Titoske 2:1-15
2 Aľe tu sikhľar oda, so hino zathodo pro čačikano sikhľariben.
2 O phureder murša pes majinen te džanel te zľikerel andre savoreste a paš savoreste pes majinen te džanel te chovinel. Majinel pre lende te dičhol, hoj savoro keren goďaverones. Majinel len te el zoralo paťaviben, majinen rado te dikhel avren a te džanel te ľikerel avri andro pharipena.
3 Avka the o phureder romňija. Mi keren savoro avka, kaj te ašaren le Devles. Te na ohovarinkeren, te na pijen igen but mol,* aľe mi sikhľon lendar aver o lačho.
4 Mi sikhľaren terne romňijen, kaj rado te dikhen peskere romes the le čhaven,
5 kaj te en goďaver, kaj te en žuže* andre goďi the andro jilo, kaj pes te starinen pal peskere khera, kaj te en lačhe a kaj pes te den te ľidžal peskere romeha, kaj pes pal o Devleskero lav te na vakerel našukares.
6 Le ternedere muršenge dophen, kaj te en goďaver.
7 Tu korkoro ker oda, so hino lačho a av avrenge andre ada lačho priklados. O čačipen sikhľar avka, kaj te dičhol, hoj sal zoralo andro paťaviben.
8 Oda avka, hoj džaneha te vakerel lačhe lava, kaj tuke ňiko ňič te na čhivel pro jakha. Kaj pes ola, so proťi amende vakeren te ladžan a kaj paľis pre amende te na phenen vareso nalačho.
9 O otroka andre savoreste mi šunen peskere rajen. Mi keren oda, so pes lendar užarel, te na vakeren lenca bije paťiv
10 a te na občoren len. Aľe mi en ajse, kaj pes pre lende te del andre savoreste te zmukhel a avka sar te bi šukaľarenas o sikhľariben, savo hino amare Devlestar, savo amen zachraňinel.
11 Sem o Del sikaďa peskero baro lačhipen, savo zachraňinel savore le manušendar.
12 Sikhľarel amen, kaj amendar te odčhivas oda, so džal proťi o Del the sa nalačho andal o svetos. A kaj andre ada svetos* te dživas avka, kaj pre amende te dičhol, hoj keras goďaverones, hoj keras oda, so hino lačho andre Devleskere jakha* a hoj služinas le Devleske calone jileha.
13 A oda medik* užaras, sar zadživaha odi igen šukar naďej a sar o Nekbareder Del the amaro Zachrancas o Ježiš Kristus te sikaven peskero rajipen.
14 Ov vaš amenge diňa peskero dživipen, kaj amen te zachraňinel ole savore nalačhipnastar, savo keras andre amaro dživipen. A kaleha peske sar te bi žužarďahas o ľudos, savo patrinel ča leske a savo hino predal leste igen baro. Ľudos, savo calone jileha kamel te kerel o lačhipen.
15 Ada sikhľar. Avka avren podhazde the dophen lenge, bo tuke oda sas dino, kaj ada te keres. Ňiko pre tute te na dikhel tele.
Poznamki tele čijarkica
^ Abo vinos.
^ Abo čista.
^ Dikh tuke buter adaj andro Slovňikos.
^ Doslovňe: spravodlivo. Dikh tuke buter adaj andro Slovňikos.
^ Abo pokim.
