo svetos. A tiš ľidžal kodi sekta,* savi pes vičinel Nazaretsko.
6 Mek až kamľa te meľarel o chramos a vaš oda les phandľam andre.
7 *——
8 Sar kale Pavlostar phučkereha, korkoro aveha pre kada, hoj koda, so proťi leste vakeras, hin čačipen.“
9 O Židi pes ko Tertulus pridene a phende, hoj oda hin avka sar ov vakerel.
10 Sar o vladcas sikaďa le Pavloske, kaj te vakerel, o Pavol phenďa:
„Džanav, hoj sudzines kada narodos imar but berša. A akana bi tuke rado phenavas sar oda manca čačes sas.
11 Šaj tuke phenen, hoj nane oleske buter sar 12 ďives, so avľom andro Jeruzalem te ašarel le Devles.
12 Ňiko man na dikhľa te dokerel pes varekaha andro chramos, aňi te kerel vzburi andro sinagogi abo andro foros.
13 Aňi kala manuša tumenge našťi phenen, hoj bi man vareko dikhľahas te kerel oda, so pal ma vakeren.
14 Aľe hin čačipen, hoj služinav le Devleske, andre savo paťanas amare dada, save dživenas čirla. A dživav pal oda, so sikhľarenas, choč pal kada phenen, hoj hin oda sekta. A paťav savoreske, so hino pisimen andro Zakonos the andre oda, so pisinde o Proroka.
15 Paťav le Devleske avka sar the kala murša, hoj ena uštade andal o meriben o lačhe the o nalačhe.*
16 Vaš oda kerav savoro, so hin andre miri zor, kaj man o jilo* te na marel aňi anglo Del aňi anglo manuša.
17 Pal o but berša avľom andro Jeruzalem, kaj le čorenge andal miro narodos te anav o love, save kidňam avri a kaj le Devleske te anav obeti.
18 Paš kada man arakhle andro chramos. Kerďom savoro, so phenel o Zakonos, kaj te avav čisto. A maškar o manuša na kerďom ňisave vzburi. Aľe sas odoj the varesave Židi andal e Azija.*
19 On bi majinenas anglal tute te terďol a te phenel, te len hin vareso proťi mande.
20 Aľe tiš kala manuša mi phenen, so ajso nalačho kerďom, te man ande až pro sudos Sanhedrin.
21 Ča olestar pes šaj chuden, so phenďom, sar terďuvavas maškar lende: ‚Hoj o manuš šaj ušťel andal o meriben a angle* kada man adaďives sudzinen!‘“
22 O Feliks, savo mište prindžarelas olen, so pes dine pro Rajeskero drom, len bičhaďa het le lavenca: „Koda, so hin maškar tumende, sudzinava až sar avela o veľiťeľis Lizijaš.“
23 O Feliks phenďa le dvostojňikoske, kaj o Pavol te ačhel andre vezba. Aľe kaj leske savoro te na zakazinel a te domukhel leskere kamaratenge, kaj leske te anen savoro, so leske kampela.
24 Pal varesave ďivesa avľa o Feliks peskera romňaha la Drusilaha, savi sas Židovka. Diňa peske te vičinel le Pavol a šunelas, so oda hin te paťal andro Kristus Ježiš.
25 Aľe sar o Pavol chudňa te vakerel pal oda, so hino lačho, pal oda sar pes te zľikerel a sar o Del sudzinela le manušen, ta o Feliks daranďiľa. Phenďa: „Buter imar ma vaker. Sar man ela časos, vičinava tut pale.“
26 O Feliks užarelas, hoj les o Pavol dela love a vaš oda pal leste buterval bičhaďa a vakerelas leha.
27 Pal o duj berš ačhiľa vladcaske pal o Feliks o Porcijus Festus. Aľe o Feliks pes kamľa te guľarel ko Židi a vaš oda mukhľa le Pavol andre harešta.
Poznamki tele čijarkica
^ Abo svrabos.
^ Dikh tuke buter adaj andro Slovňikos.
^ Dikh o dodatkos A3.
^ Abo: o spravodliva the o ňespravodliva.
^ Doslovňe: kaj man te el čisto svedomje anglo Del the anglo manuša.
^ Mišľinel pes varesavo kotor andal e Rimsko riša.
^ Abo vaš, bijal, aščal, predal.
