1. Баши која молитва ка кера лафи?

БУТ мануша џанена и молитва со вакерѓа ла о Исус ки јекх прилика. Ој тани пенџарди сар Оченаш. О Исус користинѓа акаја молитва те сикавел пле ученикон сар те молинен пе. Башо со молинѓа пе ов? Соске акаја молитва аменге тани важно авдиве?

2. Башо кола трин буќа о Исус вакерѓа те молина амен?

² О Исус вакерѓа: „Значи, молинен тумен аѓаар: ,Амаро Дад со сиан ко небо, те славинел пе тло свето анав. Те авел тло Царство. Те овел тли волја, сар ко небо аѓаар ки пхув‘“. (Читин Матеј 6:9-13.) Соске о Исус сикавѓа амен те молина амен башо акала трин буќа? (Дикх и 20 фуснота.)

3. Со ка сикљова башо е Девлескоро Царство?

³ Амен сиклилем кај е Девлескоро анав тано Јехова. Исто аѓаар, керѓем лафи која тани е Девлескири волја е манушенцар хем е Пхувјаја. Ама, со мислинѓа о Исус кеда вакерѓа: „Те авел тло Царство“? Акана ка сикљова сој тано е Девлескоро Царство, со ка керел ов, хем сар ка анел џи ко адава те славинел пе е Девлескоро анав.

4. Сој тано е Девлескоро Царство хем кој тано лескоро Цари?

⁴ О Јехова керѓа јекх влада ко небо хем биринѓа е Исусе те овел Цари. И Библија вакерела кај акаја  влада викинела пе е Девлескоро Царство. О Исус тано „Цари упро царија хем Господари упро господарија“ (1. Тимотеј 6:15). О Исус шај те керел бут пошукар буќа таро секова манушикано владетели, хем ов тано бут посилно таро са о владетелија заедно.

5. Котар ка владинел е Девлескоро Царство? Упро со ка владинел?

⁵ Саранда диве пало лескоро воскресение, о Исус иранѓа пе ко небо. Пало несаво време, о Јехова керѓа ле Цари ко Царство (Дела 2:33). Е Девлескири влада таро небо ка владинел упри Пхув (Откровение 11:15). Адалеске и Библија башо е Девлескоро Царство вакерела кај тано „небесно царство“ (2. Тимотеј 4:18).

6, 7. Соске о Исус тано пошукар таро било кова манушикано владетели?

⁶ И Библија вакерела кај о Исус тано побаро таро било кова манушикано цари соске ов „тано единствено со иси ле бесмртност“ (1. Тимотеј 6:16). Са о манушикане владителија мерена, ама о Исус нане никогаш те мерел. Са о шукар буќа со ка керел лен ов, ка ачховен засекогаш.

⁷ О пророштвија тари Библија вакерена кај о Исус ка овел праведно хем сочувствително Цари. Ки лате вакерела пе баши лесте: „Е Јеховаскоро духо ка овел упри лесте. Адалеске ов ка овел мудро, бут шукар ка хаљовел о буќа, ка дел шукар совет, ка овел зорало, ка џанел бут буќа, хем бут ка поштујнел е Јехова. Ов ка уживинел бут те поштујнел е Јехова. Нане те судинел спрема адава со дикхела, ни нане те дел совет спрема адава со шунела. Ов праведно ка судинел е чороленге“ (Исаија 11:2-4). Мангеа ли те овел тут асавко цари?

8. Котар џанаја кај о Исус нане те владинел коркори?

 ⁸ О Девел биринѓа несаве манушен те владинен е Исусеа ко небо. На пример, о апостол Павле вакерѓа е Тимотееске: „Ако издржинаја, амен да ка владина леа сар царија“ (2. Тимотеј 2:12). Кобор џене ка владинен е Исусеа сар царија?

9. Кобор џене ка владинен е Исусеа? Кеда почминѓа о Девел те биринел лен?

⁹ Сар со дикхлем ко ефтато поглавје, о апостол Јован ки визија дикхља е Исусе сар Цари ко небо хем леа 144.000 јавера царија. Кој тане акала 144.000? О Јован вакерѓа кај лен „иси лен е [Исусескоро] анав хем о анав лескере Дадескоро пишимо ко ленгоро чекат“. Ов исто аѓаар вакерѓа: „Ола џана пало Бакхро [адава тано о Исус] коте било те џал. Ола тане кинде таро мануша“. (Читин Откровение 14:1, 4.) О 144.000 тане верна христијања со биринѓа лен о Девел „те владинен сар царија упри пхув“ заедно е Исусеа. Кеда мерена, ола воскреснинена те живинен ко небо (Откровение 5:10). Панда таро време е апостоленгоро, о Јехова биринела сине верно христијанен те овен дело таро акала 144.000 царија.

