Dikhes pro obrazkos ala čhajora? — Lakero dad pes vičinel Jeftas. E Biblija na phenel, sar pes vičinelas adi čhajori, ale džanas, hoj kerelas radišagos peskere dadeske the le Jehovaske. Akana peske genaha buter pal late the pal lakero dad Jeftas.

O Jeftas sas lačho manuš a sikavelas peskera čha ciknorestar pal o Jehovas. Les sas bari zor a sas lačho sudcas, so ľidžalas le Izraelčanen. Vašoda les o Izraelčana mangle, kaj lenca te džal andro mariben le ňeprjaťeľenca.

O Jeftas pes modľinelas ko Del, kaj te vihrajinel. Diňa le Jehovaske o sľubos. Te vihrajinela, ta dela le Devleske perše manušes, so les avela te privitinel.  Ada manuš dživela a služinela calo dživipen le Jehovaske paš o Devleskero stanos. Le Devleskero stanos sas than, kaj phirenas o manuša, te služinen le Devleske. O Jeftas vihrajinďa! Džanes ko avľa sar peršo, les te privitinel, sar avľa khere andal o mariben? —

Leskeri čhaj les privitinďa sar peršo! Predstavin tuke ada! Le Jeftas na sas buter čhave. Oj sas jekhori. A akana la mušinel te bičhavel het. Sas leske igen phares pro jilo. Ale diňa o sľubos! Leskeri čhaj leske phenďa: „Dado, te ada sľubinďal le Jehovaske, ta mušinel pes ada avka te kerel.“

The lake sas igen phares. Džanelas, hoj našťi džala romeste aňi la našťi ela čhave, te služinela paš o Devleskero stanos. Ale oj igen kamelas te kerel radišagos le Jehovaske a te doľikerel le dadeskero sľubos. Ada diňa pro peršo than andro peskero dživipen a avka omukhľa oda, kaj te džal romeste a te ačhel latar daj. Geľa andal o kher a služinelas paš o Devleskero stanos calo dživipen.

So phenes, kerďa oj radišagos le dadeske the le Jehovaske? — Určiťe kerďa! Te šuneha a kameha le Jehovas, šaj aves sar le Jeftaskeri čhaj. Kereha radišagos la dake le dadeske the le Jehovaske.