Џи ко Римјања 3:1-31
3 Тегани, која тани и предност те овел пе Евреи хем те овел пе сунети?
2 Иси бут предностија. Прво, о Девел е Евреенге денѓа* пле света лафија.
3 Тегани, со шај те вакерав башо несаве Евреија колен со нане лен вера? Дали адава со нане лен вера значинела кај о Девел нане те икерел пе ко пло лафи?
4 Сигурно на! Ка сикавел пе кај о Девел секогаш вакерела о чачипе, чак ако са о мануша ховавена. Сар со пишинела ко Списија: „Тле лафија ка сикавен кај сиан праведно хем кеда ола ка кривинен тут башо нешто, ка докажине ленге кај грешинена“.
5 Несаве мануша вакерена: „Кеда амен кераја лошна буќа, тегани о мануша шај те дикхен кај о Девел тано праведно. Ако амаро себепи о мануша дикхена кај о Девел тано праведно, тегани на постапинела ли о Девел аменцар неправедно кеда казнинела амен?“
6 Сигурно на! Ако о Девел тано неправедно, сар ка судинел е светоске?
7 Или јекх јавер бути со вакерена о мануша: „Ако мло ховајбе јасно сикавела кај о Девел вакерела о чачипе хем адава керела о мануша те фалинен ле, тегани соске о Девел осудинела ман сар грешнико?“
8 Хем соске на вакераја: „Ајде те кера лошна буќа те шај те авен о шукар буќа“, сар со несаве мануша ховавена кај амен аѓаар сикаваја е јаверен? Асавке мануша заслужинена те овен казниме.
9 Значи, шај ли те мислина кај амен о Евреија сием ки побари предност таро јавера? На! Соске, сар со дикхлем, хем о Евреија хем о Гркија тане робија е гревоске,
10 сар со пишинела ко Списија: „Нане праведно мануш, нане ни јекх.
11 Нане ни јекх сој мудро,* нане ни јекх мануш со родела е Девле.
12 Са о мануша цидинѓе пе таро Девел, сарине ола уле мануша со на врединена, нане никој со керела шукарипе, нане ни јекх“.
13 „Пумаре лафенцар мударена,* пле чхибјаја вакерена ховајба.“ „Адава со икљола таро ленгоро муј тано сар отров е сапенгоро.“
14 „Ленгоро муј тано пхердо армања хем холи.“
15 „Ленгере пре сиѓарена те мударен.“*
16 „Ола секогаш керена бари штета е манушенге хем керена о јавера те циден муке,
17 хем ола на џанена сар те овен ко мир е јаверенцар.“*
18 „Нане лен дар таро Девел.“
19 Ама амен џанаја кај са адава со пишинела ко Закони, тано околенге со икерена пе ко Закони, те шај сарине окола со вакерена кај нане крива, о Закони те пхандел о муј ленгоро хем те сикавел кај цело свето тано криво англо Девел хем заслужинела те овел казнимо.
20 Адалеске, нијекхе манушеске нашти те вакерел пе кај тано праведно англо Девел адалеске со икерела о заповедија таро Закони. Уствари, о Закони керела панда пошукар те хаљова о грево.
21 А акана тано јасно кај јекх мануш шај те овел праведно англо Девел бизо те икерел е Мојсеескоро закони. Башо акава, исто аѓаар вакерѓе о Закони хем о Пророкија.
22 Бизи разлика тари која нација тано некој, ако иси ле вера, хем адава вера ко Исус Христос, шај те овел праведно англо Девел.
23 Соске, сарине грешинѓе хем нашти совршено те сикавен е Девлескере особине.
24 О Исус Христос спасинѓа лен адалеа со платинѓа и откупнина* башо грево. Аѓаар ола тане праведна англо Девел. О Девел денѓа лен адава поклон адалеске со мангља те сикавел ленге пло шукарипе со на заслужинаја ле.
25 О Девел денѓа е Исусе сар жртва те шај о мануша те смиринен пе леа аѓаар со ка овел лен вера ки е Христосескири жртва.* О Девел керѓа адава те шај те сикавел пли праведност. Ов на само со сикавела пли стрпливост адалеа со простинела о гревија со сине керде англедер,
26 него ов исто аѓаар сикавела пли праведност аменге акана, аѓаар со вакерела кај тане праведна о мануша со сикавена вера ко Исус.
27 Тегани, шај ли те фалина амен башо нешто? На. Кова закони на мукхела амен те фалина амен? Дали о закони кова со вакерела кај тано важно адава со кераја? На, него о закони кова со вакерела кај ваљани те овел амен вера.
28 Соске, џанаја кај јекхе манушеске шај те вакерел пе кај тано праведно баши лескири вера, а на башо адава со икерела о заповедија таро Закони.
29 Зарем о Девел тано само Девел е Евреенге, нане ли ов исто аѓаар Девел е манушенге таро са о народија? Оја, ов тано Девел е манушенге таро са о народија.
30 Адалеске со иси само јекх Девел, англи лесте о мануша ка овен праведна баши пумари вера — хем окола сој керде сунети хем окола со нане керде сунети.
31 Тегани, дали амаре вераја кераја те на важинел о Закони? На. Наместо адава, амен јасно сикаваја кај о Закони тано важно аменге.
Footnotes
^ Дословно: „денѓа ко поверење“.
^ Или: „со хаљола“.
^ Дословно: „Ленгоро крло тано пхравдо гробо“.
^ Дословно: „те чхорен рат“.
^ Дословно: „на пенџарена о друмо башо мир“.
^ Дословно: „ко е Христосескоро рат“.
