БУТ џене авдиве вакерена кај веруњена ко Девел. Ама о Иса вакерѓа кај бут хари мануша ка овел лен чачутни вера ко Девел. Ов пхенѓа: „Бувло тано о друмо со ингарела ко уништување, хем бут џене џана ки лесте. А тесно тано о удар хем тесно тано о друмо со ингарела ко џивдипе, хем хари џене аракхена ле“ (Матеј 7:13, 14).

Сар о мануша авдиве сикавена кај иси лен чачутни вера ко Девел? „Таро ленгере плодија ка пенџарен лен“, вакерѓа о Иса. „Секова шукар каш дела шукар плоди, а секова кирно каш дела лошно плоди“ (Матеј 7:16, 17). Значи, и чачутни вера ко Девел дела „шукар плоди“. Ој керела о мануша те сикавен особине саве со мангела о Девел. Сар сикавена адала особине?

О мануша со иси лен чачутни вера користинена пи сила хем по авторитети те служинен е Девлеске хем те поможинен е јаверенге. О Иса пхенѓа: „Кој мангела те овел баро машкар туменде нека овел туменге слуга“ (Марко 10:43). О чачутне верникија нане насилна, ни кхере ни аври таро пло кхер. Ола бут ценинена пумаре ромњен, поштуњена лен хем мангипаја грижинена пе ленге. Ко е Девлескоро Лафи бешела: „Тумен ромален, манген тумаре ромњен хем ма понашинен тумен ленцар грубо“ (Колошаните 3:19). „Ромален, џивдинен тумаре ромњенцар аѓаар сар со сиклилен, ценинен лен сар понежно вазна, соске ола да сар туменде наслединена о дари е џивдипаскоро. Те на керѓен адава, тумаре молитве нане те овен шунде“ (1. Петрово 3:7).

Исто аѓаар, јекх ромни со иси ла чачутни вера ко Девел ваљани „таро вило те поштуњел пе роме“ (Ефешаните 5:33). О ромња ваљани „те манген пе ромен“ хем „те манген пе чхавен“ (Тит 2:4). О дада хем о даја кола со и верникија накхавена време пе чхавенцар хем сикавена лен башо е Девлескоро закон хем начелија. Коте било те овен, кхере, ки бути или јавертхе, ола поштуњена хем ценинена е јаверен. Ола шунена е Девлескоро совет: „Овен прва те сикавен поштовање е јаверенге“ (Римјаните 12:10).

Е Девлескере слуге икерена и заповед со и ленге денди ко е Девлескоро Лафи: „Ма ле мито“ (2. Мојсеева 23:8). Ола никогаш на користинена по авторитети те керен лошна буќа, него дикхена сар те поможинен е јаверенге, посебно адаленге каске со ваљани те поможинел пе. Ола шунена о совет: „Ма бистрен те керен шукарипе хем делинен адава со иси тумен е јаверенцар, соске асавке жртве мангела о Девел“ (Евреите 13:16). Адалеске ола џанена кај тане чаче акала лафија со вакерѓа лен о Иса: „Побутер иси бахталипе кеда дела пе него кеда лела пе“ (Дела 20:35).

О мануша со веруњена ко Девел таро вило, шунена лескоро закон хем лескере заповедија нане ленге пхаре  (1. Јованово 5:3). Ола џанена кај „е Јеховаскоро закон тано совршено... е Јеховаскере наредбе тане праведна, радуњена о вило, е Јеховаскири заповед тани чисто, пхравела о јакхја“ (Псалм 19:7, 8).

Адалеске со иси лен чачутни вера ко Девел, лескере слуге ко нисаво начин на керена разлика машкар о мануша. Ола на ваздена јекх раса или пхув упри јавер, хем на дикхена ки сави положба тано несаво мануш, него ко акала буќа дикхена сар со дикхела о Девел. Лескоро Лафи вакерела: „О Девел на одвојнела е манушен, него тари секоја нација прифатинела околе со дарала лестар хем керела адава со и праведно“ (Дела 10:34, 35).

И чачутни вера ко Девел керела о мануша ‚ко са о буќа те овен поштена‘ (Евреите 13:18). Јекх мануш со чаче веруњела ко Девел нане те вакерел лошна буќа башо јавера или те чхивел ифтира е јаверенге. О Даути пишинѓа кај о Девел мангела е манушен со ‚на вакерена ифтире пе чхибјаја. На керена нисаво лошнипе пе паше амалеске‘ (Псалм 15:3).

О мануша со иси лен чачутни вера ко Девел веруњена само ко адава со сикавела лескоро Лафи. Ола веруњена кај „цело Лил авела таро Девел хем корисно тано те сикавел е мануше, те сикавел кеда нешто тано погрешно, те исправинел са о буќа хем те сикавел сар те џивдинел пе праведно сар со мангела о Девел“ (2. Тимотеј 3:16). Ола понашинена пе е јавере манушенцар аѓаар со сикавена „и мудрост со авела упралдан“, која со керела лен те овен ‚чиста, те манген о мир, те овен разумна, спремна те шунен, те овен пхерде шукарипаја хем те керен шукар буќа‘ (Јаков 3:17). Ола цидена пе таро адетија со на мангела о Девел, таро спиритизам хем таро идолија (1. Јованово 5:21).

О пекамбери о Муса вакерѓа: „Манг е Јехова, те Девле, са те вилеа, са те душаја хем са те силаја“ (5. Мојсеева 6:5). Аѓаар мангена е Девле о мануша со иси лен вера ки лесте. Ола поштуњена е Девлескоро анав, Јехова. Ола тане ‚благодарна е Јеховаске‘ хем вераја вакерена лескоро анав (Псалм 105:1). Е Девлескере слуге исто аѓаар икерена и заповед: „Манг те пашутне сар коркори тут“ (3. Мојсеева 19:18). Ола нане насилна хем трудинена пе те овен ко „мир са е манушенцар“ (Римјаните 12:18). Адава анела те овел лен мангипе машкар ленде хем те радуњен пе башо ленгоро пхралипе ко цело сумнал (Јован 13:35). Шај ли те пенџаре адале манушен авдиве?