LEKCIJA 58
Ačh verno le Jehovaske
Paťas, hoj fest rado dikhes le Jehovas. Na des tut ňikaha aňi ňisoha lestar te odcirdel. Predal o Jehovas hin igen baro, hoj leske kames pro furt te ačhel verno. (Pregen 1. Kroník 28:9) Kana šaj el tuke phares te ačhel verno le Jehovaske? So tuke pomožinela te na vzdel pes?
1) Sar tut šaj odcirden averdžene le Jehovastar?
Šunďal imar pal o odpadlika? On hine sar sapa. Kamen andre tute te mukhel o jedos. Ajso jedos, kaj te preačhes te služinel le Jehovaske. Sar oda keren? Thoven pro internetos članki the videji. Odoj čhiven mel pro Jehovas the pre leskeri organizacija. Vaš oda lengere članki the videji na dikhas. Na pisinas kije oda komentara. Te peske vareko na del te phenel a paťal savoreske, so genel the dikhel, odľidžan les le čačipnastar. The o rašaja the pastora previsaren čačipen pal e Jehovaskeri organizacija. O Ježiš amenge phenďa pal o odpadlika, rašaja the pastora, so keren sa, kaj te na služinas le Jehovaske: „Mukhen len avke! On korkore hine kore u kamen te ľidžan [avre koren]. U te o koro ľidžala le kores, sodujdžene perna andre chev.“ (Matúš 15:14 NZ)
2) Mek andre soste šaj sikavas, hoj sam verna le Jehovaske?
Amen igen rado dikhas le Jehovas. Vaš oda amen na chal ňič le falošnone vjerenca. Aňi predal lende na keras ňisavi buťi. A te bi uľahas mek vareso, soha sam spojimen le falošnone vjerenca, o Jehovas amenge phenel: „Džan odarig het [le Bare Babilonostar], mire manušale.“ (Zjavenie 18:2, 4)
DODŽAN TUT BUTER
So šaj keres, kaj tut ňiko te na odcirdel le Jehovastar. Sar sikaveha, hoj tut na chal ňič le Bare Babilonoha.
3) De pozoris pre ola, so previsaren o čačipen
Varekana šaj šunas nalačhe hiri pal e Jehovaskeri organizacija. So akor? Pregen Príslovia 14:15 a paľis vakeren jekhetane:
-
Soske našťi paťas savoreske, so šunas?
Pregen 2. Jána 9–11 a paľis vakeren jekhetane:
-
Save mušinas te el pro odpadlika?
-
Amen le odpadlikenca na vakeras. Aľe prekal soste pes ke amende the avka šaj dochuden?
-
So phenes, sar ela le Jehovaske, te bi furt dikhahas nalačhe hiri pal leste the pal leskeri organizacija?
4) Ačh verno le Jehovaske buter sar le manušeske
So musaj te keras, te dikhľam, hoj vareko andal o zboros kerďa baro binos? Le Mojžišoskero zakonos amenge sikavel, so kampel te kerel. Pregen 3. Mojžišova 5:1.
Pal ala lava, mušinas te phenel le zborove phurederenge, so pes ačhiľa. Aľe peršo džas pal koda manuš, so kerďa binos. Phenaha leske, hoj hin les vajkeci ďivesa te džal pal o zborova phuredera. Mi phenel lenge, so kerďa. Te oda na kerela, džas pal lende amen, bo sam verna le Jehovaske. Sar oleha sikavas, hoj rado dikhas...
-
le Jehovas?
-
kole manušes, so kerďa binos?
-
le phralen the le pheňen andro zboros?
Te vareko andal o zboros kerďa vareso nalačho, pode leske o vast!
5) Amen na chal ňič le Bare Babilonoha
Pregen Lukáš 4:8 the Zjavenie 18:4, 5 a odphen pre kala otazki:
-
Som furt zapisimen andre varesavi falošno vjera?
-
Phirav andre varesavi organizacija, so hiňi spojimen la falošnona vjeraha?
-
Kerel miri buťi vareso predal e falošno vjera?
-
Kerav mek vareso, so džanav, hoj hin spojimen la falošnona vjeraha?
-
Te pre varesoste odphenďom „Ha“, so oleha kamav te kerel?
Ker avka, kaj tuke te el olestar mište pro jilo a kaj te sikaves, hoj sal verno le Jehovaske.
So kereha, te tutar vareko kamela, kaj te čhives lovore pre nabožensko charita?
VAREKO ŠAJ PHENEL: „Te genav, hoj vareko košel le Jehovaskere svedken, musaj man te dav anglal, kaj te zaačhav vaš o Jehovas.“
-
Hin oda lačho vaj na, kajso te genel a te del pes anglal? Soske?
SO SIKHĽIĽAM
Te kamas dureder te služinel le Jehovaske, našťi avas olenca, save amen kamen te zdiliňarel.
So bi phenehas
-
Soske našťi šunas, so vakeren odpadlika?
-
So kampel te kerel, te džanas, hoj vareko andal o zboros kerďa baro binos?
-
Sar sikavas, hoj amen na chal ňič la falošnona vjeraha?
DIKH TUKE BUTER
Pregen tuke, so kampel te kerel, te džan nalačhe hiri pal o Jehovaskere svedki.
Sar sprindžares, hoj varesavi organizacija abo buťi kerel vareso predal o Baro Babilon?
So keren odpadlika, kaj te preačhas te paťal?
Andro člankos „Od detstva som hľadal Boha“ pes dodžaneha, sar jekh rašaj omukhľa falošno vjera.
Dikh the pre ada
SO O MANUŠA KAMEN TE DŽANEL
So oda hin te sikhľol la Biblijatar?
Te kavka sikhľona la Biblijatar le Jehovaskere svedkenca, šaj genen andal e Biblija, savi tumen kamen. Šaj vičinen la fajta, le kamaraten abo kas kamen.
