SAR dikhes o spravi andre televiza, šunes len andro radijos, abo len genes andro novini, dikhes a šunes, hoj barol kriminalita, hin vojni the terorizmus. Možno tut trapines, bo sal nasvalo, abo tuke muľa vareko, kas rado dikhehas.

Phučes:

• Kamelas o Del, kaj te zadživav me the miri fameľija ajse pharipena?

• Kaj šaj arakhas radi, so te kerel mire problemenca?

• Ela amen varekana šukar dživipen?

Andre Biblija šaj arakhes o čačipen pal oda, so kames te džanel.

• O manuša imar na rovena dukhatar, na phuruvena, aňi na merena (Zjavenie 21:4)

• „O bango pro pindre chuťkerela dur sar o jeleňis.“ (Izaiáš 35:6)

• „O kore dikhena.“ (Izaiáš 35:5)

•  Ola, so mule, pale dživena. (Ján 5:28, 29)

• Ňiko na ela nasvalo. (Izaiáš 33:24)

• Savore manušen pre phuv ela, so te chal. (Žalm 72:16)

But manuša, sar dikhen ala obrazki, peske phenen, hoj ada hin ča rozpravka. Ale o Del sľubinel, hoj pes kada savoro pre phuv so neksigeder ačhela a e Biblija sikavel, sar o Del ada savoro kerela.

E Biblija na sikavel ča ada. Sikavel amen, sar šaj avas bachtale imar akana! Phen, save veci tut trapinen? Nane tut love? Hin tuke namište angle tiri fameľija? Trapinel tut varesavo nasvaľiben? Muľa tuke vareko, kas rado dikhehas? E Biblija šaj tuke pomožinel tire problemenca. Andre Biblija šaj arakhes, sar te odphenel pre ala otazki:

• Soske amen hin trapišagos andro dživipen?

• So šaj keras, te amen hin problemi?

• So šaj keras, kaj amari fameľija te el bachtaľi?

• So amenca ela pal o meriben?

• Arakhaha pes varekana pale olenca, so mule?

• Soske šaj paťas, hoj o Del kerela savoro, so sľubinďa?

 Imar ada, hoj genes adi kňižka, sikavel, hoj kames te džanel, so e Biblija pisinel. Adi kňižka tuke pomožinela. Hin andre but otazki a andro odseki arakheha, sar e Biblija pre lende odphenel. Milijoni manušenge pomožinel ada, hoj študinen e Biblija le Jehovaskere svedkenca. Paťas, hoj the tu chudeha te študinel. Mi požehňinel tuke o Del, kaj savoro, so šaj sikhľos andal e Biblija, tuke te pomožinel te sprindžarel o čačipen!