Te pes o terno la terňaha len, kamen te el bachtale pro furt, na ča oda ďives. A čačes šaj en bachtale! Sar? Ola phrala pheňa, so hine but berša veradune, phenen, hoj hin len lačho dživipen vaš oda, bo doľikeren le Jehovaskere lava andal e Biblija.

1) So o Jehovas phenel le romeske?

O Jehovas thoďa le romeske pro šero, kaj pes te starinel pal peskeri fameľija. (Pregen Efezanom 5:23) Aľe užarel, hoj ada kerela, so nekfeder. E Biblija lenge phenel: „Kamen peskere romňijen.“ (Efezanom 5:25) Sar? Lačho rom pes šukares ľikerel ke peskeri romňi. Na ča anglal o manuša, aľe the khere. Na podceňinel la. Starinel pes, kaj pes lake ňič te na ačhel. Kaj andro kher te el, so kampel, či o love abo o chaben. Kerel, kaj lake te el mište pro jilo a kaj te ciťinel, hoj la kamel. (1. Timotejovi 5:8) Aľe oda nane savoro. Nekbareder, so kerel, hin, hoj pes laha modľinel a genel e Biblija. (Matúš 4:4) Avka lakero kamiben kijo Jehovas barol. A te kada savoro kerel, ta hino lačho le Jehovaha. (Pregen 1. Petra 3:7)

2) So e Biblija phenel la romňake?

E romňi „mi presikavel bari paťiv peskere romeske“. (Efezanom 5:33) Sar? Avka, hoj rozmišľinel, savo hino, savo les hin lačho jilo. So savoro kerel predal late the predal o čhave. Te o rom kidel avri, so sar ela, e romňi ľikerel paš leste. Vakerel leha the pal leste šukares. The akor, te ov na služinel le Jehovaske.

3) So kampel te kerel, kaj maškar o rom the e romňi o kamiben te barol?

E Biblija phenel le romeske la romňake: „On duj ačhena jekh ťelos“. (Matúš 19:5) So oda hin? Našťi dživen sako pal peskero, sar te bi aňi na ulehas veradune. Kampel, kaj peha te en but časos a kaj te vakeren, so peske mišľinen a so len hin pro jilo. Maškar lende našťi el ňič bareder sar on dujdžene – ča o Jehovas. Tiš kampel te del baro pozoris, kaj pes feder te na ciťinen ňikaha avreha, sar peskera romňaha, romeha. Kampel, kaj lengero kamiben, so patrinel ča maškar lende, te na den ňikas avres.

 DODŽAN TUT BUTER

4) Romeja – kam u starin tut pal tiri romňi!

5) Romňije – presikav tire romeske paťiv the kamiben!

E Biblija phenel la romňake, kaj te presikavel paťiv peskere romeske, či ov služinel le Jehovaske abo na. Pregen 1. Petra 3:1, 2 a paľis vakeren jekhetane:

• Te tiro rom na služinel le Jehovaske, isto kames, kaj leske te chudel te služinel. So phenes, so les buter chudela jilestar – te leske furt vakereha pal o Jehovas, abo oda, savi sal ke leste? Soske oda avka hin?

Hin šukares, te o rom la romňaha jekhetane kiden avri, so kerena. Aľe varekana hin avka,  hoj o rom kamel jekh a e romňi aver. So akor? Hin mište, te e romňi šukares phenel peskere romeske sar pre oda dikhel. Aľe našťi bisterel, hoj o Jehovas diňa le romeske oda pro šero, kaj ov te phenel, sar so ela. Te e romňi kamel te šunel le romes a ľikerel paš leste, paľis peske dživen šukares. Pregen 1. Petra 3:3–5 a paľis vakeren jekhetane:

• Sar hin le Jehovaske, te dikhel, hoj e romňi šunel peskere romes?

6) So te kerel, kaj peske te dživas šukares

 SO SIKHĽIĽAM

O rom la romňaha peske dživena lačhes akor, te peske presikavena paťiv the kamiben a te doľikerena oda, so hin andre Biblija.

So bi phenehas

• So šaj kerel o rom, kaj peske mište te dživel peskera romňaha?

• So šaj kerel e romňi, kaj peske mište te dživel peskere romeha?

• Te sal veraduno (solachardo), save lava andal e Biblija tumenge pomožinena, kaj tumaro kamiben te zoraľol?