Mište rozmišľin, khatar les tire informaciji. Sikhľar andal e Biblija. Te pes del, gen prjamo andal late. Te phenes oda, so phenďa varesavo vedcos abo aver goďaver manuš, abo sprava andal e televiza, internetos, peršo tut dodžan, či oda hin čačipen. A či oda nane imar purano.

Ma previsar o informaciji. Sar višvetľines o tekstos, av tuke isto, hoj oda bešela le tekstenca, so hine upreder abo teleder. A tiš oleha, so sikhľarel caľi Biblija the „o verno the goďaver sluhas“ andre amare publikaciji. (Mat. 24:45) Te použines varesavi svetsko informacija, de pozoris te na phenes vareso aver, sar mišľinelas oda manuš. Ma le ola lava a ma previsar len ča vaš oda, kaj tuke te bešen andro prejavos.

Mi rozmišľinen. Te pregenes o tekstos abo oda, so vareko phenďa, de ke oda otazka abo phen priklados. Avka ola, so tut šunen, korkore avena pre oda, so olestar šaj sikhľon.