27. mája 2023 o phral Jaroslav Sekela, savo služinel andre česko-slovensko pobočka, phenďa oznamos, hoj hiňi prethoďi e Biblija – Kada pisinďa o Matuš andre vichodoslovensko romčina. O oznamos, hoj hiňi prethoďi kadi biblicko kňižka, sas phendo pro mimorjadno zhromažďeňe, savo sas Michalovcate pro vichodno Slovensko. Savore, so sas pre kada zhromažďeňe, chudle kadi kňižka. Kadi biblicko kňižka arakhena pre amari stranka.

Romaňi čhib hiňi maj kajsi isto, sar e bengalčina , hindčina the e pandžabčina. Andre romaňi čhib hine but lava, save o roma preile odarig kaj bešen. Vaš oda pes pre jekh veca šaj phenel butere lavenca. Vaš oda ola, so prethovenas e Biblija, duminenas pre savore lava bo kamle, kaj savore kaleske te achaľon.

Andre vichodoslovensko romčina hin jekh biblijakero preklados, aľe nane odoj pisimen le Devleskero menos Jehovas, bo les vimeňinde vaš o lav Raj abo Del. A mek ke kada, but biblicka verši nane prethode presňe, aľe ča pisinde peskere lavenca, aľe na o hlavna mišľenki. Vaš oda predal ola so la genen hino phares te achaľol o biblicka mišľenki. Aľe andre kada nevo preklados e Biblija – Kada pisinďa o Matuš, hino pisimen le Jehovaskero menos a o mišľenki andre leste hine pisimen kajse lavenca, kaj pes del oda lokes te achaľol.

Jekh olendar, so prethovenas e Biblija, phenďa: „Te pes prethovel e Biblija, igen kampel, kaj pes le Devleskere mišľenki te prethoven presňe. Bo ča kavka o manuša sprindžarena le Devles a chudena les rado te dikhel.“

Aver olendar, so prethovenas e Biblija phenďa: „Vaš oda, hoj o Roma zadživen, hoj len o manuša na kamen (diskriminacija), igen lenge šaj keren mištes pro jilo o lava andal o Matuš 10:31. Leperen amenge o lava, hoj o Jehovas džanel pal dojekh vrabcos, pre save o manuša, pal save pisinel e Biblija dikhenas kavka, hoj o vrabci namon ňič. Aľe amen andre Devleskere jakha movas o keci buter sar o vrabci.“

Sam amenge ista, hoj le manušenge, save genena kada nevo preklados, pomožinela, kaj dureder te sikhľon pal oda,hoj len o Jehovas kamel a kaj te achaľon, hoj leske nane jekh, so predživen. (1. Petra 5:7)