Andro kresťansko grecko pismo šaj but genas pal o Barnabaš the pal o apoštol Pavol. On sas služobňika, so phirenas pal o perša kresťanska zbori. Soske ada kerenas? Bo jilestar pes starinenas, sar pes šunen lengere kresťanska phrala. O Pavol phenďa: Džas pale te dikhel amare phralen..., sar lenge džal. O Pavol phirelas the stovki kilometri, kaj lenge te phenel lačho lav. (Skutki 15:36 NZ) Adaďives pes pal amende o krajska služobňika thiš avka starinen.

Phiren amen te povzbudzinel. Dojekh krajsko služobňikos pes starinel asi pal o 20 zbori, pal save phirel duvar andro berš. Sako kurko hino andre aver zboros. Šaj pes but sikavas ale skusena phralendar. A te hine veradune čiže solacharde thiš lengere romňendar. On kamen te sprindžarel le ternen the le phuren andro zboros, rado lenca phiren te zvestinel the pro biblicka študija. Le staršenca phiren pro pasťerska navšťevi, pro zhromažďeňa the pro zjazdi len hin šukar prednaški, so amenge džan andro jilo. (Skutky 15:35)

Mišľinen pre sakoneste andro zboros. Krajska služobňika dikhen pre ada, sar dživen lengere kresťanska phrala the pheňa andro zbori. Zdžan pes le staršenca the le pomocne služobňikenca, kaj te phučen, so pes lenge podarinďa andro zboros a del len goďi te kerel peskeri buťi mek feder. Pomožinen le prjekopňikenge, kaj te džanen feder te zvestinel; rado sprindžaren olen, so chudne te študinel a hin len radišagos, sar keren duchovna pokroki. Ala služobňika den andre adi buťi calo jilo, kaj amenge te el mište. (2. Korinťanom 8:23) Den amen lačho priklados, sar zorales paťan le Jehovaske a den leske peskero jilo. (Hebrejom 13:7)

• Soske phiren o krajska služobňika pal o zbori?

• Savo užitkos amen šaj el olestar, hoj pal amende avľa o krajsko služobňikos?