Јован 10:1-42
10 „Чаче, чаче вакерава туменге, окова со на кхувела таро удара ко трло* е бакхренгоро, него рупинела и ограда, ов тано чор.
2 А окова со кхувела таро удара, ов тано о пастири е бакхренгоро.
3 О чувари леске пхравела о удар хем о бакхре шунена лескоро гласо. Ов викинела пле бакхрен ко анав хем икалела лен аври таро трло.
4 Кеда икалела са пле бакхрен авријал, ов џала англи ленде, хем о бакхре џана пали лесте, соске пенџарена лескоро гласо.
5 Пало јабанџија нане те џан, него ка нашен лестар, соске ола на пенџарена о гласо е јабанџиенгоро“.
6 О Исус вакерѓа ленге акаја споредба, ама ола на халиле со мангела сине те вакерел ленге.
7 Адалеске о Исус палем вакерѓа ленге: „Чаче, чаче вакерава туменге, ме сиум о удар котар со кхувена о бакхре.
8 Са окола со англедер але хем вакерѓе кај ола тане о чачутне пастирија, тане чора, ама о бакхре на шунѓе лен.
9 Ме сиум о удар. Хем кој ка кхувел преку манде ко трло, ов ка овел спасимо. Ка кхувел хем ка икљол хем ка аракхел поле чарјаја.
10 О чор авела само те чорел, те мударел хем те уништинел. А ме аљум те дав лен живото хем адава вечно живото.
11 Ме сиум о шукар пастири, хем о шукар пастири дела пло живото е бакхренге.
12 Окова сој тано платимо само те аракхел е бакхрен, а нане ленгоро пастири хем о бакхре нане лескере, кеда дикхела кај авела о рув, ов мукхела е бакхрен хем нашела. Тегани о рув несаве бакхрен астарела, а о јавера бакхре нашена.
13 Адалеске со керела бути само баши плата ов нашела хем нане ле гајле е бакхренге.
14 Ме сиум о шукар пастири хем пенџарава мле бакхрен хем мле бакхре пенџарена ман,
15 исто сар о Дад со пенџарела ман хем сар ме со пенџарава е Даде. Хем дава мло живото е бакхренге.
16 Иси ман јавера да бакхре, кола со нане таро акава трло.* Лен да мора те анав, хем ола ка шунен мло гласо, па сарине ка овен јекх стадо, јекхе пастиреа.
17 Адалеске о Дад мангела ман, соске дава мло живото те шај те добинав ле палем.
18 Никој на лела мло живото, него ме коркори дава ле. Иси ман право те дав ле хем иси ман право палем те добинав ле. Акаја заповед добинѓум ла таро мо Дад“.
19 Башо акава со вакерѓа о Исус палем ули поделба машкар о Евреија.
20 Бут лендар вакерена сине: „Иси ле демони хем делиндило. Соске шунена ле?“
21 А о јавера вакерена сине: „Акала лафија нашти те вакерел мануш кова со иси ле демони. Шај ли о демони те керел о короле те дикхен?“
22 Ко адава време ко Ерусалим сине о Празнико е посветибаске.* Сине евен,
23 хем о Исус пхирела сине ко храми ко тхан со викинела пе сине е Соломонескири учхарди тераса.
24 Тегани о Евреија опколинѓе ле хем почминѓе те пучен ле: „Соске на вакереа аменге кој сиан ту? Ако сиан о Христос, вакер аменге отворено!“
25 О Исус одговоринѓа ленге: „Ме вакерѓум туменге, ама тумен на верујнена. О буќа со керава мле Дадеске ко анав, ола сведочинена баши манге.
26 Ама тумен на верујнена, соске тумен на сиен мле бакхре.
27 Мле бакхре шунена мло гласо, ме пенџарава лен хем ола џана пали манде.
28 Ме дава лен вечно живото хем ола никогаш нане те овен уништиме, хем никој нане те лел лен таро мле васта.
29 Адава со дела ман о Дад тано најважно таро са о јавера буќа, хем никој нашти те лел лен таро е Дадескере васта.
30 Ме хем о Дад сием јекх“.*
31 Акава да пути о Евреија леле бара те фрден упри лесте.
32 О Исус вакерѓа ленге: „Ме сикавѓум туменге бут шукар делија таро мо Дад. Башо кола таро адала делија фрдена баренцар упри манде?“
33 О Евреија вакерѓе леске: „Амен на фрдаја баренцар упри туте башо шукар дело, него башо адава со кереа лафи против о Девел, соске иако сиан мануш, кереа тут девел“.
34 О Исус вакерѓа ленге: „Ко тумаро Закони о Девел вакерѓа: ’Ме вакерѓум: „Тумен сиен девела“‘.
35 Ако о Девел вакерѓа тумен сиен ’девела‘ околенге кас со лескоро лафи осудинѓа — а нијекх мануш нашти те икалел адава сој пишимо ко света списија —
36 о Дад одвојнѓа ман те шај те служинав леске хем бичхалѓа ман ко свето, сар шај тегани те вакерен манге кај керава лафи против о Девел адалеске со вакерѓум: ’Ме сиум е Девлескоро Чхаво‘?
37 Ако на керава адава со мангела мо Дад, тегани ма верујнен ман.
38 Ама ако керава, иако на верујнена ман, верујнен ко делија со керава лен, те шај те хаљовен хем те верујнен кај о Дад тано ко јекхипе манцар хем ме сиум ко јекхипе е Дадеа“.
39 Тегани ола палем пробинѓе те астарен ле, ама ов нашља лендар.
40 Пало адава, ов гело тари јавер страна таро Јордан ко тхан коте со о Јован ко почеток крстинела сине, хем ачхило адатхе.
41 Хем бут мануша але ки лесте хем вакерѓе: „О Јован на керѓа нијекх чудо, ама са со вакерѓа башо акава мануш сине чаче“.
42 Хем бут мануша таро адава тхан верујнѓе ки лесте.
Footnotes
^ Трло тано тхан коте со аракхена пе о бакхре. Адава тхан сине опколимо оградаја хем најчесто и ограда сине керди таро бара.
^ Дикх и фуснота башо Јован 10:1.
^ Ко хебрејски Ханука. Ко акава празнико о Евреија сетинена пе сине ко време кеда сине ослободиме тари сириско-грчко власт хем кеда о храми ко Ерусалим сине палем посветимо е Јеховаске.
^ Или: „ко јекхипе“.
