Titoske 3:1-15
3 Leper le phralenge, kaj te šunen le vladen the lengere bare šeren a kaj te en pripravimen furt te kerel o lačhipen.
2 Pal ňikaste te na vakeren našukares, te na vesekedinen pes,* aľe mi en goďaver. A ke savore manuša mi en ajse, hoj džanena te ačhel pokojna.
3 Sem the amen samas varekana sar diline. Na šunahas le Devles a diňam amen te scirdel pro nalačho drom. Samas otroka oleske, hoj kerahas oda, pre soste amen cirdelas amaro ťelos. Kamahas amenge ča te uživinel, samas nalačhe, zavidzinahas, samas džung manuša a jekh avres nanavidzinahas.
4 Aľe sar pes sikaďa, savo hino jileskero amaro Zachrancas o Del a sar rado dikhel le manušen,
5 zachraňinďa amen na vaš oda, hoj bi kerahas vareso lačho, aľe vaš oda, hoj hino kovlejileskero. Zachraňinďa amen avka, hoj sar te bi amen žužarďahas* a amen sar te bi chudňamas pale te dživel. A tiš prekal peskero svato duchos amendar kerďa sar te bi neve manušen.
6 Prekal o Ježiš Kristus amaro Zachrancas amen diňa but peskero svato duchos.
7 Kerďa oda, kaj te chudas oda dživipen pro furt, savo užaras. Bo angle* leskero baro lačhipen sas pre amende phendo, hoj keras oda, so hino lačho andre Devleskere jakha.*
8 Kale lavenge šaj paťas a kamav, kaj tut kalestar te ľikeres, kaj ola, save paťanďile andro Del te keren oda, so hin lačho. Ada hino predal o manuša lačho a anel ada chasna.
9 Ma av ajsenca, kaj pes anglo diliňipen vesekedinen, kaj vakeren ča pal oda, ko andal savi fajta hino, kaj pes dokeren pal o Zakonos, bo ada na anel ňisavi chasna a ke ňisoste na ľidžal.
10 Le manušeske, savo avrenge vakerel o falošno sikhľariben, mušines te dophenel. Ker oda jekhvar abo duvar. A te tut na šunela, ta ajse manušeha tut te na chal ňič.
11 Sem džanes, hoj ajso manuš geľa tele pal o lačho drom a kerel binos. Kaleha pes korkoro odsudzinel.
12 Sar ke tute bičhavava le Artemos abo le Tichikos, ker predal ada savoro, kaj pal ma te aves andro Nikopolis. Bo mange phenďom, hoj prekal o jevend ačhava odoj.
13 Le Zenos, savo mištes prindžarel o Zakonos the le Apolos lačhes pririchtin pro drom, kaj len te el savoro.
14 A the amare phrala mi sikhľon te kerel o lačhipen, kaj te džanen te pomožinel olenge, kaske kampel a kaj lendar te el chasna.
15 Pozdravinen tut savore, so hine manca. Pozdravin olen, save amen rado dikhen a save amenca hine andro paťaviben.
Mi presikavel tumenge savorenge o Del peskero baro lačhipen.
Poznamki tele čijarkica
^ Abo na keren, na halasinen, na hadinen.
^ Abo očisťinďahas.
^ Abo vaš, bijal, aščal, predal.
^ Doslovňe: hoj sam spravodliva. Dikh tuke buter adaj andro Slovňikos.
