E Biblija pisinel, hoj pes amendar užarel, kaj „te avas učiťeľa“. (Hebr. 5:12) Le tuke! O Jehovas hino nekbareder Učiťeľis, aľe kamel, kaj amen te sikhľaras avren pal leste! Pal o Jehovas sikhľaras andre fameľija, andro zboros abo andre služba. Oda hin vareso igen baro, so našťi las ča kavka. Sar šaj ačhas feder andre kadi buťi?

Pal kada pisinďa o apoštol Pavol le Timotejoske: „Kam furt te el feder andre oda, sar genes anglal o manuša, sar podhazdes avren a sar sikhľares avren.“ O Pavol mek pisinďa: „Bo te [oda] kereha, zachraňineha tut a mek the olen, so tut šunen.“ (1. Tim. 4:13, 16) Tiri uloha hin te vakerel le manušenge lačho hiros, so šaj zachraňinel lengero dživipen. Vaš oda kampel, kaj furt te aves feder andre oda, sar genes a sar sikhľares avren. Kadi brožura tuke pomožinela. So adaj arakheha?

O Jehovas hino Rajikano Učiťeľis. (Iz. 30:20) Kadi brožura tuke pomožinela feder te genel a te ačhel feder učiťeľis. Ma bister, hoj oda, so sikhľares, hino le Jehovastar. Ov hino oda, ko pricirdel ke peste le manušen. (Ján 6:44) Vaš oda furt mang le Jehovas, kaj tut te del svato duchos. Furt, sar pes del, gen le manušenge andal e Biblija. Pametin, hoj kames upre te hazdel le Jehovas, na tut. Ker sa predal oda, kaj ola, so tut šunena, te kamen le Jehovas andal calo jilo.

O Jehovas tut vičinďa, kaj te zvestines ajsi lačhi sprava, pre savi nane! Sam peske ista, te „tut zmukheha pre zor, savi del o Del“, hoj tuke oda mište džala. (1. Petra 4:11)

Tire spolupracovňika,

o phrala, so dodikhen pre buťi le Jehovaskere svedkengeri