LEKCIJA 3
Šaj paťas la Biblijake?
Andre Biblija hin but šukar sľubi the lačhe lava andro dživipen. Šaj el, hoj andre late arakheha vareso, andre soste phares paťaha. So phenes, hin čačipen, so pisinel e Biblija? Se hiňi igen phurikaňi! Šaj čačeste paťas, hoj zadživaha ajso dživipen, pal savo vakerel e Biblija? But manuša oleske paťan. Džas peske pal ada te dikhel buter.
1) Hin andre Biblija čačipen abo ča vimišľimen lava?
E Biblija korkori phenel, hoj savoro, so hin andre late, hin „čačipnaskere lava.“ (Kazateľ 12:10) Pisinel pal oda, so pes čačes ačhiľa a pal o manuša, so čačes dživenas. (Pregen Lukáš 1:3; 3:1, 2) But goďaver manuša, so sikhľon oda, so sas čirla, phenen, hoj savoro, so hin andre Biblija pal o datumi, manuša, thana the koda, so sas, hin čačipen.
2) Soske šaj phenas, hoj andre Biblija sas furt čačipen?
E Biblija vakerelas o čačipen imar sigeder, sar pre oda avle o manuša. Las peske e priroda. Avľa pes pre oda, hoj le manušen, so pisinenas andre čirlatuňi doba pal e priroda, na sas čačipen. Ola, so adaďives achaľon la prirodake phenen, hoj e Biblija pal e priroda vakerel čačipen. E Biblija pal peskere lava pisinel „šaj lenge paťas pro furt.“ (Žalm 111:8)
3) Soske šaj paťas, hoj zadživaha oda lačhipen, pal savo vakerel e Biblija?
Andre Biblija hin proroctva, a save vakeren „pal oda, so pes mek na ačhiľa.“ (Izaiáš 46:10) But berša anglal pisinďa, sar doperena o kraľa the o narodi. Tiš pisinel sar dičhola o svetos andre amare ďivesa. Andre kadi lekcija peske pal ala proroctva phenaha buter. Chudela tut jilestar, kana dikheha, sar oda savoro andre peste zaperel!
DODŽAN TUT BUTER
Sar ola, so sikhľon pal e priroda hine zajekh oleha, so vakerel e Biblija. Mek peske dikhaha buter pal varesave proroctva, so hine andre Biblija.
4) E priroda hiňi zajekh la Biblijaha
Andre čirlatuňi doba o manuša paťanas, hoj e phuv pre varesoste figinel. Mukh o VIDEJO.
Dikh, so sas pisimen andre kňižka Jób anglo 3500 berša. Pregen Jób 26:7 a vakeren jekhetane:
-
So pes dodžanas pal e Biblija, te genas, hoj „e phuv figinel pre ňisoste“?
O manuša mekča 200 berša džanen, khatar pes lel o paňi. Aľe dikh, so e Biblija pisinďa ezera berša sigeder. Pregen Jób 36:27, 28 a vakeren jekhetane:
-
Sar oda, hoj adaj hin pisimen, khatar pes lel o paňi?
-
Paťas la Biblijake mek buter, sar genes ala lava?
5) E Biblija phenel anglal, so pes ačhela
Pregen Izaiáš 44:27–45:2 a vakeren jekhetane:
-
So phenďa e Biblija 200 berša angal pal oda, sar ela domardo o Babilon?
Oda, so sas čirla sikavel, hoj perziko kraľis Cirus peskere slugadženca zaile o foros Babilon andro berš 539 anglo Kristus. b Cikňarde o paňi, so sas khatar o foros. Sar pes dochudle andre, o brani sas phundrade a vašoda zaile o foros bijo mariben. Pregele imar 2500 berša, aľe le Babilonostar hine furt ča bara.
Pregen Izaiáš 13:19, 20 a vakeren jekhetane:
-
So pes ačhiľa le Babilonoha, avka sar sas pal leste phendo?
O Babilon adaďives andro Irak
6) E Biblija phenďa, so pes kerela andre amare ďivesa
E Biblija vakerel, hoj dživas andre „agorutna ďivesa.“ (2. Timotejovi 3:1) Dodžan tut, so pes akor kerela.
Pregen Matúš 24:6, 7 a vakeren jekhetane:
-
Sar e Biblija sikavel, hoj dživas andro agorutna ďivesa?
Pregen 2. Timotejovi 3:1–5 a vakeren jekhetane:
-
Save ena o manuša andro agorutna ďivesa?
-
Hin ajse manuša khatar tute?
VAREKO ŠAJ PHENEL: „Ko džanel či hin andre Biblija savoro čačipen.“
-
Soske tu paťas, hoj andre Biblija hin čačipen?
SO SIKHĽIĽAM
Oda, so sas čirla the priroda the o proroctva sikaven, hoj tu šaj paťas la Biblijake.
So bi phenehas
-
Hin andre Biblija čačipen abo ča vimišľimen lava?
-
Sar e priroda sikavel, hoj andre Biblija hin čačipen?
-
So phenes, zadživaha oda lačhipen, pal savo vakerel e Biblija?
DIKH TUKE BUTER
Hin zajekh e priroda la Biblijaha?
„Je Biblia v súlade s vedeckými poznatkami?“ (arakheha pro jw.org)
So sikavel, hoj dživas andro agorutna ďivesa?
„6 biblických proroctiev, ktoré sa spĺňajú pred vašimi očami“ (Strážna veža z 1. mája 2011)
So šaj sikhľuvas olestar sar dopele o lava pal nekzoraleder greciko vlada.
Pregen tuke sar pes jekhe muršeske prekerďa o dživipen, sar chudľa te sikhľol e Biblija.
Dikh the pre ada
SO O MANUŠA KAMEN TE DŽANEL
So oda hin te sikhľol la Biblijatar?
Te kavka sikhľona la Biblijatar le Jehovaskere svedkenca, šaj genen andal e Biblija, savi tumen kamen. Šaj vičinen la fajta, le kamaraten abo kas kamen.
