O Del kamel, hoj o manuša pes kije leste te modľinen. (Žalmy 65:2) O Del na kamel te šunel savore modlitbi. Napriklad, te vareko hino furt choľamen pre peskri romňi the marel la, leskre modlitbi na dodžan kijo Del. (1. Petra 3:7) Te o Izraelčana kernas nalačhipen, aňi lengre modlitbi le Devleske na sas pre dzeka. Ada hin igen baro, hoj o Del rado šunel, sar leha vakeras! O Del šunel the ajse manušes, so kerdžas bare bini, ale bajinel a imar peskre bini buter na kamel te kerel. Pregenen Izaiáš 1:15; 55:7.

Dikh o videjo Šunel avri o Del savore modľitbi?

Ko kamel te služinel le Jehovaske, modľinel pes ča ke leste, bo ov amen stvorindžas. (Matúš 4:10; 6:9) Sar ňedokonala mušinas pes te modľinel andro nav le Ježišoskro, bo ov muľas vaš amare bini. (Ján 14:6) O Jehovas na kamel, hoj pes te modľinas furt ola ista lava te sikhľuvas o modlitbi, save vareko zapisindžas andro modliťebna kňižki. O Del kamel, hoj pes te modľinas peskre lavenca andal o jilo. Pregenen Matúš 6:7; Filipanom 4:6, 7.

O Del šunel the te pes modľinas andre amari godži bijo hangos. (1. Samuelova 1:12, 13) Šaj pes modľinas kana kamas. Napriklad tosara sar ušťas, rači sar džas te sovel, angle ada, sar džas te chal the akor, sar sam andro pharipen. Pregenen Žalmy 55:22; Matúš 15:36.

Te dživel avke, sar kamel o Del, hin phares, bo dživas maškar o nipi, so na pačan andro Del the asan olestar, hoj kamel te kerel pre phuv o rajos. (2. Timotejovi 3:1, 4; 2. Petra 3:3, 13) Vašoda amenge kampel le manušen,  so pačan zorales andro Del, hoj amen te den zor te ľikerel avri o pharipen a amen šaj das zor len. Pregenen Hebrejom 10:24, 25.

Te phiras le manušenca, so kamen le Devles, pomožinel amenge te el pašeder kijo Del. Pro than, kaj pes zdžan Jehovaskre svedki, šaj dikhas manušen, so pačan le Devleske andal calo jilo. Ada amen del zor. Pregenen Rimanom 1:11, 12.

Šaj aven pašeder kijo Del avka, te gondoľinen čiže mišľinen pal oda, so sikhľon andal e Biblija. Gondoľinen pal le Devleskri buči the pal oda, so sľubindžas, hoj kerla. Sprindžarena avke le Devleskro kamiben the e godži. Akor ela o Del mek pašeder kijo tumaro jilo. Pregenen Jozua 1:8; Žalmy 1:1–3.

Ačhena pašeder kijo Del ča akor, te pačan, hoj o Del dživel, ale thiš pačan oleske, so phenel. O pačaňiben čiže vijera hin sar kvitka. Te pes pal late na starinas, ta šuťol. Mušinen furt tumen te starinel pal peskro pačaňiben avka, te gondoľinena pal o dvovodi, soske pačan le Devleske. Pregenen Matúš 4:4; Hebrejom 11:1, 6.

O Jehovas pes starinel pal ola, so les kamen andal calo jilo. Šaj len chraňinel angle savoro, soha šaj našaven e vijera vaj dživipen pro furt andro nevo svetos. (Žalmy 91:1, 2, 7–10) Phenel amenge, pre soste peske mušinas te del pozoris, hoj pes te na dochudas andro pharipena. O Jehovas sikavel nekfeder drom, sar te dživel. Pregenen Žalmy 73:27, 28; Jakub 4:4, 8.