Прво Коринќања 6:1-20
6 Ако некој тумендар акошља пе јекхе јавере пхралеа, ваљани ли те џал ко судо англо неправедна мануша, или ваљани те икљол англо света мануша* ко собрание?
2 На џанена ли кај о света мануша ка судинен е светоске? Ако тумен сиен адала со ка ваљани те судинен е светоске, на сиен ли способна те решинен потикне проблемија?
3 На џанена ли кај амен ка судина е ангеленге? Тегани, соске нашти те решина о секојдневна проблемија со појавинена пе акана?
4 Значи, ако ваљани те решина асавке проблемија со појавинена пе акана, тегани соске џана те судинен туменге о мануша со нане дело таро собрание?
5 Акава вакерава ле туменге те шај те лаџан. Нане ли машкар туменде ни јекх мудро мануш кова со шај те судинел машкар пле пхраља?
6 Наместо адава, пхрал пхрале икалела англо судо, хем адава англо мануша со нане верникија!
7 Ако тужинена тумен јекх јекхеа, тумен више нашавѓен. Соске на трпинена кеда тумаре пхраља керена туменге нешто лошно или керена туменге штета?
8 Наместо адава, тумен керена тумаре пхраленге лошнипе хем штета.
9 На џанена ли кај о неправедна мануша нане те наслединен е Девлескоро Царство? Ма ховавѓовен! Ни о неморална* мануша, ни окола со обожавинена идолија, ни окола со керена прељуба, ни о мурша со иси лен односија е муршенцар,*
10 ни о чора, ни о алчна, ни о пијанице, ни окола со вреџинена е јаверен, ни окола со силаја лена јаверенгере буќа, нане те наслединен е Девлескоро Царство.
11 А несаве тумендар сине асавке, ама акана о Девел пле силаја* тховѓа тумен, керѓа те овен света хем ко анав амаре Господарескоро е Исус Христосескоро вакерѓа кај сиен праведна.
12 Са тано манге дозволимо, ама са о буќа нане корисна. Са тано манге дозволимо, ама нане те мукхав ништо те контролиринел ман.
13 И храна тани е воѓеске хем о воги тано е хранаке, ама о Девел ка уништинел солдуј буќа. А о тело нане башо неморал,* него башо Господари хем о Господари тано башо тело.
14 Ама о Девел пле силаја воскреснинѓа е Господаре хем ка воскреснинел амен да.
15 На џанена ли кај тумаро тело припадинела е Христосеске? Тегани, исправно ли тано те лав адава со припадинела е Христосеске* хем те спојнав ле неморално џувљаја?* Ме никогаш нане те керав адава!
16 На џанена ли кај окова со спојнела пе е неморално џувљаја* тано јекх тело лаја? Соске, о Девел вакерела: „Ола о дуј ка овен јекх тело“.
17 А кој тано спојмо е Господареа, исто размислинела сар лесте.*
18 Нашен таро неморал!* Секова грево со керела ле о мануш тано аври таро лескоро тело, ама кој керела неморал грешинела против пло тело.
19 На џанена ли кај тумаро тело тано храми коте со живинела е Девлескири сила?* Хем адаја сила* добинѓен ла таро Девел те шај те овел ки туменде. Исто аѓаар, тумаро тело на припадинела туменге, него припадинела е Девлеске,
20 соске ов платинѓа бари цена туменге. Адалеске керен са те шај тумаре телоја те славинен е Девле!
Footnotes
^ Дикх ко речнико башо „Света мануша“.
^ Ки оригинално чхиб акате тане користиме дуј различна лафија. Јекхе лафеа мислинела пе ко мурша со мукхена упри ленде те керен пе хомосексуална постапке, а е јавере лафеа мислинела пе ко мурша со керена упро јавера асавке постапке.
^ Или: „пле свети духоја“. Дикх ко речнико баши „Девлескири сила“.
^ Дословно: „те лав о делија таро е Христосескоро тело“.
^ Дословно: „проституткаја“.
^ Дословно: „проституткаја“.
^ Или: „о свети дух“. Дикх ко речнико баши „Девлескири сила“.
^ Или: „адава свети дух“. Дикх ко речнико баши „Девлескири сила“.