10. Сар о Јехова сикавѓа кај грижинела пе аменге адалеа со биринѓа е Исусе хем е 144.000 џенен те владинен упро мануша?

¹⁰ Адава со ка владинен мануша е Исусеа сикавела кобор бут о Јехова грижинела пе аменге. О Исус ка овел шукар владетели адалеске со хаљовела амен. Ов џанела сар тано те ове мануш хем те овел тут муке. О Павле вакерѓа кај о Исус џанела сар амен осетинаја амен, ов шај „те хаљовел амаре слабостија“ хем „сине искушимо ко са сар аменде“ (Евреите 4:15; 5:8). Исто аѓаар о 144.000 џанена  сар тано те ове мануш. Ола да сине несовршена хем боринена пе сине насвалипаја. Адалеске шај те ова сигурна кај о Исус хем о 144.000 ка хаљовен сар осетинаја амен хем саве проблеменцар ваљани те икљова ко крајо.

11. Соске о Исус сикавѓа пле ученикон те молинен пе е Девлескири волја те керел пе ко небо?

¹¹ О Исус сикавѓа пле ученикон те молинен пе е Девлескири волја те керел пе ко небо. Соске вакерѓа ленге аѓаар? Ко тринто поглавје сиклилем кај о Бенг противинѓа пе е Јеховаске. Пало адава, о Јехова дозволинѓа леске хем е ангеленге со на сине верна, о демонија, те ачховен несаво време ко небо. Адалеске шај те вакера кај сарине ко небо на керена сине е Девлескири волја. Ко дешто поглавје ка дикха нешто побутер башо Бенг хем башо демонија.

12. Кола дуј важна буќа тане вакерде ко Откровение 12:10?

¹² Кеда о Исус ка овел Цари ко е Девлескоро Царство, и Библија вакерела кај кратко пало адава ов ка почминел војна против о Сатана. (Читин Откровение 12:7-10.) О 10 стихо вакерела аменге башо дуј важна буќа. Прво, кај е Девлескоро Царство почминела те владинел хем о Исус тано Цари, хем дујто, кај о Сатана тано фрдимо таро небо теле ки Пхув. Понадари ка сикљова кај акала буќа чаче уле.

13. Со уло ко небо кеда о Сатана сине фрдимо?

¹³ И Библија вакерела кобор сине бахтале о верна ангелија кеда о Бенг хем лескере демонија сине фрдиме таро небо. Ки лате пишинела: „Нека радујнел пе о небо хем сарине со живинена ки лесте!“  (Откровение 12:12). Ко небо акана иси мир хем слога соске сарине керена е Девлескири волја.

14. Кола буќа уле ки Пхув адалеске со о Сатана сине фрдимо таро небо?

¹⁴ Ама, о живото ки Пхув тано бут појавер. Уле бут лошна буќа „соске о Бенг хулило теле“, хем ов „бут тано хољамо, џанела кај иси ле хари време“ (Откровение 12:12). О Сатана тано пхердо хољаја. Ов сине фрдимо таро небо хем џанела кај панда хари ка овел уништимо. Ов керела са те шај те овен проблемија, дукха хем муке ко цело свето.

15. Сави тани е Девлескири намера е Пхувјаја?

¹⁵ Е Девлескири намера е Пхувјаја на менинѓа пе. Ов панда мангела те живинен совршена мануша засекогаш ко рај ки Пхув (Псалм 37:29). Сар е Девлескоро Царство ка керел те овел акава?

16, 17. Со вакерела аменге о стихо таро Даниел 2:44 башо е Девлескоро Царство?

¹⁶ О пророштво сој тано пишимо ко Даниел 2:44 вакерела: „Ко диве адале царенгере, о небесно Девел ка ваздел царство кова со никогаш нане те овел уништимо. Хем адава царство нане те дел пе јавере народоске. Ов ка уништинел хем ка чхинавел са о јавера царствија, а коркори ов ка ачховел засекогаш“. Со сикавела амен акава пророштво башо е Девлескоро Царство?

¹⁷ Прво, вакерела аменге кај е Девлескоро Царство ка почминел те владинел „ко диве адале царенгере“. Адава значинела кај кеда ка почминел те владинел е Девлескоро Царство, ки Пхув панда ка постојнен јавера владе. Дујто, вакерела аменге кај е Девлескоро Царство ка ачховел засекогаш хем никогаш нане те овел сменимо јавере владаја. Хем трито, ка овел војна машкар е Девлескоро Царство  хем о владе акале светоскере. Е Девлескоро Царство ка побединел хем ка овел единствено влада со ка владинел упри Пхув. Тегани, упро мануша ка владинел и најшукар влада со шај те овел.

