So keres, sar daras? — Džas pal e daj the pal o dad, na? Ale hin mek vareko, ko tuke šaj pomožinel. Ov hino nekzoraleder savorendar. Džanes, ko oda hin? — O Del, o Jehovas. Akana peske phenaha pal o terno čhavo, so pes vičinel David. Ov džanelas, hoj o Jehovas leske šaj pomožinel, vašoda ov na daralas.

Imar ciknorestar pes o David sikavelas la datar le dadestar te kamel le Jehovas. Ada leske pomožinelas te na daral, the te zadživelas nalačhe veci, savendar aver manuš daranďiľahas. Ov džanelas, hoj o Jehovas hino leskero prjaťeľis a pomožinela leske. Sar pes o David starinelas pal o bakrore, avľa baro levos a chudňa andro danda le bakrores! Džanes, so kerďa o David? Ov prastalas pal o levos, chudňa les meňatar a murdarďa les vastenca! A paľis, sar o medveďis chuťiľa pro bakroro, o David les thiš murdarďa! So phenes, ko pomožinďa le Davidoske? — Mište phenes, o Jehovas.

Ada, hoj o David hino odvažno, sikavel the aver pribehos. O Izraelčana pes marenas andre vojna le Filišťinenca. Jekh filišťinsko slugaďis sas igen baro murš, baro obros! Vičinelas pes Golijat. Ada obros asalas avri le izraelske slugaďen the le Jehovas. O Golijat vičinelas ke peste le Izraelčanen, kaj pes leha te maren. Ale savore Izraelčana daranas. Sar ada šunďa o David, ta phenďa le obroske: „Me man tuha džava te marel! O Jehovas mange pomožinela a tu bajineha, so phenďal!“ So phenes, sas o David odvažno? — Určiťe sas. Kames te džanel, so pes ačhiľa paľis?

O David peske iľa 5 bara a o sirimos, saveha čhivkerelas o bara, a geľa pes te marel le obroha. Sar o Golijat dikhľa le David, chudňa te kerel lestar pherasa. Ale o David leske phenďa: „Tu avľal pre ma la šabľaha, ale me avav andro Jehovaskero menos!” Paľis thoďa o bar andro sirimos, chudňa te prastal ke leste a caľa zoraha čhiďa o bar le Golijatoske andro čekat. O obros peľa pre phuv a sas mulo.  O Filišťiňi avka daranďile, hoj chudne savore te denašel het. So mišľines, sar ada, hoj ajso terno čhavo sar o David murdarďa le obros? — O Jehovas leske pomožinďa. O Jehovas sikaďa, hoj hino zoraleder sar o obros a vašoda vihrajinďa.

So šaj sikhľos le pribehostar pal o David? — O Jehovas hino nekzoraleder. A kamel te el tiro lačho kamaratos. Sar varekana daraha, mišľin pre ada, hoj o Jehovas tuke šaj pomožinel, kaj te aves odvažno.