LEKCIJA 16
So kerelas o Ježiš, sar dživelas pre phuv?
But manuša prindžaren le Ježiš ča sar cikne čhavores abo sar oles, so but cerpinelas, kana merelas. A vareko phenel, hoj sas ča varesavo goďaver manuš. Aľe olestar sar dživelas, peske šaj las igen but. Soske? Andre adi lekcija dikhaha, savi igen bari buťi kerelas o Ježiš a so oda anel tuke.
1) Savi bari buťi kerelas o Ježiš?
Le Ježišoskeri buťi sas „te vakerel lačhi sprava pal o Devleskero kraľišagos.“ (Pregen Lukáš 4:43) Vakerelas le manušenge, hoj o Del kerela kraľišagos (vlada), so odčhivela savore manušengere pharipena. a Adi buťi kerelas cale jilestar trin the jepaš berš. Kamelas, kaj so nekbuter manuša te džanen, savo lačhipen le Devlestar len užarel. (Matúš 9:35)
2) So amenge sikade le Ježišoskere zazraki?
E Biblija phenel, hoj o Del diňa le Ježišoske zor, kaj te kerel „bare skutki, zazraki the znameňa.“ (Skutky 2:22) O Ježiš džanelas te zaačhavel bari balvaj, čaľarelas but ezera manušen, sasťarelas le nasvalen a tiš džanelas te uštavel andal o meriben. (Matúš 8:23–27; 14:15–21; Marek 6:56; Lukáš 7:11–17) Ola zazraki, so kerelas o Ježiš, sikavenas, hoj sas oda o Del, ko les bičhaďa. Olestar sikhľuvas, hoj le Jehovas hin zor te odčhivel savore pharipena.
3) So amen sikhľarel le Ježišoskero dživipen?
O Ježiš furt jilestar šunelas le Jehovas andre savoreste. (Pregen Ján 8:29) The akor, sar pre leste džanas. Vernones, dži andro meriben kerelas sa, so lestar užarelas leskero Dad. Olestar sikhľuvas, hoj šaj ačhas verna le Devleske, choč (he te) sam andro pharipena. Leskero dživipen amenge sikaďa o drom „te kerel avke, sar kerelas ov.“ (1. Petra 2:21)
DODŽAN TUT BUTER
So kerelas o Ježiš, kaj e lačhi sprava te chudel le manušengere jile? Soske džanelas te kerel zazraki?
4) O Ježiš vakerelas lačhi sprava
O Ježiš kerďa but kilometri pindrenca, kaj pes te dochudel ko nekbuter džene. Pregen Lukáš 8:1 a paľis vakeren jekhetane:
-
Vakerelas o Ježiš lačhi sprava ča olenge, so korkore avle pal leste?
-
So savoro kerelas o Ježiš, kaj te vakerel avrenca?
O Del phenďa anglal, hoj o Mesijašis vakerela ajse lava, so avren podhazdena. Pregen Izaiáš 61:1, 2 a paľis vakeren jekhetane:
-
Kerelas o Ježiš avka, sar hin adaj pisimen?
-
So phenes, kampel adaďives le manušenge te šunel tiš ajsi lačhi sprava le Devlestar?
5) Le Ježišoskere lava keren amaro dživipen feder!
O Ježiš na ča vakerelas pal o Devleskero kraľišagos, aľe tiš sikhľarelas lačhe lavenca, sar te dživel. Dikh, save goďaver lava phenďa, sar sas pro jekh heďos (verchos). Pregen Matúš 6:14, 34 the 7:12 a paľis vakeren jekhetane:
-
Save goďaver lava adaj phenďa o Ježiš?
-
Mišľines, hoj hin ala lava lačhe the adaďives?
6) Le Ježišoskere zazraki
O Jehovas diňa le Ježišoske zor, kaj te kerel but zazraki. Dikh, so pes ačhiľa. Pregen Marek 5:25–34 abo mukh o VIDEJO. Paľis vakeren jekhetane.
-
Andre soste paťalas nasvaľi džuvľi?
-
So tut chudňa jilestar pre ada zazrakos?
Pregen Ján 5:36 a paľis vakeren jekhetane:
-
So sikade o zazraki, save kerelas o Ježiš?
Džanehas?
Nekbuter pes dodžanaha pal o Ježiš, te genaha la Biblijatar štar kňižki – Matúš, Marek, Lukáš the Ján. Andre dojekh kňižka arakheha vareso nevo pal o Ježiš. Te tuke pregeneha savore štar kňižki, sar te dikhľahas jekh šukar mozi (kinos) pal o Ježiš.
-
MATÚŠ
hin peršo kňižka pal o Ježiš. Dodžanas pes latar, so sikhľarelas o Ježiš pal o dživipen the pal o Devleskero kraľišagos.
-
MAREK
hin nekcikneder kňižka pal o Ježiš. Aľe ola pribehi, so hin andre late tut chudena le jilestar.
-
LUKÁŠ
amenge sikavel, so phenelas o Ježiš pal e modľitba u sar dikhelas pro džuvľija.
-
JÁN
pisinel but pal oda, sar vakerelas o Ježiš avrenca – olenca, so rado dikhelas the aver manušenca. Olestar sprindžareha, savo sas o Ježiš.
VAREKO ŠAJ PHENEL: „O Ježiš hino o Del.“
-
Tu so pre oda phenes?
SO SIKHĽIĽAM
O Ježiš vakerelas pal o Devleskero kraľišagos. Kerelas zazraki. A šunelas le Jehovas, kana sas lačhes the nalačhes.
So bi phenehas
-
Savi bari buťi kerelas o Ježiš, sar dživelas pre phuv?
-
So amenge sikade le Ježišoskere zazraki?
-
Le Ježišoskere lava keren amaro dživipen feder. Sar?
DIKH TUKE BUTER
Pal soste nekbuter vakerelas o Ježiš?
„Božie Kráľovstvo – čo znamená pre Ježiša?“ (Strážna veža z 1. októbra 2014)
Pregen tuke, soske šaj paťas, hoj o Ježiš čačes kerelas zazraki.
„Ježišove zázraky – čo sa z nich môžeme naučiť?“ (Strážna veža z 15. júla 2004)
Pregen tuke, sar pes jekhe muršeske prekerďa o dživipen, te pes dodžanľa, savo sas o Ježiš ko manuša.
Pregen tuke pal o Ježišoskero dživipen pre phuv, akorestar, so uľiľa.
„Hlavné udalosti z Ježišovho života na zemi“ (Biblia – Preklad nového sveta Dodatok A7)
a Andro lekciji 31–33 peske phenaha buter pal o Devleskero kraľišagos.
Dikh the pre ada
SO O MANUŠA KAMEN TE DŽANEL
So oda hin te sikhľol la Biblijatar?
Te kavka sikhľona la Biblijatar le Jehovaskere svedkenca, šaj genen andal e Biblija, savi tumen kamen. Šaj vičinen la fajta, le kamaraten abo kas kamen.