18. Сар викинела пе и војна со ка овел машкар е Девлескоро Царство хем о владе акале светоскере?

¹⁸ Сар е Девлескоро Царство ка почминел те владинел упри Пхув? Англедер и последно војна, со викинела пе Армагедон, о демонија ка ховавен „е царен таро цело свето те кхеден лен баши војна со ка овел ко баро диве е Девлескоро кова сој Семоќно“. Оја, о манушикане владе ка боринен пе против е Девлескоро Царство (Откровение 16:14, 16). (Дикх и 10 фуснота.)

19, 20. Соске ваљани аменге е Девлескоро Царство те владинел упри Пхув?

¹⁹ Соске ваљани аменге е Девлескоро Царство? Иси најхари трин причине. Прво, амен сием грешна, адалеске насваљоваја хем мераја. Ама, и Библија вакерела кај амен ка живина засекогаш кеда ка владинел е Девлескоро Царство. Ко Јован 3:16 вакерела: „О Девел добором бут мангља о свето со денѓа пле единствено бијаме Чхаве, те шај секој со ка верујнел ки лесте те на овел уништимо, него вечно те живинел“.

²⁰ Дујто причина соске ваљани аменге е Девлескоро Царство тани соске живинаја ко свето коте со иси лошна мануша. Бут џене ховавена хем тане неморална. Амен нашти те променина адава, ама о Девел шај. О мануша со керена лошна буќа ка овен уништиме ко Армагедон. (Читин Псалм 37:10.) И трито причина соске ваљани аменге е Девлескоро Царство тани кај о манушикане владе тане лошна, сурова хем румиме. Ола на поможинена е  манушенге те шунен е Девле. И Библија вакерела кај „о мануш владинела упро мануш ки лескири штета“ (Проповедник 8:9).

21. Сар е Девлескоро Царство ка анел џи ко адава те керел пе е Девлескири волја ки цело Пхув?

²¹ Пало Армагедон, е Девлескоро Царство ка анел џи ко адава те керел пе е Девлескири волја ки цело Пхув. На пример, ка цидел е Сатана хем лескере демонен (Откровение 20:1-3). Никој нане те насваљовел или те мерел. Адалеске со иси откупнина, са о верна мануша ка овен лен прилика те живинен засекогаш ко Рај (Откровение 22:1-3). О Царство ка славинел е Девлескоро свето анав. Со значинела акава? Акава значинела кај кеда е Девлескири влада ка владинел упри Пхув, са о мануша ка фалинен е Девлескоро анав. (Дикх и 21 фуснота.)

22. Котар џанаја кај о Исус на уло Цари кеда сине ки Пхув или одма кеда воскреснинѓа?

²² О Исус сикавѓа пле ученикон те молинен пе: „Те авел тло Царство“. Јасно сине кај е Девлескоро Царство ваљани те авел ки иднина. О Јехова ваљани сине прво те воспоставинел пли влада хем те  керел е Исусе Цари. Дали о Исус уло одма цари кеда иранѓа пе ко небо? На, ов ваљанѓа те аџикерел. Пало несаво време кеда воскреснинѓа о Исус, о Петар хем о Павле вакерѓе кај о пророштво таро Псалм 110:1 исполнинѓа пе упро Исус. Ко акава пророштво о Јехова вакерела: „Беш тари мли десно страна са џикоте на чхивава тле душманен тело тле пре“ (Дела 2:32-35; Евреите 10:12, 13). Кобор време ваљанѓа о Исус те аџикерел о Јехова те керел ле Цари?

23. а) Кеда о Исус почминѓа те владинел сар Цари ко е Девлескоро Царство? б) Со ка дикха ко јавер поглавје?

²³ Бут берша англедер 1914 берш, јекх група таро искрена христијања халиле кај ко адава берш ка исполнинел пе важно библиско пророштво. О буќа со овена ко свето таро 1914 берш сикавѓе кај ола тане ко право. О Исус адава берш почминѓа те владинел сар Цари (Псалм 110:2). Пало адава, о Сатана сине фрдимо теле ки Пхув хем акана „иси ле хари време“ (Откровение 12:12). Ко јавер поглавје ка дикха повише доказија кај амен живинаја ко адава време. Исто аѓаар, ка дикха кај панда хари е Девлескоро Царство ка анел те керел пе е Девлескири волја ки цело Пхув. (Дикх и 22 фуснота.)