Lačhi daj rado dikhel peskere čhaven. Vašoda, kana tavel, kamel, kaj sa te el žužo: o chaben, o pira, o taňira the o than, kaj chan. Paľis hine o čhave saste a aver dikhen, hoj len hin daj dad, so lendar bajinen (pes starinen). The o Jehovas sar lačho Dad kamel, kaj te avas žuže amen a the amari goďi the o jilo. Te sam žuže, sam sasteder a ašaras oleha le Jehovas.

1) Sar šaj sikavas, hoj sam žuže?

O Jehovas amenge phenel: „Aven svata.“ (1. Petra 1:16) Te el svata hin, hoj sam žuže amen, amari goďi the o jilo. So oda hin, hoj sam žuže? Thovas pes avri (morkeras pes), rajbinas o uraviben, pratinkeras o kher the khatar (pašal) o kher the o motoris. Tiš pes starinas pal o kher, kaj phiras pro zhromažďeňe. Te ada savoro keras, ašaras le Jehovas. (2. Korinťanom 6:3, 4)

2) Save maňirenca kampel te preačhel, te kamas te el žuže?

O Del andre Biblija phenel, kaj pes te „žužaras savorestar, so meľarel andre o ťelos the o duchos.“ (2. Korinťanom 7:1 NZ) Na kamas te kerel ňič, so mosarel (meľarel) amaro ťelos the goďi. Kamas te kerel le Jehovaske radišagos oleha, pal soste rozmišľinas. Vašoda na mukhas andro šero ňič džungalo, sostar bi le Jehovas dukhalas o jilo. (Žalm 104:34) Tiš peske kamas te del pozoris sar a pal soste das duma. (Pregen Kolosanom 3:8)

Kana bi mek uľamas andre Jehovaskere jakha melale? Te vareko pijel cigaretľi, fetinel, abo droginel, mosarel peskero ťelos. Ko na kerel ňič olestar, ela sasteder a sikavela, hoj dikhel pro dživipen sar pro daros le Devlestar. Te vareko na mukhel andre goďi aňi andro jilo ňisavo džungaľipen, na kerela ňič, so bi les ľidžalas ke kajse džungale maňira (zlozviki) sar hin te kerel peske lačhes (masturbacija) abo te dikhel pro nangipen (pornografija). (Žalm 119:37; Efezanom 5:5) Varekaske hin phares te preačhel ajse nalačhe (phuje) maňirenca, aľe le Jehovaskera zoraha pes oda del. (Pregen Izaiáš 41:13)

 DODŽAN TUT BUTER

3) Te sam žuže, keras le Jehovaske baripen

Feder achaľuvas sar o Jehovas dikhel pro žužipen, te genas o zakonos, so diňa le Židenge. Pregen 2. Mojžišova 19:10 the 30:17–19 a paľis vakeren jekhetane:

• Sar pal ala lava o Jehovas dikhel pro žužipen?

• So tuke pomožinela te el žužo?

Pro žužipen amenge kampel časos the zor. Na džal pal oda, kaj dživas abo či amen hin o love. Mukh o VIDEJO a paľis vakeren jekhetane.

• Soske o manuša sigeder šunena amendar o čačipen pal o Jehovas, te dikhen, hoj sa, so amen hin, hino žužo?

4) Preačh le nalačhe maňirenca

Te pijes cigaretľi abo fetines džanes, hoj hin phari buťi oleha te preačhel. So tuke pomožinela? Rozmišľin, so tuha kola maňira keren. Pregen Matúš 22:37–39 a vakeren jekhetane, so o cigaretľi the o drogi keren...

• tire kamibnaha kijo Jehovas

• tira fameľijaha the aver manušenca

Phen peske, so kereha, kaj te preačhes le nalačhe maňirenca. a Mukh o VIDEJO.

Pregen 2. Korinťanom 4:7 a paľis vakeren jekhetane:

• Sar tuke pomožinela te odčhivel pestar o džungale maňira, te tut furt modľineha, študineha e Biblija u phireha pro zhromažďeňa?

 5) Ma mukh andre goďi ňič, so ľidžal ko džungaľipen!

Pregen Kolosanom 3:5 a paľis vakeren jekhetane:

• Sar džanas, hoj le Jehovaske džungľol, te vareko kerel sexting b, abo les cirdel te dikhel pro nangipen (pornografija), abo te kerel peske lačhes (masturbacija)?

• Mišľines tuke, hoj šaj avas žuže avka sar amendar užarel o Jehovas? Soske?

Dodžan tut sar te na mukhel andre goďi ňič, so bi ľidžalas ko džungaľipen. Mukh o VIDEJO.

O Ježiš phenďa ajse lava, savendar dičhol, hoj amen musaj te kerel sa, so kampel, kaj te ačhas žuže andre goďi the andro jilo. Pregen Matúš 5:29, 30 a paľis vakeren jekhetane:

• O Ježiš na mišľinďa, hoj amenge kampel čačes te odčhinel o vast abo te lel avri e jakh. Kamľa te phenel, hoj o dženo, saves cirdel o džungaľipen, musaj sig te odčhivel la goďatar sa, so nane žužo. Sar? c

Te tut andre goďi cirdel pro džungaľipen, aľe na poddes tut oleske, o Jehovas hin andre tute barikano. Pregen Žalm 103:13, 14 a paľis vakeren jekhetane:

• Sar tuke ala lava den zor, te tut mares le nalačhe maňirenca?

 SO SIKHĽIĽAM

Te sam žuže amen, amari goďi the savoro, so keras, o Jehovas hin pre amende barikano.

So bi phenehas

• Soske amenge kampel te el žuže?

• Sar šaj sikavas, hoj sam žuže amen the sa khatar amende?

• So kampel te kerel, kaj te ačhas žuže andre goďi the andre savoreste, so keras?