Andre kala ďivesa šunas furt buter, hoj pes ačhiľa varesavi prirodno bibacht. Te pes oda ačhel, kampel, kaj sako te džanel, savi buťi kerela. Oda kampel te kerel sig a te na našavel hijaba but love. Vašoda o veduco zboros kerďa, kaj te el andre dojekh pobočka e kancelarňa predal e pomoca paš e prirodno bibacht.

Sar o phrala andre kadi kancelarňa šunen, hoj pes ačhiľa e bibacht, minďar phučen le zborove phurederendar, so hine odarig, sar kampel te pomožinel le phralenge pheňenge. Te dičhol, hoj o kheratune phrala pheňa na džanena korkore savoro te prikerel, kadi kancelarňa kidel avri le phralen, save oda ľidžana. Kala phrala šaj mangen la pobočkatar, mi aven odoj o džene, save kamen te pomožinel abo kaj te bičhaven oda, so kampel. Abo šaj oda cinen korkore.

Soske hin igen lačhes, hoj pes oda avka kerel? Na kerel pes duvar oda isto, na chal oda ajci love the na ačhela pes, hoj o phrala the pheňa na džanena, so te kerel. Kada savoro pes šaj ačhel, te sako kerel korkoro pestar.

Kala phrala, so hine kidle avri, džanen te phenel, keci love the keci dženen kampela. Tiš šaj vakeren le rajenca pal o foros, save šaj pomožinen, kaj e buťi te džal sigeder. Vašoda nane lačhes, te vareko kidel avri o love, bičhavel vareso, abo džal odoj te pomožinel, te les o phrala na mangle.

Pre aver sera, te pes ačhel e bibacht, kamas te pomožinel. (Heb 13:16) Rado dikhas amare phralen! So šaj keras? Nekbuter kampel, kaj pes te modľinas vaš ola, pre save avľa e bibacht the vaš ola, so lenge pomožinen. Tiš šaj das o love pre amari buťi pal calo svetos. O pobočki ľidžal o veduco zboros. O phrala andro pobočki džanen nekfeder te phenel, kaj kala love kerena nekbuter lačhipen. Te kamas the amen te džal a te pomožinel odoj, kaj pes vareso ačhiľa, šaj das te džanel le phralenge avka, hoj pisinas avri Prihláška dobrovoľníka miestneho projekčného a stavebného oddelenia (DC-50).

DIKHEN O VIDEJO ANDRE BRAZILIJA AVĽA IGEN BARO PAŇI A PAĽIS VAKEREN JEKHETANE:

So tut chudňa jilestar pre oda, sar le Jehovaskere svedki pomožinenas pal o baro paňi andre Brazilija andro berš 2020?