O Jehovas imar buter na užarela, kana zňičinela kada svetos. Savore falošna vjeri ena odčhide, o dothode narodi džana pre Devleskero ľudos a o Jehovas zňičinela savore nalačhen andro Armagedon. Amen sar Devleskero ľudos imar našťi pes doužaras pre kala bare ďivesa.

So šaj phenas kije oda? Na džanas savoro pal ola ďivesa. Na džanas, kana oda ela. Tiš na džanas, so phenena o narodi pal oda, soske džan pro falošna vjeri. Na džanas, keci časos a sar presňe pre amende o dothode narodi džana. Tiš na džanas, sar presňe o Jehovas lela o dživipen le nalačhe manušenge andro Armagedon.

Aľe andal e Biblija džanas ajci, keci amenge kampel, kaj te na daras olestar, so amen užarel. Džanas, hoj dživas pro agor „le agorutne ďivesenge“. (2Ti 3:1) Džanas, hoj ola ďivesa, kana džana pre savore vjeri, ena „charneder“, kaj te na el zňičimen the le Devleskero ľudos. (Mat 24:22) Džanas, hoj o Jehovas peskero ľudos zachraňinela. (2Pe 2:9) Tiš džanas, hoj o Jehovas iľa avri le Ježiš, kaj te zachraňinel leskero ľudos, the kaj te zňičinel le nalačhen andro Armagedon. A džanas, hoj o Ježiš hino čačipnaskero the zoralo. (Zj 19:11, 15, 16)

Sar dikhena o manuša, so pes kerel, „odperena daratar“. Aľe amen andal e Biblija džanas, so amen užarel, the sar o Jehovas imar zachraňinelas peskero ľudos. Vašoda, te pal oda genas the premišľinas, šaj „ušťas upre rovnones the hazdas upre o šere“, bo sam peske ista, hoj amari zachrana hin pašes. (Luk 21:26, 28